Search form

Login - Register | FOLLOW US ON

Logo of Phnom Penh Post newspaper Phnom Penh Post - ពេជ្រ សោភា វះកាត់​ដុំគីស​ក្នុង​ភ្នែក ចំពេល​ជីវិត​ឯកា

Content image - Phnom Penh Post
រូបថត​អ្នកនាង ពេជ្រ សោភា បង្ហោះ​ក្រោយ​ពី​ធ្វើការ​វះកាត់​ដុំគីស​ក្នុង​ភ្នែក​។ អុីនស្តាក្រាម​

ពេជ្រ សោភា វះកាត់​ដុំគីស​ក្នុង​ភ្នែក ចំពេល​ជីវិត​ឯកា

ភ្នំពេញ: តារា​ចម្រៀង​ជួរមុខ​ប្រចាំ​ផលិតកម្ម​រស្មីហង្សមាស អ្នកនាង ពេជ្រ សោភា ជាមួយ​នឹង​សារ​ឃ្លាត​ឆ្ងាយ​ពី​អត្ថន័យ​ផ្អែម​ល្ហែម​ស្នេហ៍ ទាំងការ​បង្ហាញ​ផងដែរ ពី​រូបថត​បែប​ឯកា​មិន​មាន​បុរស​រូប​សង្ហា ឆឹម សក្កដា នៅ​ក្បែរ ផ្ទុយ​ពីមុន​ទៅ​ណា​មួយ​ជំហាន​មិន​ឃ្លាត​គ្នា​នោះ។

ថ្មីៗ​នេះ​នាង​ក៏​បង្ហាញ​ឃើញ​ពី​ស្នាម​ប៉ង់​ស៊ីម៉ងត៍​ភ្នែក ទាំង​រូបភាព​បង្ហាញ​អារម្មណ៍​ដ៏​ក្រៀម​ក្រំ​មិនមាន​អ្នកមើល​ថែថួន។

មួយរយៈ​ចុងក្រោយ​នេះ ក៏​មានការ​កត់​សម្គាល់​ឃើញ​ថា ចំណង​ស្នេហា អ្នក​មេម៉ាយ​ចំណាយ​មាត់​ញាតិ ពេជ្រ សោភា និង តារា​សម្តែង​កំលោះ​រូប​សង្ហា​លោក ឆឹម សក្កដា ហាក់​ថមថយ ពី​រូបភាព​ស្នេហា​ផ្អែម​ល្ហែម ដែល​មុននេះ​ធ្លាប់​ធ្វើឲ្យ​មានការ​ភ្ញាក់ផ្អើល​នៅ​លើ​ឆាក​សិល្បៈ​នេះ និង​តាម​បណ្ដាញ​សង្គម។

ជាមួយ​នោះ គេក៏​ឧស្សាហ៍​ឃើញ តារា​ចម្រៀង​ស្រី អ្នកនាង ពេជ្រ សោភា បង្ហោះ​សារ​បង្ហាញ​ពីភាព​ឯកា ដែល​ពេល​ខ្លះ​នាង​ក៏​ត្អូញត្អែរ​ថា៖ «ម៉េច​មកពី​អូន​ចាស់​មែន បាន​ជា​រាល់​ដង​ពេល​ជួបគ្នា បង​តែង​សុំ​អូន​បែក...»។

អ្នកនាង ពេជ្រ សោភា ក៏​ត្អូញត្អែរ​ទៀត​ថា៖ «បើ​មនុស្ស​ប្រុស​គេ​នឹង​ដើរ​ចេញ​ពី​យើង បើ​ទោះ​ប្រឹង​ឃាត់ ប្រឹង​ធ្វើ​ល្អ​យ៉ាង​ណា​ក៏គេ​មិន​ប្រាកដ​ថា​នៅ​ទ្រាំ​តាម​ការ​អង្វរ​របស់​យើង​ដែរ»។

កាល​ពីថ្ងៃ​ទី ១១ ខែ​កញ្ញា នេះ តារា​ចម្រៀង​របស់​ផលិតកម្ម​ហង្សមាស ដែល​នៅ​រក្សា​ប្រជាប្រិយភាព​កម្រិត​ជួរមុខ​អ្នកនាង ពេជ្រ សោភា ក៏បាន​បង្ហាញ​រូបថត​ចូល​ពេទ្យ​វះកាត់​ភ្នែក នៅ​ក្នុង​អ៊ីនស្តាក្រាម។

ជាមួយគ្នា​នោះ ក៏មាន​អ្នកគាំទ្រ​ជាច្រើន​ដែល​បង្ហាញ​អារម្មណ៍​យកចិត្ត​ទុកដាក់​តាម​ចង់ដឹង​ពី​ស្ថានភាព​វះកាត់​ភ្នែក​អ្នកនាង ពេជ្រ សោភា ក៏បាន​សួរ​ជជីក​ថា៖ «បងភា ពេល​បង​ឈឺ​អ៊ីចឹង មាន​អ្នកណា​នៅ​មើល​ថែ ហើយ​បង សក្កដា ដែល​មុន​នេះ​ធ្លាប់​ល្បី​ថា ជា​ម្ចាស់​ស្នេហ៍​យល់ចិត្ត​បង​នោះ គាត់​ទៅ​ណា​ហើយ ម៉េច​មិន​ឃើញ​គាត់​ជូន​បង​មក​ពេទ្យ​អ៊ីចឹង»។

តែ​យ៉ាងណា​ការឆ្លើយ​តប​ទៅ​ម្ចាស់​សំណួរ ដែល​សួរ​រឿង​ស្នេហា​នោះ មិន​មាន​នោះ​ទេ​ ពី​តារា​ចម្រៀង​ដែល​ទើប​នឹង​វះកាត់​ភ្នែក​នោះ ខណៈ​នាង​ប្រាប់​ត្រឹម​ថា៖ «ត្រូវ​វះកាត់​ព្រោះ​តែ​មាន​ដុំគីស​នៅ​ក្នុង​ភ្នែក តែ​ពេល​នេះ​វះកាត់​បាន​ជោគជ័យ​ហើយ»។

បន្ថែម​ពី​នោះ តារា​ចម្រៀង​មាន​កំណើត​ពី​ទឹកដី​ខេត្ត​ព្រៃវែង​និង​ធ្លាប់​ធ្វើជា​អ្នក​លក់​អំពៅ​សាង​ផង អ្នកនាង ពេជ្រ សោភា បាន​ត្អូញ​ប្រាប់​អ្នកគាំទ្រ​នាង​ថា៖ «គ្មាន​អី​ឈឺ​ដូច​វះ​ភ្នែក​ទេ»។

ទោះ​យ៉ាងណា អ្នកនាង ពេជ្រ សោភា មិន​បាន​បញ្ជាក់​លម្អិត​អំពី​ស្ថានភាព​ជំងឺ​ភ្នែក​ថា ឈឺ​តាំងពី​ពេល​ណា? ហើយ​ការ​ឈាន​ទៅការ​វះកាត់​នេះ​ស្ថិត​ក្នុង​កម្រិត​បែប​ណា​ទេ។

បន្ថែម​ពីលើ​សារ​នោះ អ្នកនាង​ប្រាប់​អ្នកគាំទ្រ​នៅ​ក្នុង​បណ្តាញ​សង្គម ដែរ​ថា៖ «ពេល​នេះ​ខ្ញុំ​បាន​ធូរ​ច្រើន តែ​គ្រាន់​ថា​នៅ​ឈឺ​នៅ​ស្នាម​របួស​ប៉ុណ្ណឹង​ទេ បន្តិច​ទៀត នឹង​ធ្វើ​ការងារ​សិល្បៈ​បាន​ធម្មតា នេះ​ពេទ្យ​ឲ្យ​សម្រាក​បន្តិច​សិន»។

ប៉ុន្តែ​ដោយ​ឡែក នាង​ក៏មាន​ផូស្តសារ​ត្អូញត្អែរ និង​ភាព​ឯកា​បន្ត​នៅ​ក្នុង​បណ្ដាញ​ហ្វេសប៊ុក​នាង​ថា៖ « ដឹង តែ​ធ្វើជា​មិនដឹង​តឹងចិត្ត​ណាស់ បើ​ចិត្ត​គេ​មិន​នៅ​ក្បែរ​យើង​ផង ចង​គេ​ក៏អត់​ន័យ​ដែរ យើង​ខំ​តាម​គេ​អស់ពី​ចិត្ត​ហើយ»។

តប​នឹង​សារ​ចុង​ក្រោយ​នេះ តារា​ចម្រៀង​ស្រី​ដែល​ធ្លាប់​ធ្វើ​ឲ្យ​អ្នកដទៃ​ច្រណែន​ពី​ស្នេហា​នាង​រូបនេះ ក៏​ទទួល​បានការ​លើក​ទឹកចិត្ត​ពី​អ្នកគាំទ្រ​នាង​ជាច្រើន ដែល​ពួកគេ បង្ហាញ​សារ​លួង​លោម អ្នកនាង​ថា៖ «បង​គ្មាន​រឿង​អី​ដោះស្រាយ​មិន​បាន​នោះ​ទេ។ បង​ភា​ខ្ញុំ រឹងមាំ​ឡើង​វិញ បង​ជា​តារា​ចម្រៀង​ល្បី បង​កុំ​បាក់​ទឹកចិត្ត​ទៀត​អី ពួក​ខ្ញុំ​គាំទ្រ​បង​ជានិច្ច»៕

0

Comments

Please, login or register to post a comment