Search form

Login - Register | FOLLOW US ON

Logo of Phnom Penh Post newspaper Phnom Penh Post - ពុទ្ធឱវាទ​ស្តីពី​​ មាតាបិតា​មាន​ឈ្មោះ​ផ្សេង​ចំនួន ៤ យ៉ាង

Content image - Phnom Penh Post
ពុទ្ធឱវាទ​ស្តីពី​មាតាបិតា​មាន​ឈ្មោះ​ផ្សេង​ចំនួន ៤ យ៉ាង។

ពុទ្ធឱវាទ​ស្តីពី​​ មាតាបិតា​មាន​ឈ្មោះ​ផ្សេង​ចំនួន ៤ យ៉ាង

ភ្នំពេញៈ កូនប្រុស​ស្រី ដែល​បាន​បូជា​នូវ​ទាន​របស់​ខ្លួន​ជូន​ទៅ​មាតាបិតា​រមែង​បាន​ផល​ច្រើន និង​មិន​ចាំបាច់​ទៅរ​ក​ព្រះ​នៅ​ទីណា​មក​បូជា​នោះ​ទេ គឺ​ព្រះរស់​ក្នុង​ផ្ទះ​របស់​យើង​ទាំងអស់​គ្នា​ហ្នឹង​ហើយ។

មួយ​ទៀត​យើង​ក៏មិន​អាច​សងគុណ​របស់​ពួកគាត់​អស់​ឡើយ ប៉ុន្តែ​យើង​អាច​ធ្វើ​សេចក្ដី​ល្អ​ចំពោះ​គាត់​បាន​គ្រប់​ពេលវេលា នៅ​គ្រប់​ទីកន្លែង មិន​ថា​ពេល​ណា​នោះ​ទេ ទោះបី​យប់​ទោះបី​ថ្ងៃ ក៏​កូនប្រុស​ស្រី​អាច​ធ្វើ​នូវ​សេចក្ដី​ល្អ​ចំពោះ​គាត់​បាន​គឺ​កាន់​តែច្រើន​ដើម្បី​សម្រេច​ផល​របស់​ខ្លួនឲ្យ​រឹតតែ​ចម្រើន​ទៀត​ផង​ដែរ។

បើតាម​ការដក​ស្រង់​ពី​សៀវភៅ «ក្តីសង្ឃឹម​អ្នកមានគុណ» នៃ​គេហទំព័រ ៥០០០ ឆ្នាំ បាន​បរិយាយ​ឲ្យដឹង​តាម​ពុទ្ធឱវាទ​ថា៖ «កូនៗ​ទាំង​ឡាយ ចូរកូន​ពិចារណា​នូវ​ឈ្មោះ​របស់​មាតាបិតា ដែល​មាន​ចំពោះ​កូន​គ្រប់គ្នា​ទុក​ជាការ​ចងចាំ ដែល​ពួកគាត់​មាន​សេចក្ដី​ល្អ​សម្រាប់​កូន ហើយ​សូម​កូន​រក្សា​នូវ​សេចក្ដី​ល្អ​ពុកម៉ែ​ផង ដោយ​លោក​មាន​ឈ្មោះ ៤ យ៉ាង»។

គេហទំព័រ ៥០០០ ឆ្នាំ​ក៏បាន​ឲ្យ​ដឹង​ឈ្មោះ​ទាំង ៤ យ៉ាង​នោះ​ថា៖ «ទី១ មាតាបិតា មាន​ឈ្មោះ​ថា ព្រហ្ម​គឺជា​អ្នក​ដែលមាន​ចិត្ត​សន្តោស​ចំពោះ​រូប​កូន​របស់​ខ្លួន​គឺ​លោក​មាន​មេត្តា​ការ​រាប់អាន ការស្រឡាញ់​ចំពោះ​រូប​កូន តាំងតែ​ពីបាន​ដឹង​ថា មាន​សត្វ​មក​ចាប់​បដិសន្ធិ​ក្នុង​ផ្ទៃ។ អ្នកម្ដាយ​បាន​តម​អាហារ តម​ការងារ​ខ្លះៗ​ព្រោះ​តែ​ខ្លាច​ប៉ះពាល់​ដល់​គភ៌ ដែល​ក្នុង​ផ្ទៃ។ ខណៈ​នេះ​មាតា​មាន​ការគាំទ្រ​ពពោះ​មានការ​លំបាក​ជាទី​បំផុត តែ​រូបគាត់​ទ្រាំ​អត់ធ្មត់​រហូត​គ្រប់ខែ គឺ​ពេល​ប្រសូត​ហើយ​មាតា​តែងតែ​មាន​ករុណា​ដ៏​ក្រៃលែង​ទៅរក​បុត្រ ទោះបី​ជាខ្លួន​អស់​កម្លាំង​យ៉ាងណា​ក៏ដោយ ក៏​នៅតែ​រីករាយ​ព្រោះ​បាន​ដឹងថា កូន​ខ្លួន​បាន​ឆ្លង​ផុតពី​គ្រោះ​កាច​គឺ​សេចក្ដី​អន្តរាយ​ហើយ។ លោក​ទាំងពីរ​រួមគ្នា​ធ្វើ​កិច្ចការ​នានា មិន​ថា​ធ្ងន់​ស្រាល ក្ដៅ​ត្រជាក់​នោះទេ គឺ​ពួកគាត់​ខំប្រឹង​ដោយ​វីរិយភាព​ដើម្បី​រូបកូន។ ពេល​ដែល​កូនធំ​ពេញវ័យ​មាតាបិតា​មាន​ចិត្ត​មុទិតា ទោរ​ទន់​រីករាយ​ឆ្ពោះ​ទៅរក​កូន​ស្ងួន​ដោយ​គិតថា កូន​យើង​សមរម្យ​ល្មម​នឹង​រៀបចំ​ទុកដាក់​ឲ្យមាន​គូគ្រង។ មិន​តែប៉ុណ្ណោះ​លោក​បាន​បែងចែក​ទ្រព្យ​ទៅ​តាម​លទ្ធភាព​ដែល​គាត់​មាន​ហើយ​លោក​មានចិត្ត​ឧបេក្ខា ជា​កណ្ដាល​ចំពោះ​កូន​របស់​គាត់ ព្រោះ​កូន​មាន​ទីពឹង និង​មាន​គ្នា​សម្រាប់​ចែក​រំលែក​ទុក្ខធុរៈ​គ្នា​ទៅវិញ​ទៅមក»។

