Search form

Login - Register | FOLLOW US ON

Logo of Phnom Penh Post newspaper Phnom Penh Post - ពេជ្រ សោភា វែកមុខ​អ្នក​ពូកែ​រិះគន់​នាង​ជា​អ្នកសិល្បៈ

Content image - Phnom Penh Post
តារា​ចម្រៀងអ្នកនាង ពេជ្រ សោភា។ ភ្នំពេញ ប៉ុសិ៍្ត

ពេជ្រ សោភា វែកមុខ​អ្នក​ពូកែ​រិះគន់​នាង​ជា​អ្នកសិល្បៈ

ភ្នំពេញៈ ខណៈ​ដែល​កម្មវិធីប្រឡង​ចម្រៀង​លំដាប់​ពិភពលោក​ The Voice Cambodia រដូវកាលទី ២ ​របស់​ទូរទស្សន៍​ហង្សមាសមក​ដល់​នោះ គេឃើញមាន​អ្នកគាំទ្រ​កម្ម​វិធីជាច្រើនត្រេកអរ​នឹងការវិលវិញ​របស់​គ្រូបង្វឹក​ទាំងបួនក្នុង​កម្ម​វិធីរបស់​ខ្លួន​ផងដែរ​។

ដោយឡែក​អ្នក​នាង ពេជ្រ សោភា បែរ​ត្រូវ​បាន​ជនពូកែ​ខាង Troll តាមបណ្តាញ​សង្គម​ហ្វេសប៊ុក​​បាន​លើកយក​រឿងចាស់ កាល​ពីឆ្នាំ​មុន​មក​គាស់​កកាយ​ឡើងវិញ ដើម្បីចំអន់ ឬ​ បំបាក់​ទឹកចិត្ដ​​នាងដោយ​ចោទថា នាង​មិនត្រឹមតែ​ចម្លង​​បទ​បរទេសមកច្រៀង​ទេសូម្បី​តែ​សម្លៀក​បំពាក់​ក៏​ដូច​គេ​ដែរ។

តារា​ចម្រៀងរបស់​ផលិតកម្ម​​ហង្សមាស ដែល​មានប្រវត្តិធ្លាប់លក់​អំពៅសាង អ្នកនាង ពេជ្រ សោភា បាន​ឆ្លើយតប​ទៅ​នឹង​ការរិះ​គន់ ដោយ​នាងប្រាប់ ភ្នំពេញ ប៉ុស្តិ៍​ ​មុនថ្ងៃ​ដែល​នាង​ចេញដំណើរ​ទៅកាន់ទឹកដី​ខេត្ត ​ព្រះសីហនុ ដើម្បី​បើក​យុទ្ធ​នាការ​កម្មវិធី​ The Voice Cambodia ​រដូវកាលទី ២ ​នៅ​ថ្ងៃសៅរ៍​ ទី ៧ ​ខែ​វិច្ឆិកា ឆ្នាំ ២០១៥ ថា៖ «ពេល​នេះ​ខ្ញុំឥតខ្វល់​ឈឺក្បាលនឹងរឿង​អ្នក​ណា​ថា​ខ្ញុំ Copy ​បទ​ចម្រៀងអ្វីនោះ​ទេ​ ព្រោះ​វា​ជា​សិទ្ធិផ្ទាល់​ខ្លួនរបស់​គេ។ រឿង​សំខាន់​នាពេល​នេះ​គឺ​នាង​ខ្ញុំគ្រាន់តែ​ខិត​ខំបង្កើតស្នាដៃ​ ដែល​ជា​របស់ខ្លួន​ឲ្យ​បាន​ច្រើន​ទៅចប់ហើយ​! ចង់អ្នកណា​ថា​យ៉ាង​ណា​ក៏​ខ្ញុំ​មិន​ខ្វល់ដែរ»។

