.jpg)
ចិនសែ អ៊ៅ ណន ហៅលោកគ្រូម៉ុង បទពិសោធមើលរាសីតាមក្បួនចិន ២០ ឆ្នាំ។ ហុង មិនា
ភ្នំពេញៈ រដូវកាលចូលឆ្នាំថ្មីប្រពៃណីចិនឆ្នាំច នឹងប្រព្រឹត្តទៅចាប់ពីថ្ងៃទី ១៦ ខែកុម្ភៈ ខណៈថ្ងៃសែនធំត្រូវរៀបចំនៅក្នុងថ្ងៃព្រហស្បតិ៍ ទី ១៥ ខែកុម្ភៈ ឆ្នាំ ២០១៨។
ជាមួយនឹងបទពិសោធទស្សន៍ទាយប្រមាណ ២ ទសវត្សរ៍ ហោរាចិនសែមានវ័យ ៦៨ ឆ្នាំ លោក អ៊ៅ ណន ហៅគ្រូម៉ុង ដែលផ្ទះស្ថិតនៅទល់មុខចំខ្លោងទ្វារខាងកើតវត្តព្រះពុទ្ធឃោសាចារ្យ ហៅវត្តចិនដំដែក បានធ្វើការបកស្រាយជោគជតារាសី ដោយសង្ខេបដំណើរជីវិតនៃឆ្នាំនីមួយៗប្រចាំឆ្នាំ ២០១៨។
ចំណែកគ្រឿងសែនទទួលទេវតាវិញ ផ្លែក្រូចឃ្វិចពណ៌មាស ឬលឿងគឺជាសំណែនចាំបាច់ខានមិនបាន ក្រៅពីគ្រឿងសំណែនផ្សេងៗ ខណៈឆ្នាំនេះជាឆ្នាំចមានធាតុដី ដូច្នេះរាល់វត្ថុអ្វីៗមានពណ៌មាស ឬក្រហមឆ្អៅ ឬពណ៌លឿង យ៉ាងណាដូចជាផ្កាអង្គាសីលជាដើមនោះក៏ជានិមិត្តរូបនៃភាពសម្បូរសប្បាយ និងមានបានសម្រាប់ការសែនទេវតាចូលឆ្នាំចិនផងដែរ។
ឆ្នាំនេះត្រីបំពងគឺជាអាហារសាច់ល្អក្នុងការសែនឆ្នាំចនេះដែរ ប្រសិនបើអាចចៀស បានគួរកុំប្រើសាច់មាន់សែនអី ព្រោះថា ឥទ្ធិពលនៃឆ្នាំចាស់ឆ្នាំរកា ជាសត្វមាន់ ហាក់នៅមានអំណាចនៅឡើយទេ តែក៏មិនហាមដាច់ខាតដែរ។ ម្យ៉ាងទៀតការសែនត្រីបំពងនេះ គឺត្រូវបានត្រីមួយគូ បើបានក្បាលធំជារឿងល្អតាមជំនឿចិន ក្បាលត្រីធំជានិមិត្តរូបនៃអំណាចដឹកនាំគ្រប់វិស័យ ដោយចាប់រាប់ពីមេគ្រួសារទៅ។
រីឯត្រណមក៏មានដែរសម្រាប់ជោគជតារាសីឆ្នាំថ្មីនេះ គឺហាមយកចង្ក្រានបាយទៅដាក់ពីក្រោមកាំជណ្តើរ ឬក្រោមបង្គន់ ខណៈការដេកសម្រាកកុំដាក់ក្បាលគ្រែនៅក្រោមមាត់បង្អួចឲ្យសោះ ព្រោះថា ជាការនាំឲ្យមានអាប់រាសី។
បម្រាមមួយទៀតមិនត្រូវយកជើងលោកអ្នកធាក់មាត់ទ្វារចេញចូល ឬបន្ទប់ទឹកឡើយព្រោះបាត់បង់លាភ និងហាមប្រើកញ្ចក់ចាំងពន្លឺចំមាត់ទ្វារចេញចូល ឬមាត់ទ្វារបន្ទប់ដែរ។
