Search form

Login - Register | FOLLOW US ON

Logo of Phnom Penh Post newspaper Phnom Penh Post - ពែកមី និង សង្សារ ចន ច័ន្ទ គ្រោង​ផលិត​កុន​កំប្លែង​រួមគ្នា

Content image - Phnom Penh Post
តារាកំប្លែង នាយ ពែកមី និងលោក ហេង ឡុង​​។ ហ្វេសប៊ុក

ពែកមី និង សង្សារ ចន ច័ន្ទ គ្រោង​ផលិត​កុន​កំប្លែង​រួមគ្នា

ភ្នំពេញ: ថ្មីៗ​នេះ ការ​ភ្ញាក់ផ្អើល​ពីតារា​កំប្លែង​ប្រចាំ​ប៉ុស្តិ៍​ទូរទស្សន៍​ស៊ីធីអិន នាយ ពែកមី ជាមួយ​សារ​ដែល​បង្ហោះ​តាម​ហ្វេសប៊ុក ពេល​ឈរ​ថតរូប​ជាមួយ​លោក ហេង ឡុង ដែល​មហាជន​បាន​ស្គាល់​ច្បាស់​ថា ជា​អនាគត​ស្វាមី​របស់​តារា​សម្តែង​ស្រី​ជើង​ចាស់ អ្នកនាង ចន ច័ន្ទលក្ខិណា នោះ​ពួកគេ​ក៏បាន​លើក​ឡើង​ថា៖ «ខ្ញុំនឹង​ផលិត​កុន​កំប្លែង​ជាមួយ​គាត់ សូម​ជួយ​គាំទ្រ​ផង​បងប្អូន» ហើយ​លោក ហេង ឡុង ក៏បាន​បន្ទរ​សំណួរ​ថា៖ «ប្រសិនបើ ពួកយើង​ផលិត​រឿង​កំប្លែង​រួមគ្នា តើ​បងប្អូន​ណាខ្លះ​គាំទ្រ​ស្នាដៃ​នាយ​ពែកមី? បើ​មានការ​គាំទ្រ​គ្រប់គ្រាន់​ពួក​យើង​នឹង​ចាប់ផ្តើម»។

នា​អំឡុងពេល​រំលែក​ទុក្ខ​នៃ​មរណភាព​សព​ពិធីករ​ល្បី​ជើងចាស់​ប្រចាំ​ទូរទស្សន៍​ស៊ីធីអិន គឺ​លោក អ៊ិត សេដ្ឋា នោះ ក៏ឃើញ​វត្តមាន​អ្នក​ទាំងពីរ (គឺ​នាយ ពែកមី និង​លោក ហេង ឡុង) ក៏ជា​ជនសកម្ម ដែល​បាន​ជួយ​ជ្រោមជ្រែង​រៃអង្គាស និង​កៀរគរ​ប្រាក់​សប្បុរសធម៌ ពីបណ្តាជន​ទាំង​នៅ​ក្នុង​សិល្បៈ និង​ក្រៅ​សិល្បៈ ដើម្បី​យក​មក​ជួយ​សម្រួលការ​លំបាក​នៃគ្រួសារ​របស់​សព​ពិធីករ​រូបនេះ​ផងដែរ។

ភ្ជាប់​ជាមួយ​រូបថត​នាយ​ពែកមី ជាមួយ​សង្សារ​អ្នកនាង ចន ច័ន្ទលក្ខិណា ក៏មាន​សំណួរ​ចោទ​ឡើង​ថា «តើ​នាយ ពែកមី ពិតជា​សហការ​រួមគ្នា​ថតកុន​កំប្លែង​ជាមួយ​នឹង​លោក ហេង ឡុង មែនឬ? ឬមួយ​គ្រាន់តែ​ជាការ​ថតរួម​ជាមួយគ្នា ហើយ​ក៏ឆ្លៀត​បង្ហោះ​សារ​និយាយ​លេង​សើច​ទេ​ដឹង?»។

