ភ្នំពេញៈ ក្រោមប្រធានបទថា «ការវិវត្តនៃវិស័យតន្ត្រីនៅកម្ពុជា និងអនាគត» ក្រុមតារាចម្រៀងប្រុសជារលកក្រោយៗនៃក្រុមតារាចម្រៀងអូរីជីណល បានបើកសម្ពោធចេញផ្សាយនូវអាល់ប៊ុមបទចម្រៀងដំបូងរបស់ខ្លួនឈ្មោះថា «I am Original,Stronger Together» នៅ Hard Rock Cafe Phnom Penh នៃអគារ Exchange Square ទីតាំងស្ថិតនៅខាងក្រោយស្ថានទូត អាមេរិក ប្រចាំនៅកម្ពុជា ក្នុងសង្កាត់វត្តភ្នំ ខណ្ឌដូនពេញ កាលពីល្ងាចថ្ងៃទី ៣០ ខែធ្នូ ឆ្នាំ ២០១៧ កន្លងមកនេះ។
អាល់ប៊ុមបទចម្រៀងដំបូងរបស់ក្រុមតារាចម្រៀងអូរីជីណល ដែលមានពាក្យស្លោករួមគ្នាមួយមានឈ្មោះថា «I am Original, StrongerTogether» នេះជាការសហការគ្នារវាងតារាចម្រៀងប្រុសស្រីចំនួន ១៣ រូប និងក្រុមអ្នកដឹកនាំវ័យក្មេងដ៏ប៉ិនប្រសប់ក្នុងការផលិត MV ចំនួន ១០ រូបផងដែរ ដើម្បីបង្កើតជាអាល់ប៊ុមចម្រៀងអូរីជីណល ឬបទចម្រៀងនិពន្ធខ្លួនដែលមិនចម្លងពីគេមានចំនួន ១០ បទនេះឡើង។
លោក ហង្ស សុខារ៉ួ ជាអ្នកគ្រប់គ្រងគម្រោងកម្មវិធី I am Original បានពន្យល់ពីគោលបំណងនៃកម្មវិធីនេះថា៖ «យើងចង់បង្កើតសហគមន៍មួយសម្រាប់ក្រុមតារាចម្រៀង ជាពិសេសក្រុមតារាចម្រៀងអូរីជីណល ឲ្យស្ថិតនៅក្នុងផ្នែកនៃឧស្សាហកម្មតន្ត្រី ខណៈក្រុមពួកគាត់មិនទាន់ទទួលបានការគ្រប់គ្រងច្បាស់លាស់ និងពេលខ្លះទៀតពួកគាត់មានបញ្ហាចម្រូងចម្រាសផ្នែកច្បាប់ណាមួយទៀតផង ហើយបញ្ហានេះ ពួកគាត់ម្នាក់ៗក៏មិនអាចដោះស្រាយតែឯងបានទេ គឺពួកគាត់ត្រូវការការគាំទ្រពីសហគមន៍របស់ពួកគាត់តែម្តង»។
លោក សុខារ៉ួ បន្តថា៖ «កម្មវិធី I am Original គឺជាមូលនិធិតន្ត្រីដំបូង ដែលមានគោលបំណងលើកស្ទួយ និងគាំទ្រអ្នកនិពន្ធ ផលិតករ និងតារាចម្រៀង ដែលបានខិតខំបង្កើតស្នាដៃថ្មីប្រកដោយគំនិតច្នៃប្រឌិត។ ម្យ៉ាងទៀតកម្មវិធីក៏ផ្តល់នូវជំនួយក្នុងការបណ្តុះបណ្តាលពួកគាត់ឲ្យធ្វើការងារសិល្បៈអស់ពីសមត្ថភាព ដើម្បីចូលរួមចំណែកនៅក្នុងវិស័យតន្ត្រីនៅកម្ពុជាឲ្យមានការរីកចម្រើនថែមមួយកម្រិតទៀតផងដែរ»។
លោក Sai តារាចម្រៀងអូរីជីណល ម្ចាស់បទ «Bae Friend» យល់ឃើញថា៖ «ខ្ញុំគិតថា កម្មវិធីនេះល្អ សម្រាប់ក្រុមតារាចម្រៀង អ្នកនិពន្ធបទចម្រៀង ដែលខិតខំតែងនិពន្ធបទថ្មីៗ មិនចម្លងពីបរទេស មានឱកាសអាចបង្ហាញនូវស្នាដៃរបស់ខ្លួនបាន។ នេះជាការបើកទំព័រថ្មីមួយនៅកម្ពុជាយើងឲ្យបានដឹងថា អ្វីទៅគឺជាបទចម្រៀងតែងនិពន្ធថ្មី ហើយថាតើវាមានសារៈសំខាន់យ៉ាងណា? តាមការសង្កេតរបស់ខ្ញុំ ឃើញថា មានយុវវ័យ និងប្រជាជនខ្មែរកាន់តែច្រើនចាប់ផ្តើមយល់ពីវិស័យចម្រៀងតែងនិពន្ធបទចម្រៀងបានដោយខ្លួនឯង ឬហៅថា បទអូរីជីណល និងចាប់ផ្តើមគាំទ្រចម្រៀងប្រភេទនេះផងដែរ»។
ចំពោះអាល់ប៊ុមបទចម្រៀងដំបូងមាន ១០ បទ ឈ្មោះថា «I am Original, Stronger Together» នោះមានតារាចម្រៀងប្រុសស្រីដូចជាលោក ម៉ា ច័ន្ទបញ្ញា អ្នកនាង អេដា លោក P-Sand លោក Sai កញ្ញា Nikkie Nikkie កញ្ញា រុន ស៊ីរ៉ា លោក វ៉ាន់ ចេស្តា កញ្ញា កៅ សុហ្វីយ៉ា (Sophia) តារាចម្រៀង Sivping Chong និងក្រុម Smallworld Smallband (ក្រុមមានសមាជិក ៤ នាក់ ស្រី ១ ប្រុស ៣) ខណៈបទចម្រៀង ១០ បទ នោះរួមមានដូចជាបទ «I wonder» បទ «Bae Friend» បទ«Middle Man» បទ«Single Trip» បទ «High like A Star» បទ «Please» បទ «The Heart of Cambodia » បទ« You Need To Stop» បទ «Bersen» និងបទ«Happiness»៕