បើតាមក្បួនតម្រាចិនសម្រាប់ការកាត់ឆុងគឺមានសារៈសំខាន់ខ្លាំង ហើយការកាត់ឆុងនេះស្មើនឹងការនិមន្តព្រះសង្ឃសូត្រមន្តដល់ទៅចំនួន ៧ វត្តឯណោះ។ ទីកន្លែងកាត់ឆុងដ៏ល្អនៅ វិហារចិននៃតំបន់វត្តភ្នំ។ រីឯសំណែននៃវិធី កាត់ឆុងគឺមានសាច់ជ្រូកឆៅចំនួន ៣-៤ ខាំច្រៀកជា ៣-៤ ចម្រៀក ពងទាឆៅ ៣-៤ គ្រាប់ និងក្រូចឃ្វិច ៦ ផ្លែ។ សាច់ជ្រូកត្រូវដាក់ក្នុងមាត់រូបចម្លាក់ខ្លា និងគប់បំបែកពងទាឆៅឲ្យហៀរប៉ះនឹងធ្មេញខ្លាសនៅឯវត្តភ្នំនោះ ខណៈម៉ោងដ៏ល្អក្នុងការធ្វើពិធីកាត់ឆុងគឺចាប់ពីម៉ោង ២ រសៀលដល់ម៉ោង ៥ ល្ងាច។
ឆ្នាំជូត
រាសីឡើងខ្ពស់។ លោកអ្នកកើតឆ្នាំជូត រាសីឡើងខ្ពស់ក្នុងឆ្នាំចនេះ។ រាល់ការរកស៊ី ឬការបំពេញការងារផ្សេងៗមានជោគជ័យ សមសួនទៅតាមមុខរបរ និងមានលាភសំណាងហូរចូលមិនពិបាកខ្វាយខ្វល់ចិត្ត។
យ៉ាងណាក៏ត្រូវធ្វើពិធីកាត់ឆុងដែរគឺធ្វើនៅខែមីនា ឆ្នាំ ២០១៨។ ចំណែកការរកគូស្រករវិញ ដូចជាមិនមានអ្វីកើតឡើងដែលអាចនាំឲ្យមានជាឧបសគ្គនោះឡើយ។ ឆ្នាំនេះលោកអ្នកអាចរកអ្នកយល់ចិត្តយល់ថ្លើមបាន និងមានក្តីស្នេហ៍សម្រាប់ជាកោះត្រើយនៃថ្ងៃមង្គលការរបស់ខ្លួនបានល្អផងដែរ។
ឆ្នាំឆ្លូវ
រាសីល្អបង្គួរ។ សម្រាប់លោកអ្នកកើតឆ្នាំឆ្លូវគឺមានរាសីមធ្យម ហើយមានការលំបាកលំបិនខ្វល់ខ្វាយចិត្តច្រើន តែរាល់វិបត្តិទាំងនោះនឹងសាបសូន្យបាត់បង់អស់វិញជាបណ្តើរ។
ខណៈការប្រកបរបរ និងបំពេញការងារផ្សេងៗដាក់ចុះដុះឡើងទៅមុខជោគជ័យគួរសម តែក៏ត្រូវតែតោងយកការប្រុងប្រយ័ត្នផង។ រីឯអ្នកមិនទាន់មានគូកន ទាំងប្រុសស្រីគឺដល់វ័យត្រូវរៀបការហើយ និងអាចរកវេលាដើម្បីគិតគូរបានគ្មានឧបសគ្គឡើយ។ សម្រាប់អ្នកកើតឆ្នាំឆ្លូវក៏ត្រូវទៅកាត់ឆុងដែរឲ្យបានមុនខែធ្នូ ឆ្នាំ ២០១៨។
ឆ្នាំខាល
