ភ្នំពេញៈ ខណៈការបើកនូវមុខរបររកស៊ីហាងលក់ក្រណាត់ប្រណីត ដែលល្បីថា មានគុណភាពខ្ពស់នាំមកពីប្រទេសអឺរ៉ុបមានឈ្មោះ «ប៊ីរីយ៉ា មានលក់ក្រណាត់ប៉ាក់បោះដុំ និងរាយ» ជះទុនប្រមាណ ១៥ ម៉ឺនដុល្លារទើបតែបានដំណើរការសន្សឹមៗ មិនទាន់បើកសម្ពោធជាផ្លូវការផងនោះ ក៏ស្រាប់តែលេចឮនូវព័ត៌មានថា សម្ព័ន្ធស្នេហ៍ប្តីប្រពន្ធតារាសម្តែងស្រីឈ្មោះពិត តាំ គីមចាំង ហៅ ប៊ីរីយ៉ា រកាំរកូសសាជាថ្មី។
បើតាមប្រភពលេចឮខ្សិបខ្សៀវមានដំណឹងថា សម្ព័ន្ធភាពស្នេហានៃប្តីប្រពន្ធរបស់តារាស្រីរូបនេះ កំពុងតែកើតមានឡើងសាជាថ្មីម្តងទៀតហើយ ដោយភាគីខាងប្តីហាក់ដូចជា ឧស្សាហ៍បង្ហោះសារប្លែកៗ បង្ហាញពីអារម្មណ៍ដ៏កម្សត់ដែលបានស្តែងពីជម្រៅចិត្តរបស់ខ្លួន។
ប៉ុន្តែតារាសម្តែងស្រីរាងខ្ពស់ស្រឡះ បានរៀបការជាមួយនឹងស្វាមីឈ្មោះ តាំង ហៃឡេង កាលពីថ្ងៃទី ១០ ខែធ្នូ ឆ្នាំ ២០១៤ និងមានកូនស្រី ១ ជាចំណងស្នេហ៍ បច្ចុប្បន្នមានវ័យជាង ២ ឆ្នាំ ហើយផងដែរនោះបានច្រានចោលទៅនឹងដំណឹងលេចឮខាងលើនេះ។ នាង ប៊ីរីយ៉ា បានបញ្ជាក់ប្រាប់ភ្នំពេញប៉ុស្តិ៍យ៉ាងខ្លីទាំងលាយឡំនឹងសំណើចថា៖ «ដំណឹងអីគេ ចេះតែថាហើយ!មិនដឹងជាបានដំណឹងនោះមកពីណាទេ។ ពួកយើងដូចជានៅធម្មតាទេ មិនមានអ្វីកើតឡើងនោះឡើយបង»។
ទន្ទឹមនឹងភាពស្ងាត់ស្ងៀមក្នុងសិល្បៈនាពេលថ្មីៗនេះ ក៏លេចចេញចំហាយព័ត៌មានថា ជីវិតអាពាហ៍ពិពាហ៍ តារាស្រីកូនកាត់ ៣ សាសន៍នាងប៊ីរីយ៉ាក្រោយពីបង្កើតបានកូនស្រីមួយមានរូបសម្ផស្សដ៏គួរឲ្យក្នាញ់ខ្លាំងកំពុងតែពើបនឹងភាពល្អក់កករ ដែលទំនងជាឈានទៅរកការប្រេះឆាគ្នាជាមិនខានផងដែរ។
កាលដើមឆ្នាំ ២០១៧ តាមរយៈសារបែបពាក្យចចាមអារ៉ាមថា អាពាហ៍ពិពាហ៍ក្រាបផ្ទឹមពេញក្រឹត្យប្រពៃណីខ្មែររវាង លោក តាំង ហៃឡេង ជាមួយនឹង ប៊ីរីយ៉ា ទំនងជាជួបរឿងប្រេះឆា តែចំហាយព័ត៌មាននេះត្រូវបានសាមីខ្លួនច្រានចោលក្រោមហេតុផលថា សារទាំងនោះក៏ឆ្លុះបញ្ចាំងពីស្ថានភាព អាជីវកម្មរបស់នាង ដោយមិនពាក់ព័ន្ធនឹងបញ្ហាចំណងគ្រួសារទេ។
កាលប្រកាសបើកហាងលក់ក្រណាត់ប៉ាក់ពេលថ្មីៗនេះ ក៏ក្លាយជាចម្ងល់ដល់មហាជនចោទសួរគ្នាផងដែរ ពាក់ព័ន្ធនឹងរឿងប្រភពនៃប្រាក់ជាដើមទុន ក្នុងការវិនិយោគរកស៊ីខាងក្រៅអាជីពសិល្បៈរបស់នាងប៊ីរីយ៉ា ខណៈដែលមួយរយៈពេលចុងក្រោយនេះ ក៏ធ្លាប់តែឃើញនាងបានរអ៊ូថា រាងខ្សត់ទីផ្សារថតកុននោះ តែឮមកបើកហាងលក់ក្រណាត់ប៉ាក់ មានគុណភាពខ្ពស់ដែលនាំចូលពីប្រទេសល្បីនៅអឺរ៉ុបទៀត។
តែតារាសម្តែងស្រីរូបនេះក៏បានបញ្ជាក់ថា៖ «តាមពិតទៅគឺជាការសហការគ្នារវាងនាងខ្ញុំ និងស្វាមី ព្រមទាំងក្រុមគ្រួសារ ទើបអាចបង្កើតបាននូវអាជីវកម្មនេះឡើង ហើយផ្ទះជាទីតាំងបើកហាងនោះគឺជាផ្ទះរបស់មីងទៀតផង។ ដោយសារតែយើងបើកថ្មី ដូច្នេះក៏ត្រូវចំណាយទុនគួរសម ដើម្បីទិញក្រណាត់ច្រើនប្រភេទមកពីប្រទេសបារាំង និងប្រទេសអ៊ីតាលី យកមកដាក់តាំងបង្ហាញ នាថ្ងៃបើកសម្ពោធហាងនៅក្នុងអំឡុងមួយសប្តាហ៍ខាងមុខនេះផងដែរ។ បើតាមគម្រោង យើងបានចំណាយ ដើមទុនប្រមាណជិត ១៥ ម៉ឺនដុល្លារ នៅក្នុងការរៀបចំបើកហាងរកស៊ីនេះឡើង»៕