Search form

Login - Register | FOLLOW US ON

Logo of Phnom Penh Post newspaper Phnom Penh Post - ចនច័ន្ទ និង ស្វែង សុជាតា បណ្តើរ​គ្នា​ទៅ​វត្ត​ក្រោយ​ផ្ទុះ​រឿង​អន់ចិត្ត

Content image - Phnom Penh Post
អ្នកនាង ចន ច័ន្ទលក្ខិណា និង​អ្នកនាង ស្វែង សុជាតា ព្រមទាំង​កូន​ប្រុស​។ វុទ្ធី

ចនច័ន្ទ និង ស្វែង សុជាតា បណ្តើរ​គ្នា​ទៅ​វត្ត​ក្រោយ​ផ្ទុះ​រឿង​អន់ចិត្ត

ភ្នំពេញ: ព្រមនឹង​ដំណើរ​សស្រាក់​សស្រាំ​អស់​ពុទ្ធសាសនិក​ខ្មែរ​នា​ឱកាស​បុណ្យ​ភ្ជុំបិណ្ឌ​នេះ នៅ​ថ្ងៃ​ដាក់​បិណ្ឌ​ទី ៨ ត្រូវ​នឹង​ថ្ងៃទី ១៣ ខែ​កញ្ញា​នេះ​សមាគម​សិល្បករ​ខ្មែរ​ក៏បាន​កៀរគរ​សិល្បករ​សិល្បការិនី សំភី​ស្កាត់​ពី​ភ្នំពេញ​យក​ចង្ហាន់​ទៅ​ប្រគេន​ព្រះសង្ឃ​នៅ​វត្ត​ប្រាសាទ ទឹកដី​រមណីយដ្ឋាន​ភ្នំ​ប្រសិទិ៍្ធ ក្នុង​ន័យ​បង្ហាញ​ពី​សាមគ្គី​ភាពជា​អ្នករួម​អាជីព​លើ​ថ្នាល​សិល្បៈ​តែមួយ។

អ្វីដែល​ត្រូវបាន​មជ្ឈដ្ឋាន​មហាជន​ដាក់ការ​តាមដាន​នោះ គឺ​វត្តមាន​តារា​សម្តែង​ស្វែង សុជាតា ដែល​មុននេះ​ល្បី​ធ្លាប់​ផ្ទុះការ​ថ្នាំង​ថ្នាក់​ចិត្តគ្នា​នឹង​ប្រធាន​សមាគម​សិល្បករ​ខ្មែរ។

ដំណើរ​ដឹកនាំ​សិល្បករ​សិល្បការិនី​យក​ចង្ហាន់​ទៅ​ប្រគេន​ព្រះសង្ឃ​នៅទី​អារាម វត្ត​ប្រាសាទ​នា​ថ្ងៃ​ដាក់​បិណ្ឌ​ទី ៨ ដែល​ដឹកនាំ​ដោយ​ប្រធាន​សមាគម​សិល្បករ អ្នកនាង ចន ច័ន្ទលក្ខិណា នោះ មិនសូវ​ឃើញ​មាន​វត្តមាន​តារា​ល្បីៗ​រួម​ដំណើរ​ច្រើន​ប៉ុន្មាន​នោះ​ឡើយ។

ក្រៅពី​វត្តមាន​លោក អ៊ឹម ជីវ៉ា លោក គន់​រៀម​រតនៈ លោក កុយ ស៊ីឌឿន លោក ថុង សារិទ្ធ លោក មួន ម៉ារ៉ា លោក ម៉ារ៉ាដូណា កញ្ញា ពេជ្រ អាវីហ្សា កញ្ញា ឌួង ហ្សូរីដា លោក អាឡាស្កូ អ្នកនាង ស្វែង សុជាតា និង​នាយ​ឃ្លោក ជាដើម​នោះ។

បង្ហាញ​ពីការ​អវត្តមាន​តារា​ស្និទ្ធៗ​និង​សមាគម​ជាច្រើន​នោះ​ត្រូវបាន​អ្នកនាង ចន ច័ន្ទលក្ខិណា ប្រាប់​ឲ្យដឹង​ថា៖ «យើង​គ្រោង​មក​វត្ត​ប្រាសាទ​នេះ​ក៏យើង​មិន​បាន​ដាក់​គម្រោង​យូរ​ដែរ​គិត ១ ថ្ងៃ​ក៏មក​អ៊ីចឹង​តារា​សិល្បៈ​ភាគ​ច្រើន​គាត់​រវល់ គាត់​មិន​បាន​រួម​ដំណើរ​មក​ទេ ។ ពួកគាត់​ម្យ៉ាង​ទៀត​មុន​សម្រាក​បុណ្យ​អ៊ីចឹង​គាត់​សម្រុក​ធ្វើ​ការងារ​ច្រើន​ទើប​គាត់​មិនសូវ​មាន​ពេល​ទំនេរ»។