រាសីមធ្យម។ អ្នកកើតឆ្នាំខាលសម្រាប់ឆ្នាំថ្មីឆ្នាំចនេះ មានរាសីមធ្យម។ ទោះបីជាលោកអ្នកមានការលំបាកចិត្តយ៉ាងណាក្តី បើរៀបចំទៅតាមក្បួនខ្នាតចិនសែបានត្រឹមត្រូវនឹងក្លាយជាវេលាសម្រាប់ការប្រកបរបររកទទួលទាន ឬការបំពេញការងារនានា។
ដើម្បីបានសុខត្រូវកាត់ឆុងនៅដំណាច់នៃខែកុម្ភៈ ឆ្នាំ ២០១៨ នេះ ដែលរំលងសែនប៉ុន្មានថ្ងៃ។ ប្រការសំខាន់ត្រូវចេះធ្វើបុណ្យទានឲ្យបានច្រើន ព្រោះតាមទំនាយមានកម្មពៀរ ៣ ជាតិ តម្រូវឲ្យធ្វើទានលែងត្រី ឬចាប។ ចំពោះគូស្នេហ៍ ឬគូស្រករវិញគប្បីធ្វើទៅតាមដំណើរ។
ឆ្នាំថោះ
រាសីឡើងខ្ពស់។ ចំពោះលោកអ្នកកើតឆ្នាំថោះគឺមានរាសីឡើងខ្ពស់ក្នុងឆ្នាំចនេះដែរ។ សម្រាប់រាល់កិច្ចការរកស៊ី ឬការបំពេញការងារផ្សេងៗមានជោគជ័យសមសួនទៅតាមមុខរបរនិងមានលាភសំណាងហូរចូលមិនពិបាកចិត្តខ្លាំងនោះឡើយ។
ទោះជាយ៉ាងណា ក៏ត្រូវធ្វើពិធីកាត់ឆុងដែរគឺធ្វើនៅដំណាច់ខែមីនា ឆ្នាំ ២០១៨។ ចំណែកឯការរកគូស្រករវិញនោះដូចជាមិនមានអ្វីកើតជាឧបសគ្គនោះឡើយ គឺអាចរកអ្នកយល់ចិត្តយល់ថ្លើមបាន និងមានក្តីស្នេហ៍សម្រាប់កោះត្រើយនៃថ្ងៃមង្គលការរបស់ខ្លួនបានផងដែរ។
ឆ្នាំរោង
រាសីស្រុតចុះខ្លាំង។ សម្រាប់អ្នកកើតឆ្នាំរោង នាឆ្នាំថ្មីនេះ រាសីស្រុតចុះ ក្រោមខ្លាំងហើយក៏ឆុងខ្លាំងជាងគេជាមួយនឹងឆ្នាំចតែម្តង។ តែការប្រកបរបររកស៊ី ឬការងារផ្សេងៗរកបានបែបតក់ៗមិនដាច់ឡើយ។ បុរសស្ត្រីនៅលីវគឺមិនសូវល្អសម្រាប់ការរកដៃគូ ឬគូស្រកររៀបចំមង្គលការដើម្បីបន្តវង្សត្រកូលទេ ខណៈសង្គមគ្រួសារក៏មិនសូវជាល្អដែរ។
ម្យ៉ាងទៀតអ្នកកើតឆ្នាំរោង ច្រើនប្រើគំនិតដើរខ្សែលើគេ និងចូលចិត្តលួងលោមគេប្រើ ហើយមិនឲ្យតម្លៃគេទៀត ព្រោះមានចរិតអួតលើខ្លួនឯង។ ការកាត់ឆុងដ៏ល្អគឺត្រូវធ្វើឲ្យបានមុនដាច់ខែកុម្ភៈ ឆ្នាំ ២០១៨ ទើបជាពេលល្អប្រសើរ។
ឆ្នាំម្សាញ់
