Search form

Login - Register | FOLLOW US ON

Logo of Phnom Penh Post newspaper Phnom Penh Post - ភ្ញាក់ផ្អើល មាស សុខសោភា លេច​មុខ​លើ​ឆាក​តន្ត្រី​ស្រុក​ស្រែ

Content image - Phnom Penh Post
មាស សុខសោភា បង្ហើរ​សំនៀង​លើ​ឆាក​តន្ដ្រី​ព័ទ្ធ​ដោយ​រុក្ខជាតិ​ និង​ភ្នំ​ជា​ផ្ទៃ​ក្រោយ​។ ហ្វេសប៊ុក

ភ្ញាក់ផ្អើល មាស សុខសោភា លេច​មុខ​លើ​ឆាក​តន្ត្រី​ស្រុក​ស្រែ

ភ្នំពេញៈ ទើបតែ​បង្កការ​ភ្ញាក់ផ្អើល និង​បាន​បញ្ជាក់​រឿង​ដី​ចម្ការ​ផ្ទាល់​ខ្លួន​មាន​ទំហំ​ជិត ១០០ ហិកតា នៅ​ខេត្ត​កំពង់ធំ ក្រៅ​ពី​សកម្មភាព​ចូលរួម​ថែរក្សា​ព្រៃ​សហគមន៍ នៅ​តំបន់​ភ្នំ​ឱរ៉ាល់ ខេត្ត​កំពង់ស្ពឺ នោះ​តារា​ចម្រៀង​ស្រី​រះ​លើ​ទ្រនំ​ថោន​ចាស់​វស្សា អ្នកនាង មាស សុខសោភា ក៏​បន្ថែម​ភាព​ប្លែក​អារម្មណ៍​ថ្មី​មួយ​ទៀត​គឺ​វត្តមាន​ឡើង​ច្រៀង​តាម​ឆាក​តន្ត្រី​បែប​ស្រុក​ស្រែ​ចម្ការ​ក្បែរ​តំបន់​ភ្នំ​កម្រ​បាន​ឃើញ។

កុំថាឡើយ​ប្រិយមិត្ត​អ្នកគាំទ្រ សូម្បីតែ​ក្រុម​អ្នក​ចូលចិត្ត​តាម​ប្រមាញ់​ពី​សកម្មភាព​សិល្បៈ ឬ​ជីវិត​ឯកជន​របស់​នាង ក៏មាន​ការ​ចម្លែក​អារម្មណ៍​នាពេល​ឃើញ​ថា តារា​រូប​នេះ ស្រាប់​តែ​បង្ហាញ​វត្តមាន​សម្តែង​លើ​ឆាក​តន្ត្រី​ដ៏​សាមញ្ញ​ទៅ​វិញ។

តារាចម្រៀង​ស្រី ដែល​មាន​ចិត្ត​ស្រឡាញ់​ផ្នែក​បរិស្ថាន នៃ​សម្រស់​ធម្មជាតិ​អ្នកនាង មាស សុខសោភា ប្រាប់​ភ្នំពេញ​ប៉ុស្តិ៍​ឲ្យដឹង​ថា៖ «ចាស! រូបភាព​ដែល​បាន​ច្រៀង​លើ​ឆាក​តន្ត្រី​ឯ​តំបន់​ស្រុក​ស្រែ​ចម្ការ​នោះ គឺ​ពិតជា​កម្រ​បាន​ឃើញ​មែន​ព្រោះ​ថា អ្នករៀបចំ​កម្មវិធី​នេះ​គាត់ [ជា​ភរិយា​របស់​មន្ត្រី​ជាន់​ខ្ពស់​ម្នាក់​សុំ​មិន​បញ្ចេញ​ឈ្មោះ] មាន​បំណង​ចង់​ធ្វើ​ឲ្យ​ស្វាមី​គាត់​មាន​ការ​ភ្ញាក់ផ្អើល ក្នុង​ថ្ងៃ​ប្រារព្ធ​ខួប​កំណើត ដែល​ធ្វើ​ឡើង​នា​ពេល​ថ្ងៃ ហើយ​មាន​ទីតាំង​នៅ​ក្បែរ​តំបន់​ភ្នំ​ទៀត​ផង គឺ​ពិតជា​មាន​ភាព​ចម្លែក​មែន​ទែន សូម្បី​តែ​នាង​ខ្ញុំ​ជាអ្នក​ចម្រៀង ដែល​ត្រូវគេ​អញ្ជើញ​ទៅ​ច្រៀង​នោះ​ក៏​យល់​ថា ប្លែក​ដែរ»។

