Search form

Login - Register | FOLLOW US ON

Logo of Phnom Penh Post newspaper Phnom Penh Post - ម៉ៃ សុគន្ធ ចេញ​មុខ​បំភ្លឺ​រឿង​វីដេអូ​ចម្រៀង​អាស​អាភាស​

Content image - Phnom Penh Post
រូបភាព​ស្ទើរ​អាក្រាត​របស់​តារា​សម្ដែង​ប្រុស​ស្រី​ក្នុងបទ «ផ្កាយ​ព្រឹក​»។ រូប សហការី

ម៉ៃ សុគន្ធ ចេញ​មុខ​បំភ្លឺ​រឿង​វីដេអូ​ចម្រៀង​អាស​អាភាស​

ភ្នំពេញ: ចម្រៀង​មរតក​ដើមបទ «ផ្កាយព្រឹក» ដែល​ត្រូវបាន​យកមក​ច្រៀង​ឡើង​វិញ​ដោយ​តារា​ចម្រៀង​ ​លោក ម៉ៃ សុគន្ធ ថ្មីៗនេះ​បាន​រងនូវ​មតិ​រិះគន់​យ៉ាង​ចាស់ដៃ ក្រោយពី​បាន​រំលេច​ចេញនូវ​វីដេអូ​ចម្រៀង​រយៈពេល​ប្រមាណ ២ នាទី​បង្ហាញ​កាយវិការ​តារា​ស្រីសាច់ស​ខ្ចីរាងខ្ពស់​ស្រឡះ​នាង​ អ៊ុន អាលីហ្សា ​ជម្រុះ​ខោអាវ​ចុះត្រាំ​ក្នុងអាង​ទឹកបិទ​បាំង​រាងកាយ​ក្នុងពពុះ​សាប៊ូស​ក្បុស ខណៈ​តួអង្គ​ប្រុស​ស្រាត​ខោក្នុង​អាក្រាត​កាយ​ងូតទឹក​​តម្រង​ផ្កាឈូក​​ ទោះ​រូបភាព​កំណាត់​ក្រោម​បិទបាំង​ព្រិលៗ​ក៏នៅ​ឃើញ​កំប៉េះ​គូទយ៉ាង​ច្បាស់​ក្រឡែត​ ហាក់​ប្រាស​ចាកក្រម​សីលធម៌​ប្រពៃណី​ខ្មែរ។​

រូបភាព​ស្ទើរ​អាក្រាត​ ​សម្បូរ​ទៅដោយ​ឈុតឆាក​ជម្រុះ​សម្លៀក​បំពាក់​ និង​កាយវិការ​ងូតទឹក​ ត្រូវបាន​មតិ​រិះគន់​ជាច្រើន​លើក​ឡើងយ៉ាង​ស្របគ្នា​ជាការ​ជាន់​ពន្លិច​វប្បធម៌​ខ្មែរ ហើយ​ប្រាស​ចាកនូវ​អត្ថន័យ​ខ្លឹមសារ​បទចម្រៀង​ «ផ្កាយព្រឹក» មរតក​ដើម​សំនៀង​របស់​អធិរាជ​សំឡេង​មាស ស៊ិន ​ស៊ីសាមុត។

ក្រៅពី​សម្ដីលើក​ឡើង​ព្រមគ្នា​ថា ការសម្ដែង​នោះ «លើស​ហើយ» ពិសេស​គឺឈុត​ឆាក​តារា​ប្រុស​អាក្រាត​កាយ​នោះ​តែម្ដង ​មតិ​រិះគន់​ក៏បាន​ទាញការ​សន្និដ្ឋាន​ថា បទចម្រៀង​ច្រៀង​ឡើងវិញ​ដោយ​លោក ម៉ៃ សុគន្ធ មិនត្រឹម​តែរងការ​រិះគន់​លើវីដេអូ​ចម្រៀង​ពោរពេញ​ទៅដោយ កាយវិការ​បែប​ស្រើបស្រាល​នោះទេ ថែម​ទាំង​​ប្រឈម​បម្រាមពី​ក្រសួង​វប្បធម៌​ជុំវិញការ​យកបទ​ចម្រៀង​ដើមមក​ច្រៀង​ឡើងវិញ​ រំលង​ច្បាប់​កម្មសិទ្ធិ​បញ្ញា​ផងដែរ។