ចំណែក ៣ យ៉ាង​ទៀត​នោះ​ក៏មាន​ការបកស្រាយ​បន្ថែម​ដែរ​ថា៖ «ទី ២ មាតាបិតា មាន​ឈ្មោះ​ថា​គ្រូដើម គឺ​លោក​ជាគ្រូ​ដំបូង​បង្អស់​បង្រៀន​កូនប្រុស​ស្រី​គឺ​លោក​បង្រៀន​រាល់ៗ​ថ្ងៃ ទាំង​ការនិយាយ​ស្ដី និងការ​ប្រព្រឹត្ត។លោក​ទាំង ២ ជាគ្រូ​ចិត្តល្អ​បំផុត​ក្នុង​លោក ដែល​បាន​បង្រៀន​កូន ដោយ​មិន​គិត​ប្រាក់​ខែ មិន​គិត​ពេលវេលា និងការ​នឿយ​ហត់ រាល់​សកម្មភាព​របស់​ឪពុកម្ដាយ​បាន​សម្ដែង​ចេញ​គឺជា​មេរៀន​បង្រៀន​កូន​រាល់ថ្ងៃ ដែល​មេរៀន​នោះ​បាន​ដក់​ជាប់​ក្នុង​ផ្នត់គំនិត​របស់​កូន យក​ទៅ​អនុវត្ត​ក្នុង​សង្គម។ បើកូន​និយាយ​ពីរោះ​ទៀង​ត្រង់​មាន​ឥរិយាបថ​ល្អ សុភាព​រាបសា​នោះ ពួកគាត់​មានចិត្ត​ត្រេកអរ​ណាស់ ហើយ​ក៏ជា​តួនាទី​សំខាន់​របស់​ពួកគាត់​ដែរ​ក្នុង​សង្គម​គ្រួសារ។ ទី៣ មាតាបិតា​មាន​ឈ្មោះ​ថា ទេវតា​ដើម គឺ​លោក​ទាំង ២ តែង​ស្វែងរក​ប្រយោជន៍​ឲ្យកូនៗ មិន​ដែល​ប្រកាន់​ទោស​កូន​ខ្លួន​ឡើយ ទោះបី​កូន​ធ្វើខុស​ឆ្គាំឆ្គង ដែល​មហាជន​ខឹង​ស្អប់​យ៉ាង​ណា ក៏​លោក​នៅ​តែ​ស្រឡាញ់ និង​តាម​ការពារ​កូន​ខ្លួន​ជានិច្ច។ ទី ៤ មាតាបិតា មាន​ឈ្មោះ​ថា​ព្រះ​ដើម ដោយ​ទង្វើ​ដ៏ល្អ​ឥត​ហ្មង ដែល​បាន​បង្ហូរ​មករក​កូន តាំងពី​កូនៗ​នៅ​ក្នុង​ផ្ទៃ​រហូតមក​ហ្នឹងឯង ទើប​លោក​មាន​ឈ្មោះ​ថា​ជាព្រះ​ដ៏​បរិសុទ្ធ​របស់​កូន​ប្រុស​ស្រី ដែល​បាន​ផ្តល់​ការបូជា​ចំពោះ​កូនប្រុស​ស្រី»៕

Content image - Phnom Penh Post
រូបតំណាងៈ កូនៗ​ត្រូវ​សម្តែង​ការគោរព​មាតាបិតា​។ អង្កការពអក

0

Comments

Please, login or register to post a comment