.jpg)
ទាយក្សទាក់ទាញអ្នកថតរូប មុនពេលវាបាត់ខ្លួន។ AFP
ក្រុងស៊ីដនី: ក្លិបហែលទឹកអូស្ដ្រាលីមួយកំពុងអំពាវនាវដល់ឆ្មាំសមុទ្រឲ្យព្យាយាមស្វែងរកប៉េងប៉ោងទាយក្ស Daphne ក្រោយពីវត្ថុនាំសំណាងនេះត្រូវបានរលកបោកបក់ទៅកាន់មហាសមុទ្រឥណ្ឌា ដែលមានចម្ងាយរាប់រយគីឡូម៉ែត្រពីកន្លែងសំចតរបស់វា។
ទាជ័រ ដែលជាកម្មសិទ្ធិរបស់ Cockburn Masters Swimming Club ត្រូវបានប្រទះឃើញចុងក្រោយនៅឆ្នេរ Coogee Beach ទីក្រុងភើត កាលពីព្រលឹមថ្ងៃទី ១១ ខែមីនា។
ប្រធានក្លិប ភេតធ័រ ម៉ារ បាននិយាយថា ទាខ្យល់ Daphne មានតម្លៃ ៦៩៥ ដុល្លារ ហើយលោកព្យាយាមហែលតាមទា Daphne ដែលមានទំហំប៉ុនផ្ទះចល័ត តែវាត្រូវរលកបោកទាញទៅយ៉ាងលឿន។
លោកនិយាយថា៖ «ក្រោយហែលបាន ៥០ ម៉ែត្រ វាអណ្ដែតទៅយ៉ាងលឿន ទៅបាត់ហើយ ខ្ញុំមិនអាចហែលតាមទាន់ទេ»។
ក្លិបហែលទឹក បានបង្ហោះសេចក្ដីអំពាវនាវលើបណ្ដាញសង្គមហ្វេសប៊ុកសម្រាប់អ្នកចង់ចេញស្វែងរកបក្សីយក្ស ដោយភ្ជាប់ជាមួយនូវការចូលរួមព្រឹត្ដិការណ៍ឆ្នាំក្រោយឥតគិតថ្លៃ ព្រមទាំងវគ្គសិក្សាហែលទឹកផងដែរ។
ABC ផ្សាយថា មានពាក្យចចាមអារ៉ាមថា ទាយក្សនេះទើរនៅឆ្នេរភាគខាងលិចទីក្រុង ហ្គេរ៉ាល់តុន ចម្ងាយ ៤៤០ គីឡូម៉ែត្រភាគខាងជើងទីក្រុងភើត៕
