ក្រុងបាងកក: ជាមួយអត្ដសញ្ញាណ ក្រវាត់កពណ៌ក្រហម អាវក្រៅពណ៌ត្នោត វ៉ាលិស និងកូនខ្លាឃ្មុំ ជាងកុំព្យូទ័រថៃម្នាក់ បានក្លាយជាបុគ្គលគួរឲ្យចាប់អារម្មណ៍ទូទាំងប្រទេស តាមរយៈសមត្ថភាពត្រាប់កាយវិការ Mr Bean ក្នុងសង្គមថៃ ដែលល្បីតារាចម្លែកឡប់ៗនេះ។
លោក មង្គល ព្រីចាចាន់ ជាឪពុកម្នាក់ អាយុ ៤៣ ឆ្នាំ មកពីភូកេត ដោយមានរូបភាពស្ទើរតែដូចនឹងតារាកំប្លែងអង់គ្លេស ដែលមានឈ្មោះដើម រ៉ូវ៉ាន់ អាត់គីនសុន បានល្បីភ្លាមៗក្រោយពីព្យាយាមត្រាប់តាមកាយវិការក្នុងកម្មវិធីទូរទស្សន៍ «Thailand''s Got Talent» ក្នុងឆ្នាំ ២០១៦។
វីដេអូឃ្លីបដ៏ល្បី ដែលបង្ហោះលើយូធូបជាមួយអ្នកចូលទស្សនាជាង ៥ លានដង បានប្រែក្លាយឆាកជីវិតលោក មង្គល ទៅជាតារាល្បីតែមួយប៉ប្រិចភ្នែក នៅក្នុងប្រទេសដែលចូលចិត្ដ Mr Bean។
ពេលនេះ លោក មង្គល ធ្វើដំណើរសម្ដែងទេសចរណ៍ទូទាំងប្រទេសថៃ បង្ហោះរូបភាពសែលហ្វ៊ីជាតួអង្គតារាកំប្លែង។ ការសម្ដែងនាពេលថ្មីៗ នាំរូបលោកទៅដល់ខេត្ដ ណាខន ណាយុក ដែលធ្វើឲ្យអ្នកទោសរាប់រយនាក់សើចចុកពោះ ខណៈរត់ជុំវិញវេទិកាជាមួយកូនខ្លាឃ្មុំសំណព្វ។
អ្នកទោសម្នាក់ពោលក្រោយបញ្ចប់ការសម្ដែងថា៖ «ពិតជាគួរឲ្យចង់សើចមែន។ វាជួយបន្ធូរបន្ថយអារម្មណ៍តានតឹងយ៉ាងច្រើន»៕