Search form

Login - Register | FOLLOW US ON

Logo of Phnom Penh Post newspaper Phnom Penh Post - មន្ទីរពេទ្យ​កុមារអង្គរ​សម្រេច​បាន​គោលដៅ​ជួយ​ក្មេង​កើត​មហារីក

កម្មវិធី​បណ្ដុះបណ្ដាល​គ្រូពេទ្យ​កុមារ និង​គិលានុបដ្ឋាយិកា នៅ​មន្ទីរពេទ្យ​កុមារអង្គរ ខេត្ត​សៀមរាប​។
កម្មវិធី​បណ្ដុះបណ្ដាល​គ្រូពេទ្យ​កុមារ និង​គិលានុបដ្ឋាយិកា នៅ​មន្ទីរពេទ្យ​កុមារអង្គរ ខេត្ត​សៀមរាប​។ រូបថត សហការី

មន្ទីរពេទ្យ​កុមារអង្គរ​សម្រេច​បាន​គោលដៅ​ជួយ​ក្មេង​កើត​មហារីក

សៀមរាប: ឆ្នាំ​មុន​មន្ទីរពេទ្យ​កុមារអង្គរ​សម្រេច​បាន​គោលដៅ​អភិវឌ្ឍន៍​ខ្លួន​ជា​អង្គការ​នៅ​តំបន់​អាស៊ី​ដែល​ផ្ទេរ​ការ​គ្រប់គ្រង​ពី​អង្គការមិត្ត​គ្មាន​ព្រំដែន​របស់​អាមេរិក​ទៅ​ឲ្យ​បុគ្គលិក​កម្ពុជា។

ក្រៅពី​ចេញ​ផ្សាយ​នូវ​របាយការណ៍​ប្រចាំ​ឆ្នាំ​របស់​ខ្លួន សព្វថ្ងៃ​មន្ទីរពេទ្យ​បាន​សាទរ​នឹង​ជ័យជម្នះ​ថ្មី​មួយ។

លោក​វេជ្ជបណ្ឌិត ងួន ចន្ទភក្ត្រា នាយករង​មន្ទីរពេទ្យ​កុមារអង្គរ​បាន​ឲ្យ​ដឹង​ថា៖ «ចាប់​តាំងពី​មន្ទីរពេទ្យ​នេះ​បើក​ដំណើរការ​នៅ​ឆ្នាំ​១៩៩៩ អង្គការ​មិត្ត​គ្មាន​ព្រំដែន​បាន​គាំទ្រ និង​ជ្រើសរើស​យើង។ គោលដៅ​ធំ​របស់​ស្ថាបនិក​មន្ទីរពេទ្យ​លោក ឃិនរូ អ៊ីហ្សូ គឺ​ប្រែ​ក្លាយ​ទី​នេះ​ជា​មន្ទីរពេទ្យ​ខ្មែរ ដែល​ដឹកនាំ​ដោយ​កូនខ្មែរ»។

គោលដៅ​នេះ​សម្រេច​បាន​ហើយ ដូច្នេះ​មន្ទីរពេទ្យ​បាន​អភិវឌ្ឍ​ខ្លួន​មួយ​កម្រិត​ទៀត​គឺ​ការ​សម្ពោធ​បន្ទប់​ថែទាំ​ទារក​ក្រោយ​ប្រសូត ជំរុញ​ការ​បរិច្ចាគ​ឈាម​ពី​ប្រជាជន​ខ្មែរ និង​បង្កើត​ផ្នែក​ព្យាបាល​ជំងឺ​មហារី​ដោយ​ប្រភេទ​ថ្នាំ​គីមី (​Chemotherapy)។

លោក​វេជ្ជបណ្ឌិត​បាន​ថ្លែង​ទៀត​ថា៖ «អំឡុង​ធ្វើ​អន្តរកាល​ឆ្នាំ ២០១៣ យើង​បាន​ផ្ដួចផ្ដើម​នូវ​គម្រោង​នា​ថ្ងៃ​អនាគត​ថា​តើ​មន្ទីរពេទ្យ​នឹង​ឆ្ពោះ​ទៅ​ទិសដៅ​ណា​ក្រោម​ការ​ដឹកនាំ​របស់​បុគ្គលិក​ជា​ជនជាតិ​ខ្មែរ​យើង»។

លោក​រំឭក​ផង​ដែរ​ថា៖ «យើង​បាន​ជោគជ័យ​ក្នុង​ការ​បង្កើត​សាល​ថែទាំ​ទារក​ក្រោយ​សម្រាល ខណៈ​កាល​មុន​យើង​តែង​ដាក់​ទារក​ទើប​នឹង​កើត​នៅ​លាយឡំ​ជាមួយ​អ្នក​ជំងឺ​ទូទៅ ហើយ​វា​មិន​ល្អ​នោះ​ទេ»។

កុមារី នីកា បាន​ជាសះស្បើយ​ក្រោយពី​ព្យាបាល​មហារីក​ភ្នែក​។
កុមារី នីកា បាន​ជាសះស្បើយ​ក្រោយពី​ព្យាបាល​មហារីក​ភ្នែក​។ រូបថត សហការី

យោងតាម​ស្ថិតិ​ពី​មន្ទីរពេទ្យ កាលពី​ខែ​មុន​មាន​ទារក​៣០០​នាក់​ស្ថិត​ក្នុង​បន្ទប់​ថែទាំ​ក្រោយ​សម្រាល។

លោក​វេជ្ជបណ្ឌិត​ក៏​បាន​គូស​បញ្ជាក់​ផង​ដែរ​ថា៖ «យើង​ក៏​បាន​ចាប់ផ្ដើម​ការ​ព្យាបាល​ជំងឺ​មហារីក​កុមារ​នៅ​ឆ្នាំ ២០១៣។ ដូច​ដឹង​ស្រាប់​ហើយ​ថា នៅ​កម្ពុជា យើង​ពិបាក​រក​កន្លែង​ណា​ថែទាំ​ព្យាបាល​កុមារ​កើត​ជំងឺ​នេះ​ណាស់ ហើយ​ភាគច្រើន​ពួកគេ​តែងតែ​ស្លាប់។ នៅ​ប្រទេស​អភិវឌ្ឍន៍ អ្នក​កើត​ជំងឺ​មហារីក​ភ្នែក​​ ៩០​ភាគ​មាន​សង្ឃឹម​រស់ ប៉ុន្តែ​នៅ​ស្រុក​ខ្មែរ​ពួកគេ​អាច​ស្លាប់។ ដូច្នេះ​ហើយ​ទើប​យើង​ចាប់ផ្ដើម​កម្មវិធី​ព្យាបាល​មហារីក ហើយ​កុមារ​ជា​អ្នក​ជំងឺ​ដំបូង​របស់​យើង​ត្រូវ​បាន​ព្យាបាល​ដោយ​ជោគជ័យ»។

នៅ​ខេត្ត​សៀមរាប លោក​វេជ្ជបណ្ឌិត​បញ្ជាក់​ថា មាន​តែ​មន្ទីរពេទ្យ​កុមារអង្គរ​មួយ​គត់​ដែល​ផ្ដល់​សេវា​ព្យាបាល​មហារីក​។ អ្នកជំងឺ​ដំបូង​បាន​ជាសះស្បើយ​គឺ​កុមារី នីកា ដែល​មាន​សុខភាព​ប្រសើរ​ឡើង​វិញ​ក្រោយពី​ការ​វះកាត់​ភ្នែក​ខាង​ស្ដាំ និង​ការ​ព្យាបាល​ជាច្រើន​ដំណាក់កាល​មក។

ចាប់​តាំងពី​ឆ្នាំ​២០១៣ បុគ្គលិក​ខ្មែរ​នៅ​មន្ទីរពេទ្យ​កុមារអង្គរ​ក៏​ចាប់ផ្ដើម​វគ្គ​បណ្ដុះបណ្ដាល​ផ្ទៃក្នុង​ផង​ដែរ។

លោក​វេជ្ជបណ្ឌិត ងួន ចន្ទភក្ត្រា បាន​លើក​ឡើង​ថា៖ «យើង​បាន​ធ្វើការ​បណ្ដុះបណ្ដាល​បុគ្គលិក​ផ្ទៃក្នុង​ជា​យូរមកហើយ តែ​កាលពី​មុន​កម្មវិធី​នេះ​ត្រូវ​បាន​ដឹកនាំ​ដោយ​បរទេស ខណៈ​ដែល​ឥឡូវ​នេះ​យើង​ដំណើរការ​ដោយ​ថ្នាក់​ដឹកនាំ​ខ្មែរ​សុទ្ធសាធ។ យើង​បណ្ដុះបណ្ដាល​ដល់​ផ្នែក​ផ្ដល់​សេវា​សុខភាព គិលានុបដ្ឋាយិកា និង​គ្រូពេទ្យ​ប្រចាំការ​ផង​ដែរ»។

កាលពី​ឆ្នាំ​មុន មន្ទីរពេទ្យ​កុមារ​អង្គរ​បាន​បណ្ដុះបណ្ដាល​គ្រូពេទ្យ​កុមារ​ចំនួន​២០​នាក់​ដោយ​ផ្ដោត​ទៅលើ​គុណភាព។ នៅពេល​ដែល​ពួកគេ​បញ្ចប់​ការ​សិក្សា​នៅ​ទី​នេះ​ហើយ ពួកគេ​អាច​ចេញ​ទៅ​បម្រើការ​នៅ​កន្លែង​ណា​មួយ​ប្រកប​ដោយ​ចំណេះដឹង​ព្យាបាល និង​វិជ្ជាជីវៈ៕

0

Comments

Please, login or register to post a comment

ព័ត៌មានពាក់ព័ន្ធ