.jpg)
កញ្ញា ណូម័រ បង្ហាញសំណង់ផ្ទះល្វែងដែលនាងទិញទុកឲ្យម្ដាយនាងជួលរកកម្រៃ។ រូបថត ហ្វេសប៊ុក
ភ្នំពេញ: កាលពីថ្ងៃទី ១៤ កុម្ភៈ ដែលជាថ្ងៃជាតិសាសន៍អីរ៉ុប ហៅថា ទិវានៃក្តីស្រឡាញ់ កំពុងត្រូវបានស្វាគមន៍ពីប្រជាជាតិអាស៊ីរួមទាំងប្រជាជាតិខ្មែរផង តោងមកប្តូរទម្លាប់ពីអ្នកស្នងមរតកដូនតាស្រគត់ស្រគំ យកថ្ងៃនេះមកធ្វើជាថ្ងៃបង្អួតគ្នាពីជំនូនលាភនៃសម្ភារនិយម និងកាដូជាថ្នូរនៃក្តីស្រឡាញ់ពីមនុស្សជាទីស្រឡាញ់ រំពេចនោះដែរតារាសម្តែង និងពិធីការិនីរាងតូចច្រឡឹង ទើបនឹងស្ងប់វីដេអូអាស្រូវដណ្តើមប្តីគេ កញ្ញា ណូម័រ ក៏ញ៉ាំងឲ្យមហាជនលាន់មាត់ភ្ញាក់ផ្អើល លើរូបភាពបង្អួតផ្ទះល្វែងថ្មី តម្លៃច្រើនម៉ឺនដុល្លារលើគណនីហ្វេសប៊ុករបស់ខ្លួន។
ចូលដល់ឆ្នាំ ២០១៨ ពិធីការិនី អន រ៉ាស៊ីសុមេត្តា ហៅ ណូម័រ ថែមពីការកាក់កប ក្នុងអាជីពសិល្បៈ ជាតារាសម្តែង រួមនឹងការងារជាពិធីការិនី និងជាលក់ខោអាវ ៣ តូប នៅផ្សារទួលគោក។ លើសពីនេះ នាងបានទិញផ្ទះល្វែងកូនកាត់ជូនដល់ម្តាយចំថ្ងៃបុណ្យនៃក្តីស្រឡាញ់។
ប៉ុន្តែការបង្អួតសំណង់ផ្ទះល្វែងដ៏ប្រណីត ក្រោមសម្តីអះអាងពីកញ្ញា ណូម័រ ថា នាងបានទិញផ្ទះថ្មីឲ្យម្តាយ សម្រាប់កាដូ សម្រាប់ថ្ងៃនៃក្តីស្រឡាញ់នោះ ក៏ជាសារមួយរំឭកដល់មហាជនអំពីភាពអាម៉ាស់កើតឡើងចំពោះរូបនាងដោយសារការភាន់ច្រឡំ ជុំវិញវីដេអូរឿងអាស្រូវ បង្ហាញពីកាយវិការឆ្គងនឹងឥរិយាបថស្ត្រីខ្មែរ។
មុននោះបន្តិចក៏មានផ្ទុះព័ត៌មានតាមរយៈវីដេអូដែលថា ស្រីស្រស់តូចច្រឡឹង ណូម័រដណ្តើមប្តីគេ ធ្វើឲ្យស្ត្រីដូចគ្នារងនូវទឹកភ្នែក។
ក្នុងនោះដែរ ក៏មានមជ្ឈដ្ឋានជាច្រើននាំគ្នាតំណាល ពីសំណង់ផ្ទះល្វែង ដែលណូម័របង្អួតលើបណ្តាញសង្គម ជាមួយការអះអាងថា កាដូជូនម្តាយថ្ងៃនៃក្តីស្រឡាញ់នោះ ក៏ជាកាដូ ណូម័រ ទទួលបានពីម្ចាស់ស្នេហ៍មានចំណង ៥ ប្រការរួចហើយនោះដែរ។
រំឭកពីសារ ណូម័រ បង្ហាញភ្ជាប់ និងរូបសំណង់ផ្ទះដ៏ស្កឹមស្កៃ ដែលនាង ឈរជាមួយម្តាយ បង្ហាញពីស្នាមញញឹមពព្រាយនោះ នាងបានបរិយាយថា៖ «អូនសុខចិត្តលះបង់ការធ្វើច្រមុះ ដើម្បីយកលុយមកបង្គ្រប់ទិញផ្ទះមួយល្វែងទៀត ជាកាដូថ្ងៃបុណ្យនៃសេចក្តីស្រឡាញ់ជូនអ្នកម្តាយ គ្រាន់ឲ្យអ្នកម្តាយដាក់ជួលបានកម្រៃ ៤០០ ដុល្លារ ទៅ ៥០០ ដុល្លារ ក្នុងមួយខែរបស់គាត់ដែរ»។
ក្នុងនោះ ណូម័រ បានបន្តសរសេរថា៖ «សូមអ្នកម្តាយចាំថា ទោះគ្មានថ្ងៃបុណ្យនៃសេចក្តីស្រឡាញ់ក៏សេចក្តីគោរពអាណិតស្រឡាញ់របស់កូនតែងមានចំពោះអ្នកម្តាយគ្រប់វិនាទី Surprised Gift Valentine''s Day for My everything Mak Keo I LOVE YOU (ភ្នំពេញថ្ងៃទី ១៣/១៤ ខែកុម្ភៈ ឆ្នាំ ២០១៨ ទឹកចិត្តកូនស្រីចំពោះអ្នកម្តាយ)»។
កញ្ញា ណូម័រ បានឲ្យដឹងថា៖ «ផ្ទះមួយល្វែងដែលទិញឲ្យម្តាយនោះ ស្ថិតនៅទីតាំងចំការដូង ដែលខ្ញុំទើបទិញកាលពីថ្ងៃទី ១៣ កុម្ភៈនេះ ទុកជាកាដូជូនម្តាយថ្ងៃទី ១៤ កុម្ភៈ»។
កញ្ញាបានបង្ហាញថា៖ «ផ្ទះនេះ មានតម្លៃជាង ៦ម៉ឺនដុល្លារ ដែលជាថវិកាខ្ញុំសន្សំបានពីសិល្បៈ និងលក់ខោអាវ តែប៉ុណ្ណោះ»។
នាងក៏បានបញ្ជាក់ថា៖ «ដូចដែលខ្ញុំបង្ហាញនៅលើបណ្តាញសង្គម ខ្ញុំសុខចិត្តលះបង់ការកែសម្ផស្សធ្វើច្រមុះ សន្សំលុយទុកទិញផ្ទះឲ្យម៉ែ ដែលលុយនេះគឺពិតជាបានពីការសន្សំ ពីការងារសិល្បៈ និងរបររកស៊ីលក់ផលិតផលលើអនឡាញពិត»។
ក្នុងនោះដែរ ណូម័រ បកស្រាយថា៖ «ចំពោះរឿងល្បីខ្ញុំដណ្តើមប្តីនោះ គឺគ្រាន់តែវីដេអូ សម្តែង និងដើម្បីអប់រំសង្គមទេ វាមិនមែនការពិត ហើយខ្ញុំក៏មិនប្រព្រឹត្តរឿងបែបនេះដែរសម្រាប់ខាងក្រៅវីដេអូនោះ»៕
