Search form

Login - Register | FOLLOW US ON

Logo of Phnom Penh Post newspaper Phnom Penh Post - ទ្រុង​មរណៈ​ ទីកម្សាន្ដ​ ស្ទើរ​គាំង​បេះដូង​ជាមួយ​ក្រពើ​មច្ចុរាជ

Content image - Phnom Penh Post
ភ្ញៀវ​ទេសចរ​ស្ថិត​នៅ​ក្នុង​ទ្រុង​កញ្ចក់​ថ្លា កំពុង​សម្លឹង​មើល​ក្រពើ​ទឹកប្រៃ​ធំសម្បើម​ហែល​ឆ្វែល​ជុំវិញ​ខ្លួន​។

ទ្រុង​មរណៈ​ ទីកម្សាន្ដ​ ស្ទើរ​គាំង​បេះដូង​ជាមួយ​ក្រពើ​មច្ចុរាជ

ក្រុងដារវីន: ទេសចរ​និយម​ភាព​រំជើប​រំជួល​ពេល​នេះ​អាច​ប្រថុយ​គ្រោះ​តទល់​នឹង​ក្រពើ​ទឹកប្រៃ​ប្រវែង​ជិត ៥ ម៉ែត្រ​ដោយ​គ្រាន់​តែ​ខណ្ឌ​នូវ​របាំង​ប្លាស្ទិក​ដ៏ស្ដើង​មួយ​ប៉ុណ្ណោះ។

គោលដៅ​ទេសចរណ៍​ពេញនិយម ដែល​ស្ថិត​នៅ​ក្រុង​ដារវីន ប្រទេស​អូស្ដ្រាលី ត្រូវ​បាន​ហៅថា «ទ្រុង​មរណៈ»។

ភ្ញៀវ​ត្រូវ​ចាយប្រាក់ ១៣៧ ដុល្លារ ដើម្បី​អាច​ចុះ​ក្នុង​សួន​ទឹក​ប្រឈម​នឹង​ចង្កូម​មច្ចុរាជ​រយៈពេល ៣០ នាទី។ ពួកគេ​ត្រូវ​បាន​រៀបចំ​ឲ្យ​មើល​សកម្មភាព​ក្រពើ​ហែល​ឆ្វែល​ពី​ក្រោម​ទ្រុង​មុន​ពេល​ពន្លិច​ចូល​ក្នុង​ទឹក។

ខណៈ​ទ្រុង​ថ្លា​ដូច​កញ្ចក់​ស្ថិត​នៅ​ក្នុង​ផ្ទៃ​ទឹក អ្នក​ថែទាំ​បាន​ផ្ដល់​ចំណី​សត្វ​ក្រពើ។ ដូច្នេះ វា​នឹង​ធ្វើ​ចលនា​យ៉ាង​គឃ្លើន​ពេញ​ផ្ទៃ​ទឹក។ វា​ត្រូវ​បាន​ផ្ដល់​មាន់ សាច់គោ និង​ត្រី​ជា​អាហារ ខណៈ​ក្រសែ​ភ្នែក​ភ្ញៀវ​រំពៃ​គ្រប់​ចលនា​របស់​វា។

ភ្ញៀវ​ត្រូវការ​ភាព​រំជើប​រំជួល​អាច​គន់​ទិដ្ឋភាព​បរិវេណ​ផ្ទៃ​ទឹក ៣៦០ ដឺក្រេ ខណៈ​ក្រពើ​ហែល​ចុះ​ឡើងៗ ជុំវិញ​ទ្រុង​តូច។

ក្រោយ​ពី​នៅ​ក្នុង​ទឹក ១៥ នាទី ភ្ញៀវទេសចរ​ត្រូវ​បាន​លើក​ឡើង​គោក​ដើម្បី​សុវត្ថិភាព។ ទ្រុង​រាង​មូល​ត្រូវបាន​ផលិត​ដោយ​ដែក​រថភ្លើង និង​អាច​ឲ្យ​ភ្ញៀវ​ប្រើ​ម្ដង​ពីរ​នាក់។

