Search form

Login - Register | FOLLOW US ON

Logo of Phnom Penh Post newspaper Phnom Penh Post - ពែ​កមី ដាក់ទុន​ជាង $ ២ ម៉ឺន ថតកុន​ដឹកនាំ​និពន្ធ​ខ្លួនឯង​ដំបូង

Content image - Phnom Penh Post
តារាកំប្លែង​លោក ពែកមី ។ វុទ្ធី

ពែ​កមី ដាក់ទុន​ជាង $ ២ ម៉ឺន ថតកុន​ដឹកនាំ​និពន្ធ​ខ្លួនឯង​ដំបូង

ភ្នំពេញៈ បន្ទាប់ពី​បាន​សម្តែង​ក្នុង​ខ្សែភាពយន្ត​ឲ្យ​គេ​ជាច្រើន​រឿង​មក​នោះ ស្រាប់តែ​នៅពេល​ថ្មីៗ​នេះ ក៏លេច​ឮល្ហៀងៗ​ថា​តារា​កំប្លែង​ល្បី នាយ​ពែកមី ប្រចាំ​ក្រុម​កំប្លែង​ទូរទស្សន៍​ស៊ីធីអ៊ិន ហ៊ាន​ដាក់ទុន​ជា​លើក​ដំបូង​លើ​ការផលិត និង​ដឹកនាំ​រឿង​ដោយ​ខ្លួនឯង សម្រាប់​ខ្សែ​ភាពយន្ត​ខ្នាតធំ​មួយគឺ​រឿង «អាតួ​កូន​ឪ» ខណៈ​ក៏មាន​ការជួយ​ជ្រោមជ្រែង​ពី​ផលិតកម្ម​រេដភីឈ័​រដែរ។

គេ​ឃើញ​ខ្សែ​ភាពយន្ត​ខ្នាតធំ​ចំនួនពីរ​បាន​ធ្វើពិធី​ក្រុង​ពាលី​រួមគ្នា​កាលពី​ថ្ងៃទី ១៧ ខែតុលា ឆ្នាំ ២០១៦ កន្លង​មក ខណៈ​ដែល​លោក ឌៀប សុណ្ណ​ដារ៉ា ជា​ចាងហ្វាង​ផលិតកម្ម​រេដភីឈ័រ បានឲ្យ​ដឹងថា៖ «រឿង អាតួ​កូន​ឪ ជាការ​ដាក់ទុន​ផលិត​របស់​នាយ ពែកមី ចំណែក​ឯ​រឿង សសរ​កណ្តាល គឺជា​ការដាក់ទុន​របស់​ផលិតកម្ម​ខ្ញុំ»។

ចំពោះ​ការចំណាយ​ប្រាក់​ដើម្បី​ដាក់ទុន​ជា​លើក​ដំបូង​លើ​ខ្សែភាពយន្ត​រឿង «អាតួ​កូនឪ» នឹងត្រូវ​ចាយ​ប្រាក់​អស់​ប៉ុន្មាន នាយ ពែកមី មិនបាន​ប្រាប់ឲ្យ​ដឹង​នោះទេ ដោយសារ​លេខ​ទូរស័ព្ទ​របស់​លោក​ខណៈ​ភ្នំពេញ​ប៉ុស្តិ៍​បាន​ទាក់ទង​លោកជា​ច្រើនដង​មក​គ្មាន​អ្នកណា​លើក។

តែបើ​តាមការ​បង្ហើប​អំពី​សំណាក់​លោក ឌៀប សុណ្ណ​ដារ៉ា ឲ្យ​ភ្នំពេញ​ប៉ុ​ស្តី​ដឹងថា៖ «រឿង​នោះ-[អាតួ​កូន​ឪ] របស់​លោក ពែកមី នឹងត្រូវ​ការចំណាយ​ប្រាក់​ប្រមាណ​អស់​ជាង ២ ម៉ឺន ដុល្លារ​ត្រូវចាយ​ទៅលើ​ថ្លៃខ្លួន​តួសម្តែង និង​លើថ្លៃ​ចំណី​អាហារ​នានា តែខាង​ផលិតកម្ម​របស់​យើងជួយ​បច្ចេកទេស​កាមេរ៉ា​ថត និង​ការកាត់ត​នានា​នោះ​យើង​ជួយ​គាំទ្រ​ដល់គាត់»។