រាសីល្អបង្គួរ។ លោកអ្នកកើតឆ្នាំម្សាញ់ មានរាសីល្អបង្គួរ ហើយមិនមានការឆុងទៅនឹងឆ្នាំចជាម្ចាស់ផ្ទះនោះទេ។ រាល់ការប្រកបមុខរបររកស៊ី និងបំពេញការងារនានា គឺមានដំណើរការល្អចាប់ពីដើមឆ្នាំតទៅ តែក៏ចាយធូរៗ ឬលើសចំណូលដែរ ប្រការសំខាន់កុំឆាប់ជឿគេពេកព្រោះអាចខាតបង់ទ្រព្យ ដូច្នេះត្រូវចេះវិនិច្ឆ័យត្រង់ចំណុចនេះផង។
អ្នកនៅលីវទាំងស្រីប្រុសអាចជាវេលាល្អក្នុងការរកគូបាន មិនមានភាពសៅហ្មងអ្វីឡើយ តែលោកអ្នកត្រូវកាត់ឆុងចម្លងគ្រោះឲ្យបានម្តងផងសម្រាប់ឆ្នាំថ្មីនេះ។
ឆ្នាំមមី
រាសីឡើងខ្ពស់។ លោកអ្នកកើតឆ្នាំមមី រាសីឡើងខ្ពស់។ លោកអ្នកជាអ្នកមានស្មារតីល្អ រវៀសរវៃ ចេះគិតគូរ និងប៉ាន់ស្មានបានត្រឹមត្រូវគ្រប់ប្រភេទមនុស្សតែម្តង។ ចំណែកឯគូស្នេហ៍ក្នុងសង្គមគ្រួសារមានភាពល្អូកល្អិននឹងគ្នា។
តែទោះជាយ៉ាងណាក៏ត្រូវកាត់ឆុងចម្លងគ្រោះដែរគឺធ្វើនៅក្នុងខែមេសា ឆ្នាំ ២០១៨។ ចំពោះលោកអ្នកនៅលីវ ទាំងប្រុស និងស្រីវិញគឺអាចជាពេលវេលាល្អនៅក្នុងការរៀបចំមង្គលការ ឬល្អបំផុតសម្រាប់អ្នកចង់រកគូកន ដើម្បីបង្កើតក្រុមគ្រួសារនឹងគេតែម្តង។
ឆ្នាំមមែ
រាសីមធ្យម។ រាសីសម្រាប់អ្នកកើតនៅក្នុងឆ្នាំមមែគឺមធ្យម តែប៉ុណ្ណោះ។ រាល់ការរកស៊ីនានារលូនគួរសម និងមានលក្ខណៈសន្សឹមៗទៅមុខជានិច្ច។ រីឯស្ថានភាពគ្រួសារមិនមានអ្វីគួរឲ្យបារម្ភដែរ តែក៏ត្រូវកាត់ឆុងនៅខែមិថុនា ឆ្នាំ ២០១៨ ផងទើបអាចឆ្លងផុតគ្រោះកាចបាន។ អ្នកនៅលីវគឺដល់វេលាត្រូវរៀបចំពិធីមង្គលការ ទៅតាមការគួរហើយព្រោះជាវេលាល្អសម្រាប់រកគូកនផងដែរ។ តែលោកអ្នកក៏ត្រូវប្រុងប្រយ័ត្នខ្លួនផងដែរ ព្រោះថាលោកអ្នកអាចនឹងចាញ់កល ឬចាញ់បោកគេ និងកុំឆាប់ជឿគេពេក។
ឆ្នាំវក
រាសីល្អបង្គួរ។ លោកអ្នកកើតឆ្នាំវក រាសីល្អបង្គួរ ព្រោះទើបតែរួចផុតពីគ្រោះកាចកាលឆ្នាំកន្លងមក។ តែឆ្នាំវកច្រើនជាអ្នកមិនសូវខ្វាយខ្វល់ចិត្តច្រើនទេ ហើយដើម្បីមានក្តីសុខ ក៏ត្រូវកាត់ឆុងនៅខែកក្កដា ឆ្នាំ ២០១៨ ខណៈលោកអ្នកអាចនឹងជួបគ្រោះបាត់ទ្រព្យ។ ចំពោះអ្នកកើតឆ្នាំវកគប្បីមានការគិតពិចារណាឲ្យបានត្រឹមត្រូវ ហើយក៏កុំឆាប់ជឿគេពេក និងក៏មិនត្រូវទម្លាក់ការងារខ្លួនទៅស្រវាជួយគេដែរ ព្រោះខាតលាភខ្លួន។ សម្រាប់អ្នកនៅលីវគឺអាចជាពេលល្អរកគូស្រករឆ្នាំនេះ។
