Search form

Login - Register | FOLLOW US ON

Logo of Phnom Penh Post newspaper Phnom Penh Post - មុនដំបូង​ខ្មែរក្រហម​សម្លាប់ប៉ា​របស់ខ្ញុំ មហាជន​សំណូមពរ​ឲ្យ​បញ្ចាំង​នៅ​ទូទាំង​ប្រទេស

Content image - Phnom Penh Post
​តារា​ហូលីវូដ និង​ជាផលិតករ​ អេនជេលីណា ជោលី និង​ក្រុម​ការងារ​ខ្មែរ​។ រូប សហការី

មុនដំបូង​ខ្មែរក្រហម​សម្លាប់ប៉ា​របស់ខ្ញុំ មហាជន​សំណូមពរ​ឲ្យ​បញ្ចាំង​នៅ​ទូទាំង​ប្រទេស

ភ្នំពេញ: វេលាចាក់​បញ្ចាំង​លើ​ផ្ទាំង​សំពត់ស​រំកិល​កាន់តែ​ខើចពី​ទស្សនីយភាព​ភាពយន្ត​ប្រវត្តិសាស្ត្រ​ជូរចត់​របស់​ប្រជាជន​កម្ពុជា ផលិត​ឡើង​ដោយ​តារា​ភាពយន្ត​ហូលីវូដ អេនជេលីណា ជោលី រឿង «មុនដំបូង​ខ្មែរក្រហម​សម្លាប់​ប៉ា​របស់ខ្ញុំ» ព្រមនឹង​ការបញ្ចេញ Feature Video ថ្មីបន្ថែម​កាន់តែ​ទាក់ទាញ។ នៅក្នុង​បណ្តាញ​សង្គម​អ្នកបង្ហាញ​អារម្មណ៍​អន្ទះសា​ចង់​ទស្សនា បាន​សំណូមពរ​ឲ្យ​ភាពយន្ត​ស្ដែងពី​តថភាព​សង្គម​ខ្មែរ​កាលពី​អតីតកាល​មួយនេះ ចាក់​បញ្ចាំង​ឲ្យ​ទូលំទូលាយ​ជាងការ​ផ្សព្វផ្សាយ។

នៅក្នុង​គណនី​ហ្វេសប៊ុក First They Killed My Father បង្ហាញជា​សាធារណៈ​ដោយ​ពាក្យពេចន៍​ដ៏សមគួរ​ថា «មាន​កិត្តិយស​សូម​ជម្រាបជូន​ដល់​សាធារណជន​ថា ខ្សែ​ភាពយន្ត​រឿង (មុនដំបូង​ខ្មែរ​ក្រហម​សម្លាប់ប៉ា​របស់ខ្ញុំ) នឹងធ្វើ​ការចាក់​បញ្ចាំង​លើកដំបូង​នៅប្រទេស​កម្ពុជា​នៅ​ថ្ងៃទី ១៨ ខែកុម្ភៈ ស្អែក​នេះ។ រឿងនេះ​នឹងធ្វើ​ការចាក់​បញ្ចាំង​ជូន​ទស្សនា​ជាបន្ត​បន្ទាប់ នៅតាម​បណ្ដាខេត្ត​ក្នុងប្រទេស​កម្ពុជា»។

ហ្វេសប៊ុក​ដដែល​បង្ហាញថា៖ «ភាពយន្ត​ខ្មែរ​ដែលទាញ​ចេញពី​របប​ខ្មែរក្រហម និង​ដឹកនាំ​ដោយ​តារា​លំដាប់​ពិភពលោក ជោលី បញ្ចាំង​ជូន​ប្រជាពលរដ្ឋ​ខ្មែរបាន​ទស្សនា​ចុងសប្ដាហ៍​នេះ នៅលើ​ទឹកដី​អង្គរ​ខេត្ត​សៀមរាប។ បន្ទាប់​ពីនោះ​វានឹង​បន្តមក​បញ្ចាំង​នៅភ្នំពេញ និងខេត្ត​បាត់ដំបង​ថែមទៀត»។

Content image - Phnom Penh Post
អេនជេលីណា ជោលី ផ្ដល់​បទសម្ភាស​ពីភាពយន្ដថ្មី​។ រូប សហការី

ប៉ុន្តែ​យ៉ាងណា អារម្មណ៍​អន្ទះសា​ពីសំណាក់​មហាជន​ខ្មែរ​ដែលចង់​ទស្សនា​ភាពយន្ត​នេះ ត្រូវបាន​សម្គាល់​ឃើញ​នៅក្នុង​បណ្តាញ​សង្គម ក្រោយ​ចេញ Feature Video ថ្មី​រយៈពេល​មួយ​នាទី កាន់តែ​ទាក់ទាញ​ធៀប​នឹង Trailer ចាស់ ដែល​បានចេញ​ផ្សាយពី ១ ខែមុន។ ខណៈ​តារា​ភាពយន្ត​ខ្មែរល្បីៗ​ដែល​សម្តែង​ក្នុង​ភាពយន្តនេះ​អះអាងថា៖ «គោលការណ៍​ផលិតកម្ម គេ កាន់តែ​បង្ហាញ​ឲ្យមាន​ភាព​ទាក់ទាញ​ព្រោះវា​ជាពេលវេលា​ចាក់​បញ្ចាំង​កាន់តែ​ជិតដល់»។

ទោះជា​យ៉ាងណា ការ​អន្ទះសា និង​សំណូមពរ​ឲ្យភាពយន្ត​ខ្មែរក្រោម​ស្នាដៃ​ផលិតករ​ហូលីវូដ​នេះ ចាក់​បញ្ចាំងឲ្យ​បាន​ពេញផ្ទៃ​ប្រទេស​នៅលើ ២៥ ខេត្ត-ក្រុង និង​រាជធានី​នោះ ហាក់មិន​ឆ្លើយតប​ទេ។ ក្រុម​ការងារ​នៃ​ការផលិត​រឿងនេះ លោក ច័ន្ទ ដារ៉ា ប្រាប់​ភ្នំពេញ ប៉ុស្តិ៍ ខ្លីថា៖ «ប្រហែលជា​មិនអាច​ឆ្លើយតប​តាម​សំណូមពរ​នេះទេ ពីព្រោះ​គោលការណ៍​យើងចាក់​បញ្ចាំង​នៅ​ខេត្ត​រាជធានី​ធំជា​គោលដៅ»។

រឿង «មុនដំបូង ខ្មែរក្រហម​សម្លាប់​ប៉ា​របស់ខ្ញុំ» ជា​ភាពយន្ត​ប្រែ​សម្រួល​ចេញពី​ការចងចាំ​ដ៏ឈឺចាប់​របស់​អ្នកស្រី អ៊ឹង លឿង គឺជា​អ្នកនិពន្ធ​សៀវភៅ និង​សកម្មជន​ការពារ​សិទ្ធិ​មនុស្ស។ អ្នកស្រី​បាន​រួចផុតជីវិត​ពីរបប​ខ្មែរក្រហម​ពីឆ្នាំ ១៩៧៥ ដល់​ឆ្នាំ ១៩៧៩។ សាច់​រឿងនេះ​ត្រូវបាន​រៀបរាប់​តាមរយៈ​ការមើលឃើញ​របស់​អ្នកស្រី​តាំងពី អាយុ ៥ ឆ្នាំ នៅពេល​ដែល​ខ្មែរក្រហម​ឡើងកាន់​អំណាច​រហូតដល់​គាត់​អាយុ ៩ ឆ្នាំ៕

0

Comments

Please, login or register to post a comment