ភ្នំពេញៈ ខណៈសម្ព័ន្ធភាពស្នេហ៍កាន់តែមានភាពផ្អែមល្ហែម ដោយសារជួបម្ចាស់បេះដូងត្រូវចិត្តត្រូវថ្លើមគ្នារវាងបុរសរូបរាងសង្ហាជាតារាសម្តែង ឆឹម សក្កដា និងអ្នកនាង ពេជ្រ សោភា ហ៊ានបណ្តើរគ្នាជាសាធារណៈ និងទើបតែបានដឹកដៃគ្នាទៅសម្តែងកម្មវិធីសិល្បៈមួយកន្លងមកនៅប្រទេសកូរ៉េ និងថតកុនជាមួយគ្នាទៀតផងនោះ ក៏ស្រាប់តែប្រទះឃើញសារចម្លែកមួយពីតារាចម្រៀងស្រីកំពូលនៅលើទ្រនំហង្សមាស បង្កការភ្ញាក់ផ្អើលដល់មហាជន។
តារាចម្រៀងស្រីដ៏ល្បីឈ្មោះយូរលើវិស័យចម្រៀង និងមានប្រវត្តិធ្លាប់ជាអ្នកកម្សត់លក់អំពៅសាង អ្នកនាង ពេជ្រ សោភា បានបង្ហោះសារតាមអ៊ីនស្តាក្រាមថា៖ «ហាហាសាំម៉ង់!កុំគិតពីខ្ញុំច្រើនពេក វាអាចធ្វើឲ្យអ្នកក្តៅក្បាលដល់ក្បាលក្តៅចឹង នាំឲ្យអា Filler ដែលចាក់ឲ្យមុខស្អាតនឹង វារលាយខាតលុយណាយីស!»។
រំពេចនោះក៏បានធ្វើឲ្យមហាជនមានការងឿងឆ្ងល់នឹងសារយ៉ាងខ្លាំង ក៏នាំគ្នាលើកឡើងមកជជែកដេញដោលបង្កើតជាសំណួរថា៖ «ពីរនាក់នឹងដូចជាទើបបានត្រូវចិត្តគ្នាសោះ តែឥឡូវនេះពួកគេកំពុងតែមានរឿងអ្វីកើតឡើងទៅ បានជាឃើញនាង ពេជ្រ សោភា បង្ហោះសារចម្លែកបែបដូច្នោះ?»។
ពីចម្លើយបកស្រាយយ៉ាងងាយពីសំណាក់តារាចម្រៀងស្រីអ្នកនាង ពេជ្រ សោភា ប្រាប់ភ្នំពេញប៉ុស្ដិ៍ឲ្យដឹង ខណៈពេលគូស្នេហ៍ដែលទើបតែបានយល់ចិត្តថ្លើមគ្នាថោ្មងថ្មីថា៖ «គ្មានរឿងអ្វីកើតឡើងរវាងយើងទាំងពីរនោះទេ។ តាមពិតទៅសារ ដែលនាងខ្ញុំ បានបង្ហោះនោះគឺគ្រាន់តែជាការឌឺដងដាក់គ្នាលេងទេតើបង ដោយសារតែ តាដា [ ឆឹម សក្កដា] គាត់តែងតែបារម្ភពីខ្ញុំ ហើយគិតច្រើនអ៊ីចឹងចង់តបវិញថា កុំគិតច្រើនពេកអីខ្ញុំ»។
ចំពោះ សម្ព័ន្ធស្នេហ៍ រវាងតារាចម្រៀងស្រី ពេជ្រ សោភា និងតារាសម្តែងប្រុសលោក ឆឹម សក្កដា នាមួយរយៈពេលចុងក្រោយនេះ មានភាពល្អូកល្អិននឹងគ្នាខ្លាំងណាស់ គឺក្រោយពីនាំគ្នាថតកុនភាគមួយឲ្យផលិតកម្មហង្សមាសនោះ ពេលថ្មីៗនេះអ្នកនាង ពេជ្រ សោភា ក៏ធ្លាប់បានសណ្តោងនាំលោក ឆឹម សក្កដា អមដំណើរទៅសម្តែងក្នុងកម្មវិធីតន្ត្រីសប្បុរសធម៌នៅប្រទេសកូរ៉េ ដើម្បីជួយប្រមូលប្រាក់ជួយមន្ទីរពេទ្យគន្ធបុប្ផា កាលពីដើមខែតុលា ឆ្នាំទៅកន្លងមកផងដែរ។
ខណៈដំណើរទៅសម្តែងតន្ត្រីសប្បុរសធម៌នៅប្រទេសកូរ៉េខាងត្បូងក៏មានតារាប្រុសរួមទ្រនំហង្សមាស មានមុខមាត់ដូចជាតារាចម្រៀងកូរ៉េគឺលោក Step និងមានតារាចម្រៀង ២ ដួងទៀត របស់ផលិតកម្មសាន់ដេ គឺមានកញ្ញា សុខ ពិសី និងកំលោះជាតារាកំប្លែងផង ចម្រៀងផង ទើបឡើងកូដគឺនាយ ចឺម ព្រមទាំងមានក្រុមរាំផ្ទាល់ខ្លួនរបស់អ្នកនាង ពេជ្រ សោភា។
បញ្ជាក់ប្រាប់ភ្នំពេញប៉ុស្តិ៍នាពេលកំពុងនាំគ្នាទៅថតកុនឲ្យហង្សមាស អ្នកនាង ពេជ្រ សោភា បង្ហើបការពិតថា៖ «ខ្ញុំ និងគេ [សក្កដា] គឺពិតជាត្រូវតែសម្តែងកុនភាគឲ្យផលិតកម្មហង្សមាសមែន គឺយើងត្រូវគេតម្រូវឲ្យយើងដើរតួជាគូស្នេហ៍ដែលមានវ័យចាស់ទុំចិត្តគំនិតតែម្តងហ្នឹងណា!»៕