ឆ្នាំរកា
រាសីឡើងខ្ពស់។ លោកអ្នកកើតឆ្នាំរកា រាសីខ្ពស់ខ្លាំង ដោយសារតែទើបឆ្លងផុតពីភាពជាម្ចាស់ឆ្នាំ។ សម្រាប់បុរសនៅឆ្នាំរកានេះ ហាក់ដូចជាមានឫទ្ធិអំណាចខ្លាំងក្លាជាងស្ត្រី តែមិនមែនបែបជាមនុស្សឆេវឆាវកំរោលឡើយ។
រីឯការប្រកបរបររកស៊ីនានា មិនមានបញ្ហាអ្វីចោទនោះទេ តែក៏ត្រូវទៅកាត់ឆុងដើម្បីឆ្លងគ្រោះគឺប្រែក្លាយពីគ្រោះទៅជាលាភដ៏ល្អនៅខែសីហា ឆ្នាំ ២០១៨។ ការរកគូស្រករវិញគឺថា បុរស ឬស្ត្រី កើតឆ្នាំរកា ក៏អាចជាវេលាដ៏ល្អមួយសម្រាប់រកគូផងដែរ។
ឆ្នាំច
រាសីមធ្យម។ លោកអ្នកកើតឆ្នាំច រាសីឆ្នាំមធ្យម ហើយត្រូវជាន់ឆ្នាំគ្នា តែមិន មានបញ្ហាអ្វីចោទឡើយ។ លោកអ្នកមានទុក្ខសោក ឬរឿងសៅហ្មងក្នុងចិត្ត និងគ្រោះកាចក៏តិចតួចដែរ ដោយសារតែចំហាយកម្មពៀរពីជាតិមុន និងត្រូវប្រយ័ត្នប្រយែងសុខភាព និងគប្បីចេះធ្វើបុណ្យទានឲ្យបានច្រើន។
ការប្រកបរបររកស៊ី ឬបំពេញការងារផ្សេងៗដំណើរសន្សឹម។ ចំណែកឯលាភវិញបានដោយធម៌សេសសល់ពីទង្វើល្អជាតិមុនខ្លះ។ អ្នកកើតឆ្នាំច ក៏អាចជាវេលាល្អផ្តើមសម្ព័ន្ធភាព ឬសម្លឹងមើលម្ចាស់បេះដូងខ្លួន។ បើយកល្អ លោកអ្នកត្រូវកាត់ឆុងបានមុនខែឧសភា ឆ្នាំ ២០១៨ នេះ។
ឆ្នាំកុរ
រាសីមធ្យម។ លោកអ្នកកើតឆ្នាំកុរ រាសីមធ្យម។ ការប្រកបរបររកទទួលទានវិញក៏មានដំណើរការមធ្យមគ្មានបញ្ហារាំងស្ទះអ្វីទេ។
លោក អ្នកកើតឆ្នាំកុរហាក់ដូចជាមានភាពឆេវឆាវបន្តិច ដោយសារតែឆាប់ប្រកាន់នឹងពាក្យសម្តីគេភ្លាមៗ តែក៏ឆាប់និយាយរកគេវិញផង។ ការរកគូស្រករវិញត្រូវតែចេះសម្របខ្លួនទៅតាមស្ថានភាពជាក់ស្តែង។ យ៉ាងណាលោកអ្នកត្រូវតែទៅកាត់ឆុងនៅខែតុលា ឆ្នាំ ២០១៨ ផងដែរ៕