ដំណឹង​ថតកុន​កំប្លែង​រួមគ្នា​ជាមួយ​លោក ហេង ឡុង បុរស​ពោះម៉ាយ​កូន ១ ជាម្ចាស់​ស្នេហ៍​តារា​សម្តែង​ជំនួញ​រីកដូច​ផ្សិត​ច្រើន​មុខ អ្នកនាង ចន ច័ន្ទលក្ខិណា ត្រូវបាន​នាយ ពែកមី បកស្រាយ​ថា​ជាការ​ពិត​មែន។

តារា​កំប្លែង​មាន​ឈ្មោះ​ពិត សែម ចាន់ដារ៉ា ដែល​ធ្លាប់​មាន​ប្រវត្តិ​លំបាក​មាន​កំណើត​កើត​ជានៅ​ខេត្ត​ស្វាយរៀង នាយ ពែកមី បាន​ប្រាប់ ភ្នំពេញ ប៉ុស្តិ៍​ថា៖ «យើង​ទាំងពីរ​ពិត​ជាមាន​គម្រោង​ការរួម​គ្នា​ថតកុន​កំប្លែង​ដើម្បី​យក​ទៅ​ចាក់​បញ្ចាំង​នៅ​តាម​រោងកុន​នានា​ក្នុង​ប្រទេស​កម្ពុជា​ប្រាកដ​មែន ហើយ​មិនមែន​ជាការ​បង្ហោះ​សារ​ដើម្បី​លេង​សើច​នោះ​ឡើយ»។

យ៉ាងណា​គេ​ក៏នៅ​ពុំទាន់​ដឹង​ច្បាស់​ទេថា តើ​នាយ ពែកមី និង​លោក ហេង ឡុង នឹងត្រូវ​ចំណាយ​ដើមទុន​ចំនួន​ប៉ុន្មាន​ដាក់​រួមគ្នា នឹង​បង្កើត​ផលិតកម្ម​ឈ្មោះ​អ្វី ឬមាន​គម្រោង​ផលិត​កុន​កំប្លែង​ចំណង​ជើង​អ្វីដែរ។

តារា​កំប្លែង​ប្រុស​ជា​រៀមច្បង​គ្រួសារ​នៃក្រុម​តារា​កំប្លែង​ប្រចាំ​នៅ​ទ្រនំ​ក្រុមហ៊ុន​ទូរទស្សន៍ CBS ដែល​ពូកែ​អូសទាញ​បងប្អូន​បង្កើត​ខ្លួន​ឲ្យចូល​វិស័យ​សិល្បៈ​កំប្លែង​បាន​ល្បី និង​ថ្មីៗ​នេះ​ថែម​ទាំង​បាន​បណ្តុះ​កូនៗ​ខ្លួន​ឲ្យចេះ​រកប្រាក់​ពីវិស័យ​សិល្បៈ​ទាំង​ក្មេងខ្ចី​ទៀត​ផង​នោះ នាយ ពែកមី បាន​ប្រាប់​ថា លោក​នឹង​ចាប់​ផ្តើមធ្វើ​កិច្ចការ​ថតកុន​ជាមួយ​លោក​ហេង ឡុង ក្រោយ​ពេល​បញ្ចប់​កិច្ចការ​ជួយ​សម្រួល​ដល់​ជីវភាព​នៃគ្រួសារ​របស់​សព​លោក អ៊ិត សេដ្ឋា។

នាយ ពែកមី ឲ្យ​ដឹង​ទៀត​ថា៖ «ដោយសារ​ជាប់រវល់​កិច្ច​ការជួយ​គ្រួសារ​សព​នោះ​ខ្ញុំសុំ​មិនទាន់​ជម្រាប​លម្អិត​ពីគម្រោងការ​រួមគ្នា​នោះបាន​នៅ​ឡើយ​ទេ។ គ្រាន់តែ​សុំ​បញ្ជាក់​ប្រាប់​ថា គឺខ្ញុំ និង​លោក ហេង ឡុង មាន​គម្រោង​នោះ​ពិតមែន ហើយ​នឹង​ចាប់ផ្តើម​ធ្វើ បន្ទាប់​ពី​ខ្ញុំបញ្ចប់​កិច្ច​ការជួយ​គ្រួសារ​របស់​បង អ៊ិ​ត សេដ្ឋា សិន»៕

0

Comments

Please, login or register to post a comment

ព័ត៌មានពាក់ព័ន្ធ