.jpg)
ភ្នំពេញៈ ហាក់ដូចជាយកចិត្តយកថ្លើមទៅនឹងប្រពន្ធ ដែលបានខំពពោះកូនទី ២ របស់ខ្លួន ទើបបានជាថ្មីៗនេះតារាចម្រៀងប្រុសជ្រកទ្រនំថោនលោក កែវ វាសនា បានទៅរកទិញរថយន្តទំនើបម៉ាកឡិចស៊ីសសម្រាប់ឲ្យប្រពន្ធជិះផ្ទាល់ខ្លួន តែប្រពន្ធរអ៊ូរព្រោះពកាន់តែធំទើបមិនហ៊ានបើកបរ។
នេះបើតាមសារចេញពីគណនីហ្វេសប៊ុកឈ្មោះ Chy Chy ដែលជាថៅកែស្រីលក់គ្រឿងសម្អាងអនឡាញ ដែលជាភរិយារបស់លោក កែវ វាសនា បង្ហោះសារភ្ញាក់ផ្អើលថា៖ «ប្តីខ្ញុំផ្គាប់ចិត្តប្រពន្ធណាស់ ដើររកទិញឡានឲ្យប្រពន្ធជិះផ្ទាល់ខ្លួនទៀត? ពពោះ៦ខែហើយ ជិះទៅណាកើត? ជិះតែឡានជាមួយប្តី និងជាមួយប្អូនក៏បានដែរ ខ្ជិលបើកផង!»។
យ៉ាងណារថយន្តដែលលោក កែវ វាសនា ជាតារាចម្រៀងប្រុសជ្រកកោនទ្រនំផលិតកម្មថោន ម្ចាស់បទ «ស៊ីបានចេះទេស៊ីទៅ» ធ្លាប់ត្រូវព្រនង់ពាក្យសម្តីរិះគន់យ៉ាងដំណំពីមតិមហាជន បណ្តាអ្នកលេងសង្គមហ្វេសប៊ុក និងត្រូវក្រសួងព័ត៌មានក៏បានចេញសេចក្តីប្រកាសហាមចាក់ផ្សាយតាមប៉ុស្តិ៍ទូរទស្សន៍ និងវិទ្យុនានា កាលពីចុងឆ្នាំ២០១៦នោះ មិនបានប្រាប់ឲ្យដឹងច្បាស់ពីតម្លៃ និងស៊េរីនៃម៉ាកឡិចស៊ីសឡើយ ដោយប្រព័ន្ធទូរសព្ទលោកបានបិទ។
ចំពោះកូនប្រុសទី១ បានចាប់កំណើតនារសៀលថ្ងៃទី ២ ខែមករា ឆ្នាំ២០១៧ មានឈ្មោះថា «Chi Fu» ខណៈភរិយារបស់តារាចម្រៀង កែវ វាសនា គេស្គាល់ថា ជារបស់ម្ចាស់ហាងលក់ផលិតផលថែរក្សាសម្ផស្សសាច់សខ្ចីអ្នកស្រី លឹម លីសុគន្ធារី ក្រោយពីរៀបអាពាហ៍ពិពាហ៍ កាលពីថ្ងៃទី ១១ ខែឧសភា ឆ្នាំ ២០១៦ នៅគេហដ្ឋានខាងស្រី ឯខេត្តបន្ទាយមានជ័យ យ៉ាងអាធិកអាធមបំផុត និងដើមឆ្នាំ២០១៧ មិនត្រឹមបានកូនប្រុសទី១ គួរឲ្យស្រឡាញ់ប៉ុណ្ណោះទេ ថែមទាំងបានធ្វើពិធីឡើងគេហដ្ឋានថ្មីផ្ទះដ៏ប្រណីតនៅបុរី ប៉េងហួតតម្លៃជិត ២០ ម៉ឺន ដុល្លារ ជាកាដូឲ្យកូនប្រុសទី១ទៀតផង។
ខណៈកូនប្រុសជាដំណក់ឈាមដំបូងទើបតែចាប់កំណើតកាលថ្ងៃទី២ ខែមករា ឆ្នាំ២០១៧ មានវ័យមិនទាន់បាន ១ ខួបផងនោះ ក៏ស្រាប់តែឃើញភរិយារបស់តារាចម្រៀងប្រុសលោក កែវ វាសនា ដែលមានគណនីហ្វេសប៊ុកមានឈ្មោះ Chy Chy បង្ហោះរូបឧបករណ៍ពិនិត្យទឹកនោមឃើញមានការចាប់កំណើតកូនទី ២ របស់ខ្លួននៅចុងខែសីហា ឆ្នាំ២០១៧ មានសារបញ្ជាក់ថា៖ «ប្តីអើយប្តី ចាំមួយឆ្នាំទៀតមិនបាន!ចង់បាននោះចង់បាន លូវបានដូចចិត្តហើយ!»៕