ដោយ​ឡែក​វត្តមាន​ច្រៀង​នៅ​លើ​ឆាក​តន្ត្រី​ដូចជា​ក្រុម​តារា​ចម្រៀង​ប្រចាំ​តាម​ភូមិ​នៅ​ក្នុង​ឱកាស​ពិធី​មង្គលការ ជប់លៀង ឬ​កម្មវិធី​នានា​របស់​អ្នកនាង មាស សុខសោភា នោះ ក៏មាន​ការ​លើក​ឡើង​បែប​ឆ្ងល់​ដែរ​ថា តើ​តារា​ចម្រៀង​ស្រី​កំពូល​ប្រចាំ​ផលិតកម្ម​ថោន​ម្នាក់​នេះ ពិតជា​អាច​មក​បង្ហើរ​សំនៀង​នៅ​តាម​ឆាក​តន្ត្រី​ដ៏​សាមញ្ញ​នៃ​ស្រុក​ស្រែ​ចម្ការ​អ៊ី​ចឹង​បាន​មែន​ឬទេ?

បើតាម​ការ​បង្ហើប​ប្រាប់​ពី​សំណាក់​តារា​ចម្រៀង​ស្រី​សំឡេង​ដ៏​ស្រទន់ ដែល​មាន​ទឹកដម​ដ៏ពីរោះ​រណ្តំ​ដួងចិត្ត​ប្រិយមិត្ត​សណ្តាប់​អ្នកនាង មាស សុខសោភា បន្ត​ឲ្យដឹង​ថា៖ «អូ!តាម​ពិត​ទៅ សម្រាប់​នាង​ខ្ញុំ ជា​តារា​ចម្រៀង​របស់​មហាជន មិន​ដែល​មានការ​ប្រកាន់​ខ្លួន​ថា ជា​ឆាក​ប្រគំ​តន្ត្រី​នៅ​ទីក្រុង ឬ​នៅ​ស្រែ​ចម្ការ​នោះ​ទេ។ ប្រការ​ដែល​សំខាន់​នោះ ឲ្យតែ​បងប្អូន​យើង​លោក​អញ្ជើញ​ហៅ​ទៅ​សម្តែង​សម​ស្រប ទៅ​តាម​កម្រៃ​នៃ​អ្នកសិល្បៈ​ដែល​អាស្រ័យ​ការប្រកប​របរ​ចិញ្ចឹម​ជីវិត​ដោយ​អាជីព​នេះ​គឺ​នាង​ខ្ញុំ​ទទួល​ទាំងអស់»។

កន្លង​មក​ថ្មីៗ​នេះ​ដែរ តារា​ចម្រៀង​ស្រី​រះ​នៅ​លើ​ទ្រនំ​ថោ​ន​ចាស់​វស្សា​ជាង​គេ​អ្នកនាង មាស សុខសោភា ក៏​ទើប​តែ​បាន​បញ្ជាក់​ចំពោះ​រូបភាព​ឃើញ​នាង និង​ក្រុម​ការងារ​នាពេល​ទៅ​លេង​កម្សាន្ត​ឃើញ​មាន​រូប​ដើ​មឈើ​ធំៗ​នោះ កុំ​យល់​ច្រឡំ​ថា​ជា​តំបន់​នៅ​មាន​ព្រៃឈើ​ច្រើន​ដែរ​ថា៖ «សូម​បងប្អូន​កុំ​ច្រឡំ​ថា ជា​តំបន់​ព្រៃ​អី ដែល​តាម​ពិត​ទៅ​នាង​ខ្ញុំ និង​ក្រុម​សាច់ញាតិ​បាន​មក​ទិញ គឺ​នៅ​ទីនេះ​វា​បាន​អស់​ព្រៃ​ទៅ​ហើយ ខណៈ​នៅ​សល់​តិចតួច​ដូច​បាន​ឃើញ​នេះ នាង​ខ្ញុំ​ខំ​ឲ្យ​ក្រុម​សាច់​ញាតិ ដែល​មាន​លំនៅឋាន​ក្នុង​តំបន់​ចម្ការ​ថែ​ទាំ​រហូត​មក​ទើប​នៅ​សល់​ធំ​ដូច្នេះ»៕

0

Comments

Please, login or register to post a comment