ភ្ញៀវទេសចរ​អាល្លឹម៉ង់​ម្នាក់​ឈ្មោះ Nellie Winters បាន​និយាយ​ថា៖ «ពិតជា​ញ័រ​ខ្លួន​ណាស់។ ពេល​ខ្ញុំ​ចុះ​ទឹក​ដំបូង​ខ្ញុំ​មិន​នឹកស្មាន​ថា ស្រៀវ​ខ្លួន​អី​យ៉ាង​នេះ​ពីព្រោះ​ក្រពើ​នោះ​ធំ​ណាស់ ហើយ​វា​នៅ​ក្បែរ​ខ្លួន​យើង​តែម្ដង។ ខ្ញុំ​ខ្លាច​ស្ទើរតែ​លែង​ដក​ដង្ហើម តែ​ខ្ញុំ​ចូលចិត្ដ។ ខ្ញុំ​នៅ​តែ​គិតថា​វា​មក​ស៊ី​ខ្ញុំ​ហើយ​ជួនកាល​យើង​ភ្លេច​ខ្លួន​ថា​មាន​ទ្រុង​ខណ្ឌ​ចែក​ពួកយើង»។

Content image - Phnom Penh Post
តំបន់​ទេសចរណ៍​នេះ​មាន​ក្រពើ​ទឹកប្រៃ​ធំៗ ៧ ក្បាល​ស្វាគមន៍​ភ្ញៀវ​​។

លោក​បន្ដ​ថា៖ «ខ្ញុំ​មិន​រំពឹង​ថា​វា​មក​ក្បែរ​យើង​អ៊ីចឹង​សោះ ហើយ​ដំបូង​ខ្ញុំ​ក៏មិន​សូវ​ភ័យ​ដែរ តែ​ដល់​ពេល​ចុះ​ទឹក ខ្ញុំ​ចាប់ផ្ដើម​ញ័រ​អស់​សព្វ​ប្រាណ»។

ក្រពើ​ទឹកប្រៃ គឺជា​ប្រភេទ​ក្រពើ​ធំ​បំផុត និង​អាច​ធំធាត់​ដល់​ប្រវែង ៦ ម៉ែត្រ ហើយ​ធ្មេញ​របស់​វា​អាច​មាន​ប្រវែង ១ តឹក និង​ជា​ប្រភេទ​សត្វ​ដ៏​គ្រោះ​ថ្នាក់​បំផុត​សម្រាប់​មនុស្ស។

ក្រពើ​ទឹកប្រៃ​នេះ ត្រូវ​បាន​ប្រទះ​ឃើញ នៅ​ទូទាំង​តំបន់​ខាងជើង ប្រទេស​អូស្ដ្រាលី ឥណ្ឌា និង​តំបន់​ផ្សេងៗ​ទៀត​នៅ​អាស៊ីអាគ្នេយ៍។ ទ្រុង​មរណៈ ត្រូវបាន​បើក​ដំណើរការ​ដោយ​សួន​ទឹក Crocosaurus Cove ដែល​មាន​ក្រពើ​ទឹកប្រៃ​ធំៗ ៧ ក្បាល។

ទីតាំង ដែល​ត្រូវបាន​ចាត់ទុក​ជា​តំបន់​ទេសចរណ៍​លស់​ព្រលឹង​បំផុត​នេះ​ផ្ដើម​ស្វាគមន៍​ភ្ញៀវ​តាំង​ឆ្នាំ ២០១១ ហើយ​ភ្ញៀវ​ក៏មាន​ឱកាស​បី និង​បញ្ចុក​ចំណី​កូន​ក្រពើ​ផងដែរ៕HR

Content image - Phnom Penh Post
ក្រពើ​ទឹកប្រៃ​អាច​ធំ​ដល់​ប្រវែង ៦ ម៉ែត្រ និង​ធ្មេញ​វែង​ស្រួច​ដល់ ១ តឹក។

0

Comments

Please, login or register to post a comment

ព័ត៌មានពាក់ព័ន្ធ