.jpg)
ទម្រង់សិល្បៈបុរាណខ្មែរការសម្តែងរបាំអប្សរា នឹងមានសម្តែងនៅសូរិយាជាន់ទី ៤។ រូប សហការី
ភ្នំពេញៈ ដោយសារតែចង់ឲ្យមានការផ្សព្វផ្សាយបន្ថែមពីទម្រង់សិល្បៈបុរាណខ្មែរ ដើម្បីចែកជូនដល់ទាំងភ្ញៀវទេសចរជាតិ និងអន្តរជាតិ នាពេលមកកាន់ផ្សារទំនើបសូរិយា ដែលទើបតែបានធ្វើកំណែទម្រង់រចនា និងសោភ័ណភាពថ្មីនោះ ក៏បានសម្រេចបញ្ចូលនូវការសម្តែងសិល្បៈទាំងនេះ ប្រចាំរៀងរាល់ថ្ងៃសៅរ៍តែម្តង គឺចូលទស្សនាដោយសេរីឥតគិតថ្លៃ ក្រោមពាក្យស្លោកថា «វប្បធម៌ជាព្រលឹងជាតិ» ចាប់ពីល្ងាចថ្ងៃសៅរ៍ ទី ២០ ខែមករា ឆ្នាំ ២០១៨ តទៅ។
លោក ធៀម ពេជ្រវិសាល ជានាយកផ្នែកទីផ្សារនៃផ្សារទំនើបសូរិយា បានឲ្យដឹងពីគោលបំណងនៃការដាក់សម្តែងនូវទម្រង់សិល្បៈខ្មែរបុរាណនានានៅឯជាន់ទី ៤ នៃផ្សារនេះថា៖ «ដោយសារផ្សារថ្មីៗនេះយើងបានធ្វើការកែទម្រង់ខ្លះនៃផ្សាររបស់យើងនៅជាន់ទី ៤ ហើយយើងក៏បានដាក់ឈ្មោះជាន់នេះថា ផ្សារទេសចរណ៍ របស់ផ្សារទំនើបសូរិយា សេនធ័រ ភ័នធ៍ (SORYA Center Point) គឺអតីតជាផ្សារទំនើបសូរិយា។
ទិដ្ឋភាពរចនាថ្មីនៅសូរិយាជាន់ទី ៤ (ផ្សារទេសចរណ៍)។ រូប សហការី
យើងយល់ឃើញថា ទម្រង់សិល្បៈបុរាណខ្មែរ នាពេល បច្ចុប្បន្ននេះគឺមានការធ្លាក់ចុះ ហើយក្មេងៗខ្មែរជំនាន់ក្រោយក៏មិនសូវបានស្គាល់ពីទម្រង់សិល្បៈបុរាណទាំងនោះទៀត ទើបយើងសម្រេចចិត្តដាក់ឲ្យមានការសម្តែងនូវសិល្បៈទាំងនេះនៅជាន់ទី ៤»។
នាយកផ្នែកទីផ្សារនៃផ្សារទំនើបសូរិយា រូបនេះ ក៏បានបន្តឲ្យដឹងពីគម្រោងនៃការសម្តែងទម្រង់សិល្បៈបុរាណនានា និងពេលវេលានៃការសម្តែងនោះដែរថា៖ «យើងគ្រាន់តែរៀបចំជាការសម្តែងបែបខ្នាតតូចតែប៉ុណ្ណោះ តែមានកម្រិតស្តង់ដារដូចជាខ្នាតធំដែរ សម្រាប់ការសម្តែងនូវសិល្បៈទាំងអស់នោះ ហើយយើងមានកន្លែងដ៏សមសួន សម្រាប់ក្រុមសិល្បករ-សិល្បការិនីសម្តែងដែរ ព្រោះថាកន្លែងយើងជាបរិវេណផ្សារ មិនមែនជាសាលសម្រាប់ការសម្តែងនូវសិល្បៈនោះឡើយ។
ចំពោះការសម្តែងរាងរាល់ល្ងាចថ្ងៃសៅរ៍នោះ ក៏មានការរៀបចំជាឈុតឆាក ឬទម្រង់សិល្បៈផ្សេងៗគ្នាដើម្បីសម្តែងបន្តបន្ទាប់។ ជាពិសេសយើងមានការប្រឹក្សា ជាមុនជាមួយនឹងសាស្ត្រាចារ្យជំនាញសិល្បៈនៃទម្រង់នីមួយៗ ឬក្រុមចាស់ព្រឹទ្ធាចារ្យជំនាញផងដែរ មុននឹងលើកយកនូវឈុតឆាកណាមួយមកសម្តែងដើម្បីជាផ្ទាំងទស្សនីយភាពនានាចែកជូនទស្សនិកជន ដែលជាភ្ញៀវទាំងជាតិ និងអន្តរជាតិ នៅផ្សារទំនើបសូរិយា»៕
