ភ្នំពេញ: ទើបតែបានបង្ហាញភាពផ្អែមល្ហែមមុននេះ ស្រីស្រស់សោភាជាបុប្ផាកំពុងរីក នៅក្នុងពិភពសិល្បៈសម្ដែងភាពយន្តកញ្ញា គឹម ច័ន្ទបរមី ដែលមានគូស្នេហ៍ជាបុរសត្រកូលរាជសីហ៍ ដែលតែងតែរួមដំណើរជូនទៅដល់ទីកន្លែងថតកុន និងតាមផ្ដល់ការមើលថែទាំយកចិត្តទុកដាក់គ្រប់ទិសទីនោះ ក៏ស្រាប់តែលេចចេញនូវសារថ្មីបែកពីម្ចាស់បេះដូងមួយគ្រា ទាំងមាននូវក្តីអាឡោះអាល័យទៀតផង។
កញ្ញា គឹម ច័ន្ទបរមី បង្ហើរសារស្តែងពីអារម្មណ៍ខ្លួន នៅតាមបណ្តាញសង្គមអ៊ីនស្តាក្រាមឲ្យដឹងថា៖ «ជិតដល់ថ្ងៃពួកយើងត្រូវនៅឆ្ងាយពីគ្នាទៀតហើយ! ពេលពួកយើងរៀនចប់ យើងនឹងអាចនៅក្បែរគ្នាបែបនេះរហូត»។
តាមរយៈសារនេះ មហាជនក៏បានទាញយកការសន្និដ្ឋានថា ទំនងជាបុរសគូស្នេហ៍កញ្ញា គឹម ច័ន្ទបរមី លោក ហ៊ុន បញ្ញាបុត្រ ត្រូវបែកគ្នាពីនាងនាពេលថ្ងៃស្អែក ឬពីរបីថ្ងៃខាងមុខទៀតហើយ មើលទៅបានជាឃើញនាងសម្តែងនូវអារម្មណ៍អាឡោះអាល័យគ្នាអ៊ីចឹងនោះ?
បុប្ផាស្រស់សោភា សាច់សខ្ចីល្វក់ ដែលជាតារាសម្តែងទើបរះនៅលើវិថីសិល្បៈកញ្ញា គឹម ច័ន្ទបរមី ក៏បានបញ្ជាក់ប្រាប់ ភ្នំពេញ ប៉ុស្តិ៍ ថា៖ «អូ!តាមពិតទៅគឺពួកយើងដល់ពេលត្រូវចូលរៀនវិញរៀងៗខ្លួនហើយ ដោយគាត់ [បញ្ញាបុត្រ] នឹងត្រូវទៅប្រទេសអូស្ត្រាលីវិញ នៅខែក្រោយឯណោះ ខណៈនាងខ្ញុំក៏នឹងត្រូវចូលរៀនវិញ ដែរ។ ដូច្នេះហើយគឺពួកយើងត្រូវនៅឆ្ងាយពីគ្នាមួយរយៈ»។
រីឯអត្ថន័យនៃសាររបស់នាងដែលថា «នឹងអាចនៅក្បែរគ្នាបែបនេះរហូត» ដែលមហាជនអាចនឹងគិតថា ពួកគេទំនងជាមានផែនការជិតរៀបការនោះក៏ត្រូវបាន កញ្ញា គឹម ច័ន្ទបរមី ក៏បកស្រាយបន្ថែមថា៖ «អត់មានន័យអ៊ីចឹងទេ! គឺថា ពួកយើងនៅសល់ពេលវេលាជាច្រើនទៀត ត្រូវបញ្ចប់ការសិក្សា ដោយគាត់នៅសល់ ២ ឆ្នាំ ទៀត ចំណែកខ្ញុំវិញគឺនៅសល់ ៣ ឆ្នាំទៀតឯណោះ។ តែដោយសារពួកយើងនៅជួបគ្នាមួយរយៈនេះ មានអនុស្សាវរីយ៍ច្រើនទើបមានការអាឡោះអាល័យគ្នាពេលជិតដល់ពេលត្រូវបែកគ្នា»។
ថ្មីៗនេះនាងក៏បង្ហាញពីចេតនាថា សម្ព័ន្ធភាពស្នេហារវាងនាង និងសង្សារបណ្តូលចិត្ត លោក ហ៊ុន បញ្ញា បុត្រ ត្រូវជាចៅបងប្រុសលោកនាយករដ្ឋមន្ត្រីកាន់តែមានផលផ្លែផ្កាវិជ្ជមាននោះក៏រំលេចជារូបភាពថើបថ្ពាល់របស់គូស្នេហ៍នាងទាំងមានបន្សល់ទុកស្នាមក្រែមមាត់ និងបង្ហោះតាមបណ្តាញសង្គមបង្កការភ្ញាក់ផ្អើលជាថ្មី ដោយមិនបានវាចាអ្វីឡើយ តែបង្កប់ន័យជ្រៅពីសេចក្តីស្រឡាញ់លើគូស្នេហ៍។
នាពេលកន្លងមកកញ្ញា គឹម ច័ន្ទបរមី ក៏ធ្លាប់បង្ហោះរូបមួយសន្លឹកដៃកាន់ដាវសាមូរ៉ៃបង្ហើរសារបែបគំរាមអ្នកលូកថ្លើមដណ្ដើមម្ចាស់ស្នេហ៍នាងបង្កការភ្ញាក់ផ្អើលនៅតាមបណ្តាញសង្គម។ តែស្រីស្រស់ បរមី ក៏ធ្លាប់ បានបញ្ជាក់ប្រាប់ថា នាងអត់មានគិតថាគំរាមអ្នកណាទេ ហើយក៏មិនអាចធ្វើបែបនោះបានដែរ៕