ក្រុងឌូបៃ: ឆ្នាំនេះ ក្រុងឌូបៃមិនមានការបាញ់កាំជ្រួចស្វាគមន៍ពិធីបុណ្យឆ្លងឆ្នាំនោះទេ ដោយសារតែក្ដីកង្វល់ចំពោះសុវត្ថិភាព ដោយទីក្រុងរបស់ប្រទេសអារ៉ាប់រួមមួយនេះបានជ្រើសរើសយកវិធីលេងភ្លើងពណ៌គ្រងកំណត់ត្រាពិភពលោកថ្មីលើអគារខ្ពស់បំផុតក្នុងលោក Burj Khalifa។
កាលពី ២ ឆ្នាំមុន ក្រុងឌូបៃ បង្កនូវចលាចលស្លន់ស្លោពេលអគ្គិភ័យធំមួយបានឆាបឆេះសណ្ឋាគារប្រណីតមួយរយៈពេលប៉ុន្មានម៉ោងមុនពេលការបាញ់កាំជ្រួចអបអរឆ្នាំថ្មី។ ឆ្នាំថ្មី ២០១៨ អគារខ្ពស់បំផុតក្នុងលោកត្រូវបានរចនាជា «ឆ្នាំហ្សាយ៉េដ» ដែលជាអតីតនាយករដ្ឋមន្ដ្រីអេមីរ៉ាតអារ៉ាប់រួម ដើម្បីស្វាគមន៍ឆ្នាំថ្មី។
Emaar Properties ជាក្រុមហ៊ុនអចលនទ្រព្យនៃអគារតំណាងជាតិនេះ បានប្រកាសលើវេបសាយខ្លួនថា ពិធីបាញ់កាំជ្រួចត្រូវបានជំនួសដោយពន្លឺភ្លើងឡាស៊ែរ និងប្រព័ន្ធសោតទស្សន៍ក្រោមប្រធានបទ «Light Up 2018»។
ពួកគេបានអះអាងថា អ្នកជំនាញជាង ៣០០ នាក់ និងឯកទេសឡើងខ្សែពួរ ១០០ នាក់បានធ្វើកិច្ចការតុបតែងអគារដ៏ខ្ពស់បំផុតនេះរយៈពេល ៧ ខែដើម្បីរៀបចំពន្លឺភ្លើងដ៏អស្ចារ្យនេះ។
ការបង្ហាញពន្លឺភ្លើងពណ៌ស្វាគមន៍ឆ្នាំថ្មីនេះ មានរយៈពេល ១០ នាទី និងធ្វើឲ្យមហាជនទទួលបាននូវភាពភ្ញាក់ផ្អើលដោយនាំគ្នាឈរថតរូប វីដេអូ និងស្រែកអបអរឆ្នាំថ្មី។
កាលពីឆ្នាំ ២០១៥ ពិធីបាញ់កាំជ្រួចបានជួបនូវឧប្បត្ដិហេតុអាក្រក់កើតឡើង ដោយអគ្គិភ័យបានឆាបឆេះចេញពីអគារជាន់ទី ៤០ នៃសណ្ឋាគារប្រណីត Address Downtown ៦៣ ជាន់៕
HR