ក្នុងចំណោម​ការរិះគន់​ទាំងនោះ អ្នកប្រើ​ប្រាស់​ហ្វេសប៊ុក​ម្នាក់បាន​លើក​ឡើង​ថា៖ «ផ្កាយ​ព្រឹក​ស្ថិតនៅ​លើ​មេឃ​ដ៏សែន​ឆ្ងាយ​ដែល​នឹងគ្មាន​ថ្ងៃធ្លាក់​មកឋាន​កណ្ដាល។ ចំណែក​ន័យ​នៃបទ​ចម្រៀង​ផ្កាយ​ព្រឹក របស់​លោកតា ស៊ិន ស៊ីសាមុត ចង់​បង្ហាញ​ពី​ក្ដីស្រឡាញ់​បុរសម្នាក់​ទៅលើ​នារី​ម្នាក់​យ៉ាង​ខ្លាំង។

បុរសនោះ​ច្រៀង​ផ្ដោះផ្ដង​លួងលោម​ថ្នមបំពេ​ក្រែង​នារី​ម្នាក់នោះ​យល់​ចិត្ត។ តែបែរ​មកមើល MV ប្រាស​ចាក​ពីអត្ថន័យ​ បែរ​ទៅថត​វីដេអូ​បែប​សិច​ទៅវិញ ដើម្បី​ជាធ្នាក់​ទាក់ចិត្ត​យុវវ័យ ព្រោះ​តែភាព​ចង់​ល្បីល្បាញ អ្វីដែល​អ្នក​ធ្វើមិន​មែន​ជួយ​ជំរុញ តែបែរ​បំផ្លាញ​ទៅវិញ»។

ឆ្លើយតប​នឹង​មតិរិះគន់​ស្រោច​ស្រព​ពេញ​បណ្ដាញ​សង្គមមក​លើរូប​លោក តារា​ចម្រៀង​ល្បី​មធ្យម​លោក ម៉ៃ សុគន្ធ​ ម្សិលមិញ ​បាន​ចេញមុខ​បកស្រាយ​ថា វីដេអូចម្រៀង​បទ ផ្កាយ​ព្រឹក នេះគ្រាន់​តែជា ការ​ចេញផ្សាយ​សាកល្បង​ខ្លី​ ប៉ុណ្ណោះ​ និង​អំពាវនាវ​ឲ្យ​មហាជន​ចុច Like ទំព័រ​ហ្វេសប៊ុក​របស់​លោក​ផងដែរ​ ដើម្បី​រង់ចាំ​មើល វីដេអូ​ចម្រៀង​បទនេះ​ពេញ​ជា​ផ្លូវការ​នៅប៉ុន្មាន​ថ្ងៃ​ខាងមុខ។​

ក្នុងសារ​រសៀល​ថ្ងៃចន្ទ ​ម្សិលមិញ​នេះ ​តារា​ចម្រៀង ម៉ៃ សុគន្ធ បាន​លើក​ឡើង​ថា៖ «ដោយ​មានការ​រិះគន់ ខ្ញុំសូម​បកស្រាយ​នៅក្នុង​សាច់រឿង​បទ ផ្កាយព្រឹក។ សូម​អ្នកទាំង​អស់គ្នា​កុំទាន់​វិនិច្ឆ័យ​នៅក្នុង​បទនោះ​អី ព្រោះ​នេះ​គ្រាន់តែ​ជា [MV TEASER] ប៉ុណ្ណោះ សូម​រង់ចាំ​មើល [Full MV] នៅ​ប៉ុន្មាន​ពេលថ្ងៃ​ខាងមុខ​ទៀត​នេះសិន»៕

0

Comments

Please, login or register to post a comment