.jpg)
សាពួន និងភរិយា ពេលកូនប្រុសទី ២ កើតកាលពីថ្ងៃទី ១ មករា ដើមឆ្នាំ ២០១៨។ ហ្វេសប៊ុក
ភ្នំពេញៈ អតីតតារាចម្រៀងប្រុសជ្រកក្រោមទ្រនំផលិតកម្មហង្សមាស ដែលល្បីឈ្មោះមួយប្រាវ សាពូន មីដាដា ធ្លាប់ប្រកាសពីក្តីប្រាថ្នានៃការចាប់កំណើតកូនប្រុសទី ២ របស់ខ្លួនឲ្យចំថ្ងៃទី ៧ ខែមករា តែហាក់ដូចជាខកបំណងបន្តិចពេលនេះបែរជាកូនប្រុសបានកើតមកមុនកំណត់ដល់ទៅចំនួន ៦ ថ្ងៃ។
នេះបើតាមសារអបរអរសាទររបស់តារាចម្រៀងប្រុស ដែលសម្បូររឿងអាស្រូវលើផ្លូវនយោបាយ លោក សាពូន មីដាដា បានបង្ហោះសារឲ្យដឹងនូវថ្ងៃសម្រាលកូនប្រុសទី ២ របស់ភរិយាខ្លួនក៏ជាតារាចម្រៀង និងសម្តែងស្រី អ្នកនាង សឿ សុធារ៉ា ព្រមទាំងកូនស្រីច្បងនៅក្នុងមន្ទីរពេទ្យថា៖ «ថ្ងៃសីល ១៥ កើត ខែបុស្ស ពេញបូរមី ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១ ខែមករា ឆ្នាំ ២០១៨ នៅវេលាម៉ោង ៣ និង ៥៨ នាទី ព្រឹក (ទៀបភ្លឺ)។ កូនប្រុសពុក សាពូន ដារ៉ាបុរស បានកើតមកហើយលើទឹកដីសុវណ្ណភូមិ ដ៏ស្រស់ស្អាតនេះ។ ឪពុកឲ្យពរកូនក្លាយជាមនុស្សសែនរឹងមាំ ដែលប្រកាន់ខ្ជាប់នូវសុចរិតភាពជានិច្ច និងមានជ័យជោគក្នុងឆាកជីវិត»។
គេនៅចាំបានដែរថា គូស្វាមីភរិយាងារជាតារាសិល្បៈពីរដួងលោក សាពូន មីដាដា និងតារាស្រីអ្នកនាង សឿ សុធារ៉ា ដែលមានចំណងជីវិតអាពាហ៍ពិពាហ៍ជិតគ្រប់មួយទសវត្សរ៍ និងកូនស្រីច្បងមានវ័យ ៧ ឆ្នាំ កាលពីព្រឹកថ្ងៃទី ១៣ ខែ វិច្ឆិកា ឆ្នាំ ២០១៧ កន្លងមកនោះ ធ្លាប់បានបង្ហោះរូបថតអេកូកំណើតកូនប្រុសដែលរំពឹងថា នឹងត្រូវសម្រាលនៅចំថ្ងៃទី ៧ ខែមករា ឆ្នាំ ២០១៨ ។
យ៉ាងណាមិនមានការបកស្រាយនូវសេចក្តីខកបំណងពី លោក សាពូន មីដាដា នោះឡើយដោយសារប្រព័ន្ធទូរស័ព្ទរបស់លោកមិនអាចទាក់ទងបាន តែគេបានឃើញពីភាពសប្បាយរីករាយខ្លាំងពីលោកឪពុកជាតារាចម្រៀងប្រុសនេះឆ្លើយឆ្លងជាមួយនឹងការជូនពរ និងអបអរសាទរពីសំណាក់ក្រុមមិត្តភក្តិ ក៏ដូចជាមិត្តអ្នកសិល្បៈនានានៅក្នុងបណ្តាញសង្គមហ្វេសប៊ុក។
មានអ្នកសរសើររឿងរកឈ្មោះដាក់ឲ្យកូនប្រុសទី ២ របស់លោក សាពូន មីដាដា ដែលបានកើតឃើញពន្លឺថ្ងៃចំថ្ងៃទី ១ ខែមករា ឆ្នាំ ២០១៨ ថា៖ «អបអរសាទរបងទទួលបានកាដូដ៏អស្ចារ្យសម្រាប់ឆ្នាំថ្មី គឺកូនប្រុសគួរឲ្យស្រឡាញ់ និងមានឈ្មោះពីរោះ (សាពូន ដារ៉ាបុរស) បងបើសរសេរបែបនេះគឺ សាពូន តារាបុរសគឺមានអត្ថន័យល្អណាស់» និងសារថា៖ «ឆ្លងទន្លេចំថ្ងៃល្អទី ១ ខែ មករា ពិតជាអស្ចារ្យណាស់ ដើមទ្រព្យ ដើមសប្តាហ៍ ដើមខែ ដើមឆ្នាំ អីក៏ល្អម្ម្ល៉េះទេ!សូមសរសើរ និងអបអរសាទរទៅនឹងដំណឹងដ៏គួរឲ្យរំភើបរីករាយនេះគឺជាថ្ងៃចូលឆ្នាំថ្មី ដែលពិភពលោកទាំងមូលអបអរសាទរ»។
គេឃើញតារាចម្រៀងម្ចាស់បទ «និយមន័យស្នេហ៍» ដ៏ល្បីរន្ទឺកាលពីជិត ១០ ឆ្នាំមុន ជ្រកក្នុងទ្រនំផលិតកម្មហង្សមាសលោក សាពូន មីដាដា មិនបានថ្លែងអ្វីច្រើនឡើយ ក្រៅពីសេចក្តីពោលពាក្យអរគុណថា៖ «សូមអរគុណគ្រប់យ៉ាង មហាមិត្ត។ ខ្ញុំបានចងចាំសមានចិត្តដ៏អស្ចារ្យមួយនេះរបស់បងប្អូនមហាមិត្តទាំងអស់»។
កាលពីភរិយាខ្លួនកំពុងពពោះកូនប្រុសទី ២ ដែលទើបតែមានវ័យ ៥ ខែ លោក សាពូន មីដាដា ក៏ធ្លាប់បង្ហើបឲ្យដឹងថា មានមន្ទីរពេទ្យឯកជនដ៏ធំមួយ បានកក់ទុកទាំងម្តាយ និងគភ៌ក្នុងផ្ទៃរួចហើយដើម្បីត្រៀមយកថតស្ប៉តពាណិជ្ជកម្មផ្សព្វផ្សាយដូចជាកូនស្រីច្បងផងដែរ៕
