Search form

Login - Register | FOLLOW US ON

Logo of Phnom Penh Post newspaper Phnom Penh Post - នាយ ពែកមី ជំនួស​កៅអី អ៊ិត សេដ្ឋា កម្មវិធី​ពេញចិត្ត​ឬអត់

Content image - Phnom Penh Post
នាយ​ពែកមី ក្នុង​កម្មវិធី​ ពេញ​ចិត្ដ​ឬអត់ របស់ MyTV។ ហ្វេសប៊ុក

នាយ ពែកមី ជំនួស​កៅអី អ៊ិត សេដ្ឋា កម្មវិធី​ពេញចិត្ត​ឬអត់

ភ្នំពេញៈ មើល​ទៅ​មហាជន​ហាក់​ដូចជា​មិន​បាន​ចាប់អារម្មណ៍​ឡើយ​ថា តារា​កំប្លែង​ល្បី​ប្រចាំ​ក្រុម​កំប្លែង​ទូរទស្សន៍​នៃ​ក្រុមហ៊ុន CBS នាយ ពែកមី កំពុងតែ​ក្តាប់​បាន​ឱកាស​យក​តំណែង​ថ្មីមួយ​ទៀត ជំនួស​អតីត​ពិធីករ​ជើង​ចាស់ ដែល​ទើប​ទទួល​មរណភាព​គឺ​លោក អ៊ិត សេដ្ឋា របស់​ទូរទស្សន៍ MyTV គឺ​កម្មវិធី​កម្សាន្ត «ពេញចិត្ត ឬអត់»។

កាល​ដើម​ឡើយ​មាន​គណៈកម្មការ​ក្នុង​កម្មវិធី​កម្សាន្ត «ពេញចិត្ត ឬអត់» របស់​ទូរទស្សន៍ MyTV ចំនួន ៣ រូប​គឺ​លោក អ៊ិត សេដ្ឋា លោក ប៊ីអាយជី និង​អ្នកនាង ខ្យុង ខណៈ​នៅពេល​នេះ ក្រោយ​ពី​លោក អ៊ិត សេដ្ឋា ទទួល​មរណភាព​ទៅ ត្រូវ​បាន​ជំនួស​ដោយ​តារា​កំប្លែង​មកពី​ស្រុក​កំណើត​ឯខេត្ត​ស្វាយរៀង ដែល​ពូកែ​ខាង​វោហោរ​មិនចេះ​ទាល់ តែងតែ​ធ្វើឲ្យ​មហាជន​ផ្ទុះ​សំណើច​នោះ​វិញ​គឺ នាយ ពែកមី ដោយ​លោក​បាន​ថត​កម្មវិធី​ចំនួន​ពីរបី​សប្តាហ៍​រួច​មក​ហើយ។

លោក ចែម ចាន់ដារ៉ា ហៅ នាយ ពែកមី ជា​រៀមច្បង​គ្រួសារ​ក្រុម​តារា​កំប្លែង​រួមមាន នាយ គ្រឿន នាយ ក្រាន និង​បាន​បណ្តុះ​កូន​ប្រុស​ពូជ​កុមារា ហ៊ាទ្រី ហៅ អាតួ ចេះ​រកប្រាក់​ចំណូល​ទាំង​ក្មេង​វ័យ​ផងដែរ​នោះ​បាន​ឲ្យដឹង​ពីហេតុ​ដែល​រូប​លោក​ត្រូវ​ទៅកាន់​តំណែង​កម្មវិធី​កម្សាន្ត «ពេញ​ចិត្ត ឬអត់» របស់​ទូរទស្សន៍ MyTV នោះ​ដែរ​ថា៖ «តាម​ពិត​ទៅ ខ្ញុំត្រូវ​បាន​ម្ចាស់​រៀបចំ​កម្មវិធី [តាប៊ុយ] បាន​ជ្រើសរើស​ខ្ញុំឲ្យ​ចូលកាន់​កម្មវិធី​នេះ ជំនួស​កន្លែង​បង អ៊ិត សេដ្ឋា ក្រោយ​ពីគាត់​បាន​ចែក​ឋាន​ទៅ។ កម្មវិធី​នេះ កាល​ពីមុន មាន​គាត់ [លោក អ៊ិត សេដ្ឋា] មាន​លោក ប៊ីអាយជី និង​អ្នកនាង ខ្យុង ហើយ​ឥឡូវ​នៅ​ដដែល ដោយ​គ្រាន់តែ​ជំនួស​រូបខ្ញុំ​ទៅ​កន្លែង​បង អ៊ិត សេដ្ឋា ប៉ុណ្ណោះ។

