ភ្នំពេញៈ មហាជន​ជាប្រិយ​មិត្ត​គាំទ្រ​មានការ​ភ្ញាក់ផ្អើល​ផង និង​កោត​សរសើរ​ផង ទៅ​ដល់​តារា​ចម្រៀង​ស្រីដុះ​ស្លែ​ប្រចាំ​នៅ​ផលិតកម្ម​ថោន​កញ្ញា មាស សុខសោភា ខណៈ​នៅពេល​ថ្មីៗ​នាង​បាន​បង្ហោះ​រូបថត​ស្និទ្ធស្នាល​ស៊ី​អារម្មណ៍ ឈរ​កៀកកើយ​នឹង​គូស្នេហ៍​ខ្លួន​នៅ​មាត់ទឹក មាន​ទេសភាព​ថ្ងៃ​រៀបលិច ហាក់​ដូចជា​ការសារ​ភាព​ទម្លាយ​រឿងពិត​ខ្លួន​មួយ ហើយក៏​បង្ហើរសារ​មួយ​ជាភាសា​អង់គ្លេស ដែល​សម្រួល​ជា​ភាសា​ខ្មែរ​ថា៖ «ពេលនេះ​មាន​រយៈ​ពេល ១០ ឆ្នាំ​បាត់! ហើយ​ក៏សង្ឃឹម​ថា បងប្អូន​ប្រិយមិត្ត​គាំទ្រ​ទាំង​អស់ មេត្តា​បើក​ទូលាយ​ចិត្ត​បេះដូង និង​នៅតែ​បន្ត​ការគាំទ្រ​ដល់​នាងខ្ញុំ​ដដែល!» តាម​បណ្តាញ​សង្គម​អ៊ីនស្តាក្រាម។