បើ​តាម​ ហ្វេសប៊ុក​ ឈ្មោះ Troll The Voice Cambodia Ket Marrie បាន​លើក​យក​ការរិះគន់របស់​ខ្លួន​មក​វាយ​ប្រហារ​ក្រុមចៅក្រម​ នៃ​កម្ម​វិធី​ The Voice Cambodia ចំៗឈ្មោះ​ថា៖ «​ចង់ថា​ឲ្យ​កញ្ញាណា? Solo Album ព្រាប សុវត្ថិ និងឱក សុគន្ធកញ្ញា យក​ពី​ចិន​ទាំង​ដុល កប់ៗ ហើយបើបទ ​Original Song របស់​សោភា​ វិញ​បទខ្លះ​យក​ភ្លេងមកពី​ Remix​ ចូល​គ្នា​ក៏​ថា ​Original ដែល​ ឲ្យ​តែបទ​ភ្លេងគេ​តែ​តិចក៏ថា​ Copy ដែរ​ ហើយបទ ​Up របស់​ ពេជ្រ សោភា យក​តាម​បទ​របស់​ Far Earth moment Turn up the love យក​ពី​គេទាំង​ភ្លេង​ក៏ថា Original, ដែល​មិន​ចេះ​ខ្មាសគេ»។

ពេជ្រ សោភា ក៏​សរសេរតប​ទាំងហួសចិត្ដ​​ថា៖ «ខំ​ធ្វើ​បទ​ Original​ ហើយ​ នៅ​តែ​មិនទាន់ត្រូវចិត្ត​អូន​ទៀត !!! បង​និយាយថា បទ​ Up បទ ​Original ​ពី​ពេល​ណា​អូន នៅកន្លែង​ណា?​ មាន​មើល ​Album Solo Original ​បង​អត់​ ក្នុង​ហ្នឹង​មាន​បទ ​Up​ ទេ​? មុន​និយាយ​ឲ្យ​ច្បាស់​សិន​អូន ហើយ​បទ​ណា​ខ្លះ​ដែល​អូនថា ​Remix​ ភ្លេង​នឹង​អូន​? បង​ដឹង​អូន​មិនសូវ​ចូលចិត្ត​បង​ទេ ​ស្អប់ក៏ស្អប់​ចុះ បើ​មិន​គាំទ្រ កុំព្យាយាម​ជាន់​ពន្លិច​!»។

មិន​តែ​ប៉ុណ្ណោះ​ តារា​ចម្រៀង​ស្រី​ដែល​ទើប​វិល​ត្រឡប់ពីប្រទេស​កូរ៉េ​​ដោយ​បាននាំ​យក​នូវ​កេរ្តិ៍ឈ្មោះលេខ ៣​ ក្នុង​ព្រឹត្តិ​ការណ៍ «Migrants' Arirang Multicultural Festival ២០១៥» កាលពី​​ខែ​តុលា​នោះ ក៏បាន​បង្ហើរ​ព្រលយ​ពាក្យ​វែកមុខអ្នករិះគន់​នាង​ថា៖ «​មិនមែន​បង​ប្អូន​ជា​អ្នកលក់បន្លែ ឬ​ លក់​អីវ៉ាន់​ចាប់​ហួយ​នៅ​ផ្សារ​មក​រវល់ឈឺក្បាល​គិត​រក​រឿង​នាង​ខ្ញុំនោះ​ទេ​! អ្នកដែលចូលចិត្ដ​រិះ​គន់​ខ្ញុំនោះ ​គ្មាន​អ្នកណា​ក្រៅ​ពី​អ្នក​ដែល​កំពុង​តែ​មាន​អាជីព​ក្នុង​សង្គម​សិល្បៈ​ដូចគ្នានេះឯង​បង! មូល​ហេតុ​មក​ពី​ពួកគេ​ច្រណែនទើបធ្វើ​បែបនេះ»។

​អំពី​​រឿង​ចម្លង​ម៉ូដ​ខោអាវ​បរទេស​មកស្លៀកពាក់​នោះ អ្នក​នាង ពេជ្រ សោភា​ ហាក់​ដូច​ជា​ទទួល​ស្គាល់ដោយសំអាង​​លើហេតុ​ផល​ផ្ទាល់​ថា៖ «​រឿងម៉ូដសម្លៀកបំពាក់​ នាង​ខ្ញុំ​សុំ​ទទួលថា​ពិតជាចម្លង​ម៉ូដ​មែន​! ហើយ​បើ​សិន​ជា​មិន​ចម្លង​ទេ​ នាង​ខ្ញុំគ្មានសមត្ថ​ភាព​អាច​ទិញ​ឈុត​សម្លៀកបំពាក់​ Original ដែល​មាន​តម្លៃ​រាប់​សិបពាន់​នោះបានឡើយ»៕

0

Comments

Please, login or register to post a comment