ក្រុងកំប៉ាឡា : មូហាមេដ សេម៉ានដា ជាបុរសអ៊ីស្លាមអាយុ ៥០ ឆ្នាំមកពីប្រទេសអ៊ូហ្គង់ដា បានបង្កការភ្ញាក់ផ្អើលលើប្រព័ន្ធផ្សព្វផ្សាយទូទាំងតំបន់អាហ្រិ្វក កាលពីខែមុន ពេលលោកបានរៀបការជាមួយនារី ៣ នាក់ក្នុងពេលតែមួយ ពីព្រោះលោកគ្មានលទ្ធភាពរៀបចំពិធីដាច់ដោយឡែក។
លោក សាម៉ានដា ជាអ្នកលក់ម្ហូបម្ហារមកពីក្រុងកាតាប៊ី ក្នុងស្រុកវ៉ាគីសូ ប្រទេសអ៊ូហ្គង់ដា បានធ្វើឲ្យមហាជនស្រឡាំងកាំងពេលលោកបានបង្ហាញវត្ដមានក្នុងព្រះវិហារជាមួយភរិយា ៣ នាក់ ដោយពួកគេទាំងនោះគ្រងរ៉ូបពណ៌សទាំងអស់។ លោកបានប្រាប់អ្នកសារព័ត៌មានថា ភរិយារបស់លោកសុទ្ធតែបានដឹងថា លោកមិនមានធនធានច្រើននោះទេ តែស្ម័គ្រចិត្ដស្ម័គ្រកាយរួមរស់នឹងគ្នា។
បុរសមហាសំណាងរូបនេះ បាននិយាយថា៖ «ភរិយាខ្ញុំមិនចេះប្រចណ្ឌច្រណែនគ្នាឡើយ។ សំណាងល្អ ពួកគាត់សុទ្ធតែមានផ្ទះនៅរៀងៗខ្លួន ហើយខ្ញុំសន្យារថានឹងខិតខំធ្វើការងារចិញ្ចើមពួកគាត់»។
ភរិយារបស់លោកមានឈ្មោះ សាល់ម៉ាត់ ណាលូវូកហ្គេ អាយុ ៤៨ ឆ្នាំ ចេម៉េអូ ណាកាយីហ្សា អាយុ ២៧ ឆ្នាំ និង ម៉ាស្ដូឡះ ណាមវ៉ាន់ចេ អាយុ ២៤ ឆ្នាំ សុទ្ធតែបានបង្ហាញទឹកមុខរីករាយអំឡុងពេលរៀបការ។ គួរឲ្យចាប់អារម្មណ៍ ភរិយាវ័យ ៤៨ ឆ្នាំ បានរៀបការជាមួយលោក មូហាមេដ ២០ ឆ្នាំហើយ។ ដូច្នេះ អាពាហ៍ពិពាហ៍លើកនេះគ្រាន់តែពិធីមង្គលជាសាថ្មីប៉ុណ្ណោះ។ គូស្វាមីភរិយាទាំងពីរមានកូន ៥ នាក់រួចជាស្រេច។
សួរថាតើមង្គលការ ៣ ទល់នឹង ១ នេះ ភរិយាទីមួយមានអារម្មណ៍យ៉ាងដូចម្ដេច? អ្នកស្រី មូហាមេដ បានឆ្លើយថា៖ «ខ្ញុំអរគុណចំពោះស្វាមីដែលបានរៀបការជាមួយយើងព្រមគ្នា។ វាជាសញ្ញាបញ្ជាក់ថា គាត់នឹងមិនរើសអើស ឬលម្អៀងទៅរកនរណាម្នាក់ឡើយ»៕ HR