បើតាម​ដឹង​ហេតុផល​ជ្រើស​នេះ ក៏ដោយសារ​តែ​នាពេល​បង អ៊ិត សេដ្ឋា ទទួល​មរណភាព​នោះ ខាង​ម្ចាស់​កម្មវិធី​គេថា ឃើញ​ខ្ញុំ​ចូលរួម​ខ្លាំង​ជាងគេ​ក្នុងការ​ជួយ​គិតគូរ​រឿង​បុណ្យសព​គាត់ ទើប​សម្រេច​យកខ្ញុំ​ទៅ​កាន់​កម្មវិធី «ពេញចិត្ត​ឬអត់» តែម្តង​ទៅ»។

ព្រោះតែ​ខ្លួន​ធ្លាប់​មាន​បទពិសោធ​ផ្នែក​កម្មវិធី​សិល្បៈ​កម្សាន្ត ឬក៏​ទម្រង់​សិល្បៈ​នានា​ច្រើន​ដូចជា​កំប្លែង កាត់សក់​មង្គលការ ថតកុន និង​ជា​តារា​ចម្រៀង​ផងដែរ មើលការ​កាន់​តំណែង​ជា​គណៈកម្មការ​មួយរូប​នៅ​ក្នុង​កម្មវិធី​កម្សាន្ត «ពេញចិត្ត ឬអត់» នោះ​មិនមាន​អ្វីចោទ​ជាបញ្ហា​សម្រាប់​នាយ ពែកមី នោះ​ទេ។

តារា​កំប្លែង​រលក​ក្រោយ ដែល​ល្បី​ស្រូប​បាន​សំឡេង​គាំទ្រ​ពីមហាជន​ច្រើន​ស្ទើរ​តែ​គ្រប់​វ័យ នាយ ពែកមី ប្រាប់​ថា៖ «សម្រាប់​ខ្ញុំផ្ទាល់​កម្មវិធី​នេះ ហាក់​ដូចជា​មិនមាន​អ្វីចោទ​ជាបញ្ហា​លំបាក​នោះទេ ហើយ​ផ្ទុយ​ទៅវិញ​នោះ បើ​ប្រៀបធៀប​ទៅគឺ​មាន​តែ​ងាយស្រួល​ជាង​ការងារ​សិល្បៈ​ថតកុន ឬច្រៀង​ទៅ​ទៀត»។

នាមួយ​រយៈពេល​ចុងក្រោយ​នេះ គេ​សង្កេត​ឃើញ​ថា តារា​កំប្លែង ដែល​ធ្លាប់​មាន​ប្រវត្តិ ជាកម្មករ​សំណង់​នោះ ឡើង​កូដ​ខ្លាំង និង​មាន​ឱកាស​រកប្រាក់​ចំណូល​ពី​សិល្បៈ​កំប្លែង និង​បាន​សង់ផ្ទះ​យ៉ាងធំ​អស់​ជាង ១០ ម៉ឺនដុល្លារ ជូនអ្នក​មានគុណ​ឯស្រុក​កំណើត​ខេត្ត​ស្វាយរៀង ទទួល​ការ​កោតសរសើរ​ពី​មហាជន។

គួរ​បញ្ជាក់​ថា នាយ ពែកមី ក៏ធ្លាប់​ក្តាប់​បាន​នូវ​ឱកាស​កាន់​តំណែង​ជាពិធីករ​នៃ​កម្មវិធី​កម្សាន្ត​ចំនួន​ពីរ​ជំនួស​លោក ដួង សុខគា គឺកម្មវិធី «សំណើច​តាម​ភូមិ» និង​កម្មវិធី «ផ្ទះ​អ្នកតា» ប៉ុស្ដិ៍ CTN តែ​ក្រោយ​មក​ត្រូវ​ប្រគល់​កម្មវិធី​មួយ​វិញ​ទៅឲ្យ​លោក ដួង សុខគា៕

0

Comments

Please, login or register to post a comment