.jpg)
លោក សាន ផានិត ប្រកាសសារចាប់បានដៃគូរកស៊ីអន្តរជាតិធំនៅដើមឆ្នាំថ្មី។ ហ្វេសប៊ុក
ភ្នំពេញៈ ចាប់តាំងពីម្ចាស់បទ «ទូរស័ព្ទប្រាប់ផង» បានសម្រេចចិត្តរៀបការនឹងភរិយាជាទីស្រឡាញ់ឈ្មោះ ចេវ សោភា ជាកូនចៅអ្នកនៅក្រុងតាខ្មៅកាលពីឆ្នាំ ២០១៤ មក តារាចម្រៀងមិនសូវសម្បូរសក់លោក សាន ផានិត ហាក់ដូចជាស្ងប់រឿងអាស្រូវ ហើយបែរជាសម្បូរដោយរឿងល្អៗសម្រាប់ស្តារកេរ្តិ៍ឈ្មោះលើវិថីសិល្បៈវិញដោយសន្សឹមៗ ហើយកំពុងតែចាប់បាននូវដៃគូរកស៊ីធំក្រៅប្រទេសទៀតផងនាដើមឆ្នាំថ្មីនេះ។
នេះបើតាមសាររបស់តារាចម្រៀងប្រុសអូរីជីណលដែលធ្លាប់មានឈ្មោះបោះសំឡេងខ្លាំងពីប្រិយមិត្តអ្នកស្តាប់កាលពីអំឡុងទសវត្សរ៍ទី ៩០ នោះ បានបង្ហោះសារដ៏រីករាយជាលាភដើមឆ្នាំនេះថា៖ «ថ្ងៃទី ២៨-៣០ ចុងខែនេះ ទទួលភ្ញៀវវិនិយោគកូរ៉េខាងត្បូងមួយក្រុមទៀត។
លើកនេះឈប់ព្រលែងឲ្យចចកហែកចែកគ្នាស៊ីទៀតហើយ។ កន្លងមក ខ្ញុំបានត្រឹមតែជូតទឹកភ្នែកពួកគាត់ មុនឡើងយន្តហោះត្រឡប់ទៅវិញ និងសុំទោសដល់ការខាតបង់តែប៉ុណ្ណោះ។ សង្ឃឹមថា ឆ្នាំថ្មីនេះនឹងរើសបានដៃគូក្នុងស្រុកត្រឹមត្រូវ ស្មោះត្រង់ និងខំប្រឹងប្រែងយកឱកាសធំៗឲ្យមានផលចំណេញទាំងគេ ទាំងយើង ហើយជាពិសេសកុំឲ្យបរទេសគេខ្លាចអ្នកស្រុកខ្មែរយើង»។
តារាចម្រៀងប្រុសមាន វ័យជាងសែសិបប្លាយឆ្នាំ លោក សាន ផានិត ដែលធ្លាប់ល្បីឈ្មោះលើវិថីសិល្បៈដោយមានដើមទុនច្រៀង និងនិយាយភាសាអង់គ្លេសបានល្អ ហើយក៏មានការអប់រំខ្ពស់គ្រាន់បើលើជំនាញពាណិជ្ជកម្មផងដែរ នោះក៏បានបង្ហើបប្រាប់ភ្នំពេញប៉ុស្តិ៍ថា៖ «សម្រាប់ឆ្នាំនេះ ខ្ញុំសន្យាថា នឹងខំប្រឹងប្រែងធ្វើការងារលើមុខជំនួញ ដែលជាចំណេះដឹងរបស់ខ្លួនធ្លាប់មានឲ្យបានល្អដើម្បីកសាងកេរ្តិ៍ឈ្មោះឲ្យបានល្អប្រសើរ ដើម្បីសង្គមគ្រួសារ មិនឲ្យរបូតឱកាសដូចកាលកន្លងមកនោះទៀតឡើយ»។
បើទោះបីមិនល្បីឈ្មោះខ្លាំងនៅក្នុងសង្គមសិល្បៈដែលប្រើដើមទុនជាសំឡេងច្រៀង ដូចជាតារាចម្រៀងប្រុសស្រីទាំងជំនាន់ក្រោយ និងជំនាន់ស្របាលៗ លោកនោះមែនក្តី ក៏លោក សាន ផានិត ហាក់នៅតែមានចិត្តស្រឡាញ់វិស័យសិល្បៈចម្រៀងនេះដដែលដូចមុន ហើយក៏គ្មានបំណងបោះបង់ចោលដែរ។
លោក សាន ផានិត ម្ចាស់បទចម្រៀងបទ «ទូរស័ព្ទប្រាប់ផង» និងបទ «ជាប់រវល់» ជាដើមនោះ បង្ហើបថា៖ «រឿងសិល្បៈចម្រៀងខ្ញុំនឹងមិនបោះបង់ចោលឡើយ ហើយក៏តែងតែបាននិពន្ធបទថ្មីៗជាច្រើនទៀត ដែរ។ ដូចជាឆ្នាំថ្មីខ្ញុំមាន ២ បទសម្រាប់បម្រើអារម្មណ៍បងប្អូនប្រិយមិត្តដែរគឺទីបទ «វេលាជីវិត» និងទី ២ បទ «ភ្លេងការ»។
បទ «វេលាជីវិត» របស់ខ្ញុំកំពុងតែមានការគាំទ្រដោយអង្គការ Khan សម្រាប់ការឧបត្ថម្ភថតជា MV ហើយក៏មានការចូលរួមពីសំណាក់អ្នកច្រៀងរ៉េបពីពូឃ្លាំងដែរ»។
ក្រោយពីមានគម្រោងផែនការលើរបររកស៊ីផ្នែកវិនិយោគជាមួយដៃគូបរទេសនោះ លោក សាន ផានិត ក៏បានបង្កើតផលិតកម្មផ្ទាល់ខ្លួនរួចមកហើយដែរដោយមានឈ្មោះ P- Pro Media៕
