ភ្នំពេញ: ព្រមនឹងការចាប់អារម្មណ៍បទចម្រៀងថ្មី «ទឹកហូរក្រោមស្ពាន» ដែលសមិទ្ធផលស្វាគមន៍ឱកាសបុណ្យចូលឆ្នាំចិនខិតជិតចូលដល់នោះ ម្ចាស់បទចម្រៀង កញ្ញា យូរី ក៏ត្រូវបានផ្ទុះការចាប់អារម្មណ៍ខ្លាំង ទៅនឹងចំណងជីវិតឯកជន ខណៈមជ្ឈដ្ឋាននានាក៏ដឹងថា តារាចម្រៀងប្រុសល្បីថា ជាគូស្នេហ៍នាងគឺ លោក ប៊ីមូ (BMO) បានបញ្ចេញរូបសាក់ឈ្មោះ កញ្ញា យូរី នៅនឹងកញ្ចឹង ក។
ការបង្ហាញរូបភាពសាក់ឈ្មោះតារាចម្រៀង យូរី នៅកញ្ចឹងកររបស់តារាចម្រៀង ប៊ីម៉ូនេះ ក៏ត្រូវបានអ្នកគាំទ្រពួកទាំងពីរលើកឡើងថា ជាការបង្ហាញចំណងស្នេហ៍តារា ១ គូនៅក្រោមដំបូលតែមួយនេះ ឲ្យមហាជនកាន់តែដឹងជាសាធារណៈ បន្ទាប់ពីអ្នកទាំង២បានបែកធ្លាយស្នេហាជាមួយគ្នាដែលទម្លាយចេញដោយអតីតសង្សារចាស់ យូរី លោក រ៉េត នោះ។
តារាចម្រៀង យូរី មួយរយៈចុងក្រោយនេះក៏បានប្រភពពីអ្នកគាំទ្រជាច្រើន ពោលថា «ក្រោយ យូរី ត្រូវបានអតីតសង្សារចាស់ទម្លាយពីទំនាក់ទំនងស្នេហាថ្មីជាមួយ ប៊ីមូ មកទីផ្សារការងារសិល្បៈ ហាក់ចុះខ្សោយ»។
ក្នុងនោះក៏មានការមតិលើកឡើងបន្ត ខណៈដែលដៃគូចម្រៀង និងល្បីថាជាសង្សាថ្មីរបស់នាងគឺ លោក ប៊ីមូ នោះ បែរជាស្ងាត់ៗទម្លាយរូបសាក់ឈ្មោះ យូរី នៅនឹងកញ្ចឹង ក។ ការទម្លាយជាថ្មីនេះ អាចនឹងស្ទួយប្រជាប្រិយភាពនាងបានឡើងខ្លាំង ព្រោះថា វាស្របពេលដែល ពួកគេទាំងពីរច្រៀងរួមគ្នាក្នុងបទ «ទឹកហូក្រោមស្ពាន» ហើយក៏ជាបទពេញនិយមក្នុងរដូវចូលឆ្នាំចិនខាងមុខនេះ»។
តែយ៉ាងណា ជុំវិញការទម្លាយរូបសាក់ឈ្មោះ យូរី នៅនឹងកញ្ចឹងក លោក ប៊ីមូ ដែលគេគ្រប់គ្នាថា គឺជាចេតនាបង្ហាញពីភាពស្មគ្រស្មោះ ពីលោក ប៊ីមូ និងខ្លះថា ជាចេតនា ពួកគេធ្វើឲ្យផ្ទុះក្នុងឱកាសច្រើន និងសម្តែងក្នងបទចម្រៀងថ្មីនេះ មិនត្រូវបាន កញ្ញា យូរី មិនមានភាពក្លាហានបកស្រាយនោះទេ ដោយនាងបានបញ្ជាក់ប្រាប់ភ្នំពេញ ប៉ុស្តិ៍ ថា៖ «ជុំវិញរឿងគាត់ទម្លាយរូបសាក់ ឈ្មោះនៅលើកញ្ចឹងកនោះ ខ្ញុំសូមមិនបកស្រាយទាំងអស់ ហើយពួកយើងក៏មិនមានអ្វីប្លែកដែរ»។
យូរី ក៏បាននិយាយទៀតថា៖ «បងជុំវិញរឿងជីវិតឯកជនរបស់ខ្ញុំមួយនេះ សូមមិនមានការបកស្រាