.jpg)
អ្នកនាង មាស សុខសោភា ច្រៀងក្នុងកម្មវិធីប្រគំតន្ត្រីមួយ។ រូបថត ឈឹម ស្រីនាង
ភ្នំពេញៈ ខណៈដែលតារាប្រុសស្រីនៅទ្រនំសិល្បៈផ្សេងៗ កំពុងតែប្រជែងគ្នាចង់បានកេរ្តិ៍ឈ្មោះបន្ថែមដោយខំឆក់យកឱកាសលើវិស័យចម្រៀងផង និងវិស័យសម្តែងកុនផងនោះ បែរជាតារាចម្រៀងស្រីឈរជួរមុខគេនៃផលិតកម្មថោន មាស សុខសោភា ព្រលយពាក្យលេចឮជាព័ត៌មានថា នាងមិនចង់ក្លាយជាតួកុនអ្វីទេគឺចូលចិត្តវិស័យចម្រៀងជាង។
ខណៈថ្មីៗនេះក៏មានរលកព័ត៌មានគួរឲ្យភ្ញាក់ផ្អើលពីបណ្តាប្រិយមិត្ត គាំទ្ររបស់កំពូលតារាចម្រៀងស្រីលើទ្រនំផលិតកម្មថោន អ្នកនាង មាស សុខសោភា ទើបតែបានភាយចេញម្តងទៀត ក្រោយពីចេញបទចម្រៀងថ្មីប្លែកៗជាច្រើនជាងកាលពីដើមឆ្នាំរបស់តារាចម្រៀងស្រីរូបនេះ ខណៈក៏មានការលេចចេញជាពាក្យពេចន៍លើកឡើងថា ទំនងខ្លាចនាងត្រូវបានផលិតកម្មធំណាមួយចែចូវយកបាត់។
តារាចម្រៀងស្រីសំឡេងស្រទន់ និងនិយមច្រៀងតែបទបែបអូរីជីណល អ្នកនាង មាស សុខសោភា បានបង្ហើបប្រាប់ភ្នំពេញប៉ុស្តិ៍នូវការពិត ខណៈពេលបកស្រាយចម្ងល់មហាជនភ្ញាក់នឹងការចេញស្ទីលរាំ និងបទចម្រៀងថ្មីៗថា៖ «និយាយទៅនាងខ្ញុំ រឿងថតកុននេះ គឺធ្លាប់មានក្រុមហ៊ុន ឬផលិតកម្ម នានា ចង់បានឲ្យទៅថតកុនជារឿយ។ ដោយសារនាងខ្ញុំមិនសូវមានពេលគ្រប់គ្រាន់សម្រាប់ការថតកុនផង និងធ្លាប់បដិសេធមិនទទួលថតកុនដែលពេញចិត្តខ្លួនផង និងសូម្បីតែមកដល់បច្ចុប្បន្ននេះ គឺនៅដដែល គឺថាមិនចង់ទទួលថតកុន ប្រសិនបើសាច់រឿងមិនត្រូវចំណូលចិត្តទេនោះ»។
តារាចម្រៀងស្រី ដែលទើបតែបានពានថ្មីៗពីស្ថានីយវិទ្យុ NRG Radio ជាមួយនឹងតារាចម្រៀងប្រុសនៅសាន់ដេ លោក ឆាយ វីរៈយុទ្ធ និងក្រុមក្មេងខ្មែរដែរ ក៏បានឲ្យដឹងពីមូលហេតុមិនចង់ក្លាយជាតួសម្តែងភាពយន្តដែរថា៖ «តាមពិតនាង មានចំណូលចិត្តខាងសិល្បៈច្រៀងនេះខ្លាំង ដូច្នេះខាងវិស័យសម្តែងកុនមិនសូវចូលចិត្តប៉ុន្មានទេ»។
តែក៏មិនមានន័យថា នាងខ្ញុំនឹងមិនថតកុនសម្រាប់ពេលវេលាតទៅខាងមុខយ៉ាងណានៅឡើយដែរ។ តែគ្រាន់តែមុននឹងទទួលថតនាងខ្ញុំតែងជម្រាបប្រាប់ដល់ផលិតកម្មដែលចង់បាននាងខ្ញុំថតកុននោះ ថាចង់ដឹងសាច់រឿងជាមុនព្រោះថា ប្រសិនបើសាច់រឿងនោះមិនត្រូវចំណូលចិត្តទេ នាងខ្ញុំក៏មិនព្រមទទួលថតដែរ ហើយម្យ៉ាងទៀតកាលណា មិនត្រូវចំណូលនោះ ពេលថតទៅក៏មិនសូវល្អដែរ នេះជាហេតុផលដែលខ្ញុំកម្រទទួលថតកុននោះនាពេលកន្លងមក»។
ដោយឡែកកាលមុនបន្តិចនេះ កំពូលតារាចម្រៀងស្រីលើទ្រនំផលិតកម្មថោន អ្នកនាង មាស សុខសោភា ក៏បានបកស្រាយរឿងដែលបានល្បីថា រូបនាង និងផលិតកម្មកំពុងតែមានរឿងល្អក់កករដែរថា៖ «តាមពិតទៅ រវាងខ្ញុំ និងផលិតកម្មគឺមិនមានអ្វីអាក់អន់ចិត្តគ្នាដូចដែលបងប្អូនមហាជនជាអ្នកគាំទ្រធ្លាប់បានកើតនូវមន្ទិលសង្ស័យនោះទេ»។
នាមួយរយៈពេលចុងក្រោយដែលនាងខ្ញុំមិនសូវសម្បូរបទចម្រៀងនៅផលិតកម្មថោន នោះគឺមកពីនាងខ្ញុំមិនសូវមានពេលយកបទមកច្រៀង និងដោយសារតែនាងខ្ញុំមិនចង់ចេញបទចម្រៀងជាច្រើនដែរ ហើយម្យ៉ាងវិញទៀត ខាងផលិតកម្មក៏រវល់នឹងការងារបង្កើតជាប៉ុស្តិ៍ ទូរទស្សន៍ទៀត ដូច្នេះការផលិតបទថ្មីៗ សម្រាប់ក្រុមតារាចម្រៀងដ៏ច្រើនគឺថាពិតជាមិនងាយស្រួលនោះឡើយ»។
កាលដើមឆ្នាំបានលេចចេញនូវរលកព័ត៌មានថា មានការអាក់អន់ចិត្តរបស់ក្រុមប្រិយមិត្ត អ្នកគាំទ្រតារាចម្រៀងស្រីសំនៀងដ៏ពីរោះស្រទន់ ដែលតែងតែបំពេអារម្មណ៍អ្នកស្តាប់ជាច្រើនឆ្នាំនៅលើទ្រនំផលិតកម្មថោន កើតឡើងផ្ទួនៗ នៅក្នុងឆ្នាំ ២០១៧ នេះ ក៏ធ្លាប់លេចចេញដំណឹងបែបខ្សឹបខ្សៀវថា អ្នកនាង មាស សុខសោភា កំពុងតែមានភរិយារបស់អ្នកធំ បានមកបញ្ចុះបញ្ចូលនាងឲ្យដូរទ្រនំ ខណៈទ្រនំថ្មីរបស់តារាចម្រៀងស្រីល្បីឈ្មោះ មាស សុខសោភា នេះក៏ទំនងជាផលិតកម្មធំមួយនៅក្នុងស្រុកចាប់អារម្មណ៍យ៉ាងខ្លាំង ប្រសិនបើនាងចាកចេញពីទ្រនំសព្វថ្ងៃ ហើយគេក៏ចង់ចរចាផ្ដល់នូវលក្ខខណ្ឌជាច្រើនដល់នាងទៀតផងឲ្យតែនាងយល់ព្រម៕