អ្នកនាង ចន ច័ន្ទលក្ខិណា ជា​តារា​សម្តែង​ល្បី​ហើយ​ក៏កំពុង​គ្រង​តំណែង​ជា​ប្រធាន​សមាគម​ចំនួន​ពីរ​ក្នុងដៃ​មាន​សមាគម​មិត្ត​សិល្បៈ​ស្ម័គ្រចិត្ត​ដើម្បី​ជួយ​សង្គម​នឹង​សមាគម​សិល្បករ​ខ្មែរ អ្នកនាង បាន​ប្រាប់​បន្តថា៖ «ការមក​ធ្វើបុណ្យ​នៅ​វត្ត​ប្រាសាទ​ថ្ងៃ​ដាក់​បិណ្ឌ​ទី ៨ ហើយ​វត្ត​នេះ​ក៏​សម្បូរ​អ្នក​មាន​មក​ធ្វើបុណ្យ​នោះ មិនមែន​យើង​មក​តាមរយៈ​ខ្សែ​ទេ​គឺយើង​មាន​គោលដៅ​ទីវ​ត្ត​នេះ យើង​អ្នកសិល្បៈ​ញឹកញាប់​មក​ថត​ចម្រៀង​ថត​រឿង​នៅ​វត្ត​ដ៏ល្បី​មួយ​នេះ​ហើយ​យើង​មក​ធ្វើ​បុណ្យ​ទីនេះ​ក៏ល្អ​ដែរ ហើយ​មួយ​ទៀត​ដោយសារ​សមាគម​ក៏បាន​រៀបចំ​នូវ​អំណោយ​មូលនិធិ​សិល្បៈ​ចាស់ជរា​យក​មក​ចែក​សិល្បៈ​ចាស់ជរា​នៅ​ទីនេះ​ចំនួន ៦ នាក់​ផង ទើប​យើង​ចាំបាច់​មក​ដាក់បិណ្ឌ​នៅ​វត្ត​ប្រាសាទ​ថ្ងៃ​ដាក់​បិណ្ឌ ៨ នេះ​តែម្តង​ទៅ»។

ថែម​លើការ​រៀបរាប់​នេះ​អ្នកនាង ចន ច័ន្ទលក្ខិណា ដែល​បង្ហាញ​សកម្មភាព​សិទ្ធស្នាល​នឹង​អ្នកនាង ស្វែង សុជាតា ប្រាស​ចាក ពីការ​ល្បី​ថា តារា​ទាំងពី​មាន​ភាព​ល្អក់​កករ​នឹង​គ្នា​នោះ អ្នកនាង ក៏បាន​បកស្រាយ​ថា៖ «កន្លង​មក​គេ​ល្បី​ថា សមាគម និង​បង ស្វែង សុជាតា មានការ​អាក់អន់​ចិត្ត​នឹងគ្នា តែ​ថ្ងៃនេះ​គាត់​បាន​មក​ចូលរួម​ដាក់​បិណ្ឌ​ជាមួយ​សមាគម»។

អ្នកនាង​បញ្ជាក់​ថា៖ «ការពិត​វាគ្មាន​អ្វីទេ អ្នកសិល្បៈ​តែមួយ​រឿង​គេ​ល្បី​ចេះតែ​ល្បី​ចំណែក​សាមី​ខ្លួនគេ​ធម្មតា​នឹង​គ្នា»។

អ្នកនាង ស្វែង សុជាតា ដែល​នាំ​ទាំង​ស្វាមី​គ្រូឱសថ​បុរាណ​វ័យក្មេង​និង​កូនប្រុស​តូច​រួម​តំណក់​ឈាម​ស្វាមី​នេះ​ទៅ​ផង អ្នកនាង​បាន​បញ្ជាក់​ប្រាប់​ថា៖ «គ្មានអ្វី​ដូចគេ​ល្បី​ទេ។ រាល់ដង យើង​ជួបគ្នា​សប្បាយ​រីករាយ​ដាក់គ្នា ហើយ​ថ្ងៃនេះ​យើង​បាន​មក​ធ្វើបុណ្យ​រួមគ្នា​បង្ហាញ​យ៉ាង​ច្បាស់​ថា​យើង​មិនមាន​បញ្ហា​អ្វី​នឹង​គ្នា​ដូចគេ​ល្បី​នោះ​ឡើយ»៕

0

Comments

Please, login or register to post a comment