ភ្នំពេញៈ ក្រោមប្រធានបទកម្រងស្នាដៃសិល្បៈអាស៊ីមានឈ្មោះថា Lumiere d''Asie ឬ Light of Asia វិចិត្របារាំងលោក Alias2.0 កំពុងតែបាននាំមកបង្ហាញទស្សនិកជនខ្មែរឲ្យស្គាល់នូវបច្ចេកទេសថ្មី ប្រើពន្លឺភ្លើងបញ្ចាំងទៅលើផ្ទាំងគំនូរ ដែលមានពណ៌ចម្រុះ និងវាអាចរត់បត់បែនទៅតាមសណ្ឋាននៃស្នាដៃសិល្បៈគំនូររបស់វិចិត្រករហៅថា Light-painting នៅវិចិត្រសាលផ្ទះ មេត្តា ដែលបើកសម្ពោធកាលពីចុងសប្តាហ៍កន្លងមកនេះ។ការតាំងបង្ហាញនេះនឹង បើកចាប់ពីម៉ោង ៦ ល្ងាច នៅឯផ្ទះមេត្តា ជាន់ទី ១ ដោយទស្សនិកជនអាចចូលទៅទស្សនា និងអាចស្តាប់តន្ត្រីយ៉ាងពីរោះបានទៀតផង។
បច្ចេកទេសថ្មី ប្រើពន្លឺភ្លើងបញ្ចាំងទៅលើផ្ទាំងគំនូរ Light-painting ត្រូវបានលោក Alias2.0 ដែលជា វិចិត្របារាំង បានពន្យល់ថា៖ «វាជាបច្ចេកទេសមួយដែលយើងបានប្រើខ្មៅដៃ ឬជក់ គូសវាស ឬសរសេរជាសញ្ញាណបែបដូចជាគូរគំនូរ និងប្រើបច្ចេកទេសបំប្លែងរូបភាពបានយូរ ឬ long exposure ដែលវាអាចចេញជាពន្លឺលឿន ឬយឺតវាអាស្រ័យតាមការបង្កើតគម្រោងនៃបណ្តាញគន្លងពន្លឺភ្ជាប់នឹងគំនូរ ដែលបានប្រើខ្មៅដៃ ឬជក់គូសនោះ»។
លោក Alias2.0 បន្តថា៖ «បច្ចុប្បន្នបច្ចេកទេសប្រើពន្លឺបាញ់ទៅលើកម្រងស្នាដៃគំនូរនេះ វាមានប្រជាប្រិយខ្លាំងណាស់នៅតំបន់អាស៊ីអាគ្នេយ៍ ដោយសារពេលចាំងពន្លឺទៅវាមានរូបរាងស្អាតខ្លាំងណាស់ចំពោះស្នាដៃគំនូរនានារបស់វិចិត្រយើង។ នាពេលប៉ុន្មានឆ្នាំចុងក្រោយនេះ វាមានប្រជាប្រិយនៅក្នុងប្រទេសថៃ ឡាវ ហ្វីលីពីន ឥណ្ឌូនេស៊ី វៀតណាម សិង្ហបុរី និងប្រទេសកម្ពុជា ផងដែរ»។
គួរបញ្ជាក់ថា Alias2.0 ជាវិចិត្រករជាតិបារាំង កើតនៅឆ្នាំ ១៩៨៩ មានអាជីពជាវិចិត្រករ ខណៈលោកក៏ជាវិចិត្រករគំនូរតាមជញ្ជាំង ឬរបងផ្លូវផងដែរ ហើយពេលនេះលោក ក៏បាននាំយកមកនូវទម្រង់ជាសិល្បៈវិចិត្រកម្មថ្មីឈ្មោះ Light-painting មកបង្ហាញនៅកម្ពុជាផងដែរ ចាប់តាំងពីឆ្នាំ ២០១៦ មកហើយលោកធ្លាប់នាំយកការពិព័រណ៍ Light of Asia ទៅបង្ហាញនៅតាមបណ្តាប្រទេសនានានៅអាស៊ីអាគ្នេយ៍តាំងពីឆ្នាំ ២០១៥ មកម្ល៉េះ។ លោកចាប់អាជីពជាវិចិត្រករតាំងពីឆ្នាំ ២០០៨ មក ៕