មិនបាច់​ប្រាប់​ក៏គេ​អាច​សន្និដ្ឋាន​ដឹង​ដែរថា កុន​ដំបូង ដែលជា​ការនិពន្ធ ដឹកនាំ​រឿង និង​ចំណាយ​ប្រាក់​ដោយ​នាយ ពែកមី នោះ​ក៏មាន​តួសម្តែង​ពីសំណាក់​កុមារា រឹម សុរ៉ា​ហ៊ា​ទ្រី ហៅ​អាតួ វ័យ ៤ ឆ្នាំ ដែល​ជា​កូនប្រុស​ពូជ​លោក​ផ្ទាល់​ធ្លាប់បាន​សម្តែង​កុន​លើកទី ១ រួចហើយ​ដែរ​ឲ្យ​ផលិតកម្ម​រេដភីឈ័រ នាពេល​កន្លងមក​គឺរឿង «សង្សា​ខ្ញុំ​ក្រមុំ​កូន១» និង​បន្ថែម​វត្តមាន​កូនស្រី​ច្បង​ម្នាក់ទៀត​នៅលើក​នេះ ខណៈ​តួសម្តែង​រួមមាន​ដូចជា នាយ ពែកមី នាយ​គ្រឿន លោក​ប៊ីអាងជី គ្រូបង្រៀន​ភាសា​ចិន ចាង អ៊ីឈីន និង​តារា​សម្តែង​ប្រុសស្រី​ដទៃទៀត។

ខណៈ​ដំណើរ​ការថត អត្ថន័យ​សាច់រឿង និង​ពេលវេលា​នៃ​ការចាក់​បញ្ចាំង​រឿង​ទាំងពីរ​ខាងលើ ក៏ត្រូវ​បាន​លោក ឌៀប សុវណ្ណ​ដារ៉ា បាន​ប្រាប់ថា៖ «រឿង​ទាំងពីរ​នេះ​យើង​នឹងត្រូវ​ចំណាយពេល​ថត​ឲ្យចប់​សព្វគ្រប់​ក្នុង​រយៈពេល​បួនខែ។ អាតួ​កូនឪ ជា​សាច់រឿង​កំប្លែង​បែប​សប្បាយៗ ដែល​សម្តែង​ដោយ​តួកំប្លុក​កំប្លែង​ជាច្រើន ខណៈ​ឯរឿង​សសរ​កណ្តាល ជា​រឿង​ភ័យរន្ធត់​លោះ​ព្រលឹង មានឈុត​ខ្មោចលង លាយ​កំប្លែង។ ហើយ​រឿង​ទាំងពីរ​អាច​នឹងត្រូវ​ចាក់​បញ្ចាំង​នៅតាម​រោងកុន​នានា អាច​បានមុន​ខែកុម្ភៈ​ឆ្នាំ ២០១៧»។

បើតាម​ប្រភពពី​អ្នកសិល្បៈ​នានា បាន​បង្ហើប​ឲ្យដឹង​ដែរថា​សម្រាប់​ទំនាក់​ទំនង​រវាង​នាយ ពែកមី និង​លោក ឌៀបសុវណ្ណ​ដារ៉ា ដែលជា​ចាងហ្វាង​ផលិតកម្ម​រេដភីឈ័រ ពិតជា​សិ្នទ្ធស្នាល​នឹងគ្នា​ល្អខ្លាំង​ណាស់ ដូច្នោះ​ហើយ​បាន​ពួកគាត់​ហ៊ាន​សម្រេចចិត្ត​ចាប់ផ្តើម​ផលិត​ខ្សែ​ភាពយន្ត​រួមគ្នា ដើម្បី​ប្រកួត​ប្រជែង​លើ​ទីផ្សារ​ខ្សែភាពយន្ត​នាពេល​បច្ចុប្បន្ន​នេះ៕

0

Comments

Please, login or register to post a comment

ព័ត៌មានពាក់ព័ន្ធ