.jpg)
តារាសម្ដែង ម៉ៃយ៉ា។ RooSter_KooL Photography
ភ្នំពេញៈ សូម្បីតែសាមីខ្លួនក៏ភ្ញាក់ផ្អើលខ្លាំងដែរពីដំណឹងចុះផ្សាយតាមបណ្តាញសង្គមថា តារាស្រីមានឈាមជ័រកូនកាត់ខ្មែរ-អាល្លឺម៉ង់មានឈ្មោះពិតថា ខាហ្គឺម៉ៃយ៉ា សូរ៉ៃយ៉ាម៉ាថា ហៅកញ្ញា ម៉ៃយ៉ា ក្លាយជាតំណាងឲ្យកម្ពុជានៅក្នុងការប្រកួតតំណែងរាជិនីសម្រស់បវរកញ្ញាចក្កវាឡ ឬ Miss Cambodia Beauty Pageant ឆ្នាំ ២០១៨ ជាមួយនឹងបវរកញ្ញាពីរប្រទេសទេសគឺថៃ និងហ្វីលីពីន។
ថ្លែងទាំងនៅមានភាពងឿងឆ្ងល់នៅឡើយនោះ កញ្ញា ម៉ៃយ៉ា ក៏ប្រាប់ភ្នំពេញប៉ុស្តិ៍ថា៖ «នាងខ្ញុំផ្ទាល់អត់បានដឹងរឿងនោះទេ ហើយខ្ញុំក៏បានឃើញគេចុះផ្សាយរឿងនេះដែរ។ ជាការពិតខាងគេហទំព័រ និងក្រុមអ្នករៀបចំកម្មវិធី ក៏មិនទាន់បានទាក់ទងនាងខ្ញុំដើម្បីចរចា ឬពិភាក្សារឿងបេក្ខភាពជាអ្នកតំណាងរបស់ប្រទេសក្នុងពិភពសិល្បៈបវរកញ្ញានោះនៅឡើយទេ»។
កញ្ញា ម៉ៃយ៉ា បន្តថា៖ «នាពេលភ្លាមៗនេះ នាងខ្ញុំពិតជាមិនអាចពណ៌នា ឬរៀបរាប់ពីអារម្មណ៍ផ្ទាល់ខ្លួនឯងថាយ៉ាងណាបាននោះទេព្រោះមិនដឹងថា វាជាព័ត៌មានពិត ឬមិនពិតផងហ្នឹង!»។
ពេលសួរថា ប្រសិនបើព័ត៌មានពិតខណៈពេលខាងក្រុមការងារប្រកួតខាងលើនឹងទំនាក់ទំនងមកកាន់តារាសម្តែងស្រីរលកក្រោយនៅក្នុងវិថីនៃសិល្បៈសម្តែង ដែលកំពុងតែមានរាសីឡើងរូបនោះ ថាតើនាងពេញចិត្តធ្វើដែរឬទេ?
តារាសម្តែងស្រី ជាម៉ូដែល និងពិធីការិនីទូរទស្សន៍ CNC ទើបតែមានវ័យ ២២ ឆ្នាំ មានរូបឆោមល្អ សាច់សខ្ចី មានទម្រង់មុខស្អាត កូនកាត់ជាតិសាសន៍អាស៊ី-អឺរ៉ុប កញ្ញា ម៉ៃយ៉ា និងល្បីថាសម្បូរក្រុមកន្លង់ចោមរោមតាមសុំស្នេហ៍មិនតិចពីលំដាប់អ្នកមានទ្រព្យស្តុកស្តម្ភរហូតដល់ឋានៈជាឧកញ៉ាបានព្រលយប្រាប់ដែរថា៖ «ប្រសិនបើ មានមែននោះ នាងខ្ញុំអាចនឹងពិចារណា ហើយប្រសិនមានការគាំទ្រពីមហាជនខ្មែរយើងច្រើនផងដែរនោះ នាងខ្ញុំប្រាកដជាយល់ព្រមចូលរួមមិនខាននោះទេ»។
យ៉ាងណាចំពោះការអះអាងថាហ៊ានចូលរួមទៅតាមសំណើខាងក្រុមការងាររៀបចំ និងការជំរុញពីមហាជននោះ កញ្ញា ម៉ៃយ៉ា ក៏រៀងបែបរអារក្នុងចិត្តដែរ ចំពោះបេក្ខភាពសម្រាប់ការប្រកួតប្រជែងរាជិនីសម្រស់បវរកញ្ញាចក្កវាឡឆ្នាំ ២០១៨ នោះ ដោយនាងលើកឡើងថា៖ «ប្រសិនបើមានការទំនាក់ទំនងមកដើម្បីពិភាក្សានឹងខ្ញុំ គឺនាងខ្ញុំក៏មានសំណូមពរផ្ទាល់ខ្លួន ទៅដល់ខាងក្រុមការងាររៀបចំនោះដែរ។ ចំពោះការងារផ្នែកសិល្បៈនាងខ្ញុំអាចសម្របខ្លួនធ្វើទៅបានតាមស្ថានភាព និងកាលៈទេសៈ តែពេលខ្លះការប្រកួតជាលក្ខណៈបវរកញ្ញានេះ មានលក្ខខណ្ឌច្រើនជាងនេះ ដូច្នេះនាងខ្ញុំក៏មិនហ៊ានថា ខ្លួនឯងពូកែគ្រប់យ៉ាងនោះឡើយ»។
តែបើពិនិត្យមើលសារដែលបង្ហោះដ៏វែងអន្លាយ និងមានដាក់រូបបវរកញ្ញាពីរប្រទេសដែលមានសម្រស់ស្រស់ស្អាត និងរូបរបស់កញ្ញា ម៉ៃយ៉ា ដែរនោះ ហាក់ដូចជាមិនបានបញ្ជាក់ថា នាងគឺជាបេក្ខនារីជាប់ក្នុងការជ្រើសរើសជាតំណាងឲ្យកម្ពុជាឡើយ។
សារនោះថា៖ «ចំណែករូបកណ្តាលគឺរូបតារាបង្ហាញម៉ូដ និងសម្តែងរបស់កម្ពុជាគឺ ម៉ៃយ៉ា ដែលជាកូនខ្មែរកាត់អាល្លឺម៉ង់។ កម្ពុជាត្រូវការបេក្ខនារី ដែលក្រៅពីសមត្ថភាពដូច ប៊ី សុធារី គឺត្រូវការបេក្ខនារី មានរូបសម្រស់ស្អាតដូចជានាង ម៉ៃយ៉ា ទើបអាចប្រកួតប្រជែងតំណែងរាជិនីសម្រស់បវរកញ្ញា្កចក្កវាឡនេះបាន»៕
