.jpg)
ទិដ្ឋភាពពីមហោស្រពភាពយន្តអន្តរជាតិកម្ពុជា នៅសាលចតុមុខ កាលពីឆ្នាំមុន។ កែវ រតនា
ភ្នំពេញ: មហោស្រពភាពយន្តអន្តរជាតិកម្ពុជា ឆ្នាំទី ៨ បានវិលត្រឡប់មកវិញនៅដើមខែមីនា ជាមួយខ្សែភាពយន្ត ១៣០ រឿង ដែលនឹងត្រូវចាក់បញ្ចាំង ៦ ថ្ងៃ ជាមួយវត្តមានផលិតករភាពយន្ត ៧០ នាក់មកពី ១៦ ប្រទេស។
ពីថ្ងៃទី ៥ ខែមីនា ភាពយន្តទាំងនេះនឹងត្រូវបានបញ្ចាំងនៅ ១០ ទីតាំង ដោយអ្នកមកមុននឹងទទួលបានការទស្សនាឥតគិតថ្លៃ រីឯអ្នកក្រោយត្រូវជាវសំបុត្រ ៥០០០ រៀល។
ថ្វីដ្បិតតែឆ្នាំនេះចំនួនខ្សែភាពយន្តមិនច្រើនដូចឆ្នាំមុន តែអ្វីដែលប្រិយមិត្តមិនគួររំលងមានដូចជារឿង Surviving Bokator ស្ដីពីគុនល្បុក្កតោ ជាភាពយន្តឯកសារប្រើពេលផលិត ៥ ឆ្នាំ ដោយក្រុមការងារជនជាតិកាណាដា។
ខ្សែភាពយន្តឯកសាររឿង អង្គការ ជាស្នាដៃដឹកនាំឲ្យ អ្នកនាង Neary Adeline Hay និយាយពីជីវិតការវិលត្រឡប់របស់ឪពុកនាងមកកម្ពុជាលើកទី ១ ក្រោយពីរបបខ្មែរក្រហមដួលរលំ។
ខ្សែភាពយន្តរឿង ពុទ្ធិសែន នាងកង្រី វណ្ណកម្មរបស់លោក លី ប៊ុនយីម ពីទសវត្សរ៍ឆ្នាំ ១៩៦០ ក៏នឹងត្រូវចាក់បញ្ចាំងក្នុងមហោស្រពនេះផងដែរ។
ថ្លែងក្នុងសន្និសីទសារព័ត៌មានសប្ដាហ៍មុន លោក សុខ សុង អនុប្រធាននាយកដ្ឋានសិល្បៈភាពយន្តបានឲ្យដឹងថា ព្រឹត្តិការណ៍នេះអាចជាឱកាសបង្ហាញកម្ពុជាជាទីតាំងផលិតភាពយន្តដ៏មានសក្ដានុពល។
តារាហូលីវូដបារាំង-ខ្មែរ អេឡូឌី យឹង។ AFP
លោកបន្តទៀតថា៖ «ពេលមានមហោស្រពភាពយន្តនៅកម្ពុជាយើង ទី ១ អាចចែករំលែក និងផ្លាស់ប្ដូរវប្បធម៌ជាមួយភ្ញៀវបរទេស ក៏ដូចជាបង្ហាញពីភាពរុងរឿងនៃជាតិសាសន៍របស់យើងផងដែរ»។
នាយកមហោស្រព និងជាប្រធានគណៈកម្មការភាពយន្តកម្ពុជា លោក ស្រេឌីក អ៊ីឡយ (Cedric Eloy) ក៏ប្រកាសផងដែរថា តារាហូលីវូដកូនកាត់បារាំង-ខ្មែរ អេឡូឌី យឹង (Elodie Yung) នឹងដើរតួនាទីជាគណៈកម្មការកិត្តិយសនៃមហោស្រពភាពយន្តអន្តរជាតិកម្ពុជា ដោយអ្នកនាង នឹងថ្លែងសារពីចម្ងាយនៅរាត្រីបើកកម្មវិធីថ្ងៃទី ៨ មីនា។
តារាហូលីវូដដើមកំណើតខ្មែរវ័យ ៣៧ ឆ្នាំ ដែលត្រូវបានគេស្គាល់តាមរយៈភាពយន្តរឿង Daredevil,The Defenders និង Gods of Egypt នោះ អ្នកនាងបានសង្កត់ធ្ងន់លើទំហំនៃខ្សែភាពយន្ត និងបេសកកម្មក្នុងការលើកកម្ពស់វិស័យភាពយន្តកម្ពុជាទៅកាន់ទស្សនិកជន ក្នុងវិសាលភាពធំទូលាយ។ ចំណូលចិត្តទស្សនិកជនគ្រប់គ្នាគួរតែត្រូវបានគិតគូរក្នុងដំណើរការផលិត។
អ្នកនាង អេឡូឌី យឹង បានថ្លែងថា៖ «គ្រប់គ្នាមិនអាចចូលចិត្តមើលភាពយន្តមួយរឿងដូចគ្នាទេ។ យើងមានខ្សែភាពយន្តប្រភេទខុសៗគ្នាតម្រូវគ្រប់រសជាតិ នៅមហោស្រពភាពយន្តនេះ»៕ \
James Reddick and Ouk Suntharoth
