Search form

Login - Register | FOLLOW US ON

Logo of Phnom Penh Post newspaper Phnom Penh Post - នី មុនីនាថ ដើរលេង​ទិញ​​អីវ៉ាន់​ថ្លៃៗ​នៅចិន​អវត្តមាន​គូដណ្តឹង

Content image - Phnom Penh Post
តារា​សម្ដែង នី មុនីនាថ ទិញ​សុទ្ធ​តែ​របស់​ម៉ាកថ្លៃៗ។

នី មុនីនាថ ដើរលេង​ទិញ​​អីវ៉ាន់​ថ្លៃៗ​នៅចិន​អវត្តមាន​គូដណ្តឹង

ភ្នំពេញៈ ថ្មីៗនេះ​ក៏ស្រាប់​តែលេច​វត្តមាន​តារា​សម្តែង​ស្រី រហស្សនាម​ពីទស្សនិកជន​ខ្មែរថា​ជាតារា​ស្រី​កំពូល​ទឹកភ្នែក​កញ្ញា នី មុនីនាថ បាន​បង្ហោះ​រូបភាព​យ៉ាង​សប្បាយ​រីករាយ​នាពេល​ដើរ​ផ្សារ​ទំនើប និងកន្លែង​តំបន់​ទេសចរណ៍​នានា​នៃ​ដំណើរ​កម្សាន្ត​នៅឯ​ប្រទេស​មហាកំពែង​ចិន និង​ទឹកដី​កោះ​ហុងកុង។

ដំណើរ​កម្សាន្ត​ឆ្លងប្រទេស​បន្ទាប់ពី​ពិធី​ខួបកំណើត​របស់​កញ្ញា នី មុនីនាថ បាន​បង្កឲ្យ​មាន​ចចាម​អារ៉ាម​លេចឡើង​ថា ជាគម្រោង​ធ្វើឲ្យ​រំភើប​ភ្ញាក់ផ្អើល ដែល​ម្ចាស់​ស្នេហ៍​នាងជា​បុរស​អាណិកជន​អាមេរិក​បានរៀបចំ​ក្នុងការ​សន្សំ​ពិន្ទុ​ស្នេហ៍​ពីកញ្ញា នី មុនីនាថ។

មហាជន​មួយចំនួន​បាន​ខ្សឹបខ្សៀវ​គ្នាថា មិនបាច់​ឆ្ងល់​ច្រើន​ឡើយ គ្មាន​អ្នកណា​ក្រៅពី​គូដណ្តឹង​នៅ​សហរដ្ឋអាមេរិក​ដែល​ទំនង​ធ្វើ​ខួបកំណើត​ឲ្យនាង រួចបន្ត​ភាព​ផ្អែមល្ហែម​តាមរយៈ​ដំណើរ​កម្សាន្ត​ទៅប្រទេស​ចិន និង​ទីក្រុង​ហុងកុង​នោះ។ រូបថត​ប៉ុន្មាន​សន្លឹក​បង្ហាញ​វង់ភក្ត្រ​កញ្ញា នី មុនីនាថ ដៃ​កាន់ថង់​ផលិតផល​ម៉ាកល្បីៗ​ដូចជា LV និង Ferragamo តម្លៃ​ខ្ទង់ពាន់​ដុល្លារ​ឯណោះ។

បើ​យោងតាម​ប្រភពពី​អ្នកស្រី សុភាលី ម្តាយបង្កើត​របស់​តារា​សម្តែង​ស្រី នៅមុន​ពេលដែល​កញ្ញា នី មុនីនាថ វិល​ត្រឡប់មក​ស្រុក​ខ្មែរវិញ​នោះ បាន​បង្ហើបឲ្យ​ដឹងថា៖ «កូនស្រី​ខ្ញុំ​ត្រូវបាន​មិត្តសម្លាញ់​ចាក់ទឹក​មិនលេច​នឹងគ្នា​គឺកូន សារ៉ាយ សក្ខណា បានរៀបចំ​ធ្វើ​ខួបកំណើត​ឲ្យកូន​នាថស្ងាត់ៗ ក៏ព្រោះ​នាង​ចង់ឲ្យ​មានការ​ភ្ញាក់ផ្អើល​ដល់​កូននាថ មិនមែនជា​គូដណ្តឹង​របស់គេ​នោះឡើយ គឺ​គេ លោក អ៊ុង សូឡា កំពុងតែ​នៅឯ​អាមេរិក​ឯណោះ​មិនទាន់​មកទេ»។

យ៉ាងណាមិញ ជុំវិញ​ដំណឹង​ថា គូដណ្ដឹង​របស់​នាង​ជា​អ្នកនាំ នី មុនីនាថ ដើរលេង​ទិញ​សម្ភារថ្លៃៗ​រាប់ពាន់​ដុល្លារ​នោះ ត្រូវបាន​ម្តាយ​បង្កើត​របស់​តារា​សម្ដែង​ស្រីរាសី​ឡើង​ខ្ពស់ក្ដាប់​តំណែង​តួឯក​ជាប់​រដឹក​កញ្ញា នី មុនីនាថ បាន​បកស្រាយ​ដឹង​ទៀតថា៖ «ហើយ​ដំណើរ​កម្សាន្ត​របស់​កូននាថ នៅ​ប្រទេស​ចិននោះ​វិញគឺ​ពួកម៉ាក​ស្រីៗ​របស់​នាង​មកពី​សហរដ្ឋអាមេរិក មកហៅ​ទៅ​ដើរលេង​ឲ្យបាន​ជាគ្នា​ប៉ុណ្ណោះ ហើយក៏​មិនមែន​គូដណ្តឹង​របស់​នាង​មកនាំ​ដើរលេង​នោះដែរ»។

តារា​សម្ដែង​ស្រីដែល​ទើប​ច្រានចោល​ដំណឹង​ចំណង​ស្នេហ៍​ជាមួយ​គូដណ្ដឹង​ជា​អាណិកជន​អាមេរិក​ហាក់​មិនសូវ​រលូន​ផងដែរ ធ្វើឲ្យ​លេចឡើង​នូវការ​សន្និដ្ឋាន​ពី​មហាជនថា ដំណើរ​ឆ្លងប្រទេស​នេះអាច​ជាការ​ផ្សះផ្សា​ភាព​ផ្អែមល្ហែម​នឹងគ្នា​វិញ​ក៏ថាបាន។

នារសៀល​ថ្ងៃ​ម្សិលមិញ​ខណៈនាង​បាន​វិលត្រឡប់​មកដល់​ស្រុកខ្មែរ​វិញ​កាលពី​ល្ងាចថ្ងៃ​ចន្ទ ហើយ​នោះ ភ្នំពេញ ប៉ុស្ដិ៍ ក៏មិន​បានទទួល​ការបកស្រាយ​បន្ថែម​ពីកញ្ញា នី មុនីនាថ នោះឡើយ ដោយ​នាងបាន​លើក​ទូរស័ព្ទ​រួចតបថា៖ «សុំទោស​បង ពេលនេះ​នាងខ្ញុំ​កំពុងតែ​ជាប់រវល់​ថតកុន។ សូម​ចាំមួយ​ម៉ោង ឬពីរ​ម៉ោងទៀត បាន​នាងខ្ញុំ​ទំនេរ បងអាច​ទូរស័ព្ទ​មកបាន»៕

0

Comments

Please, login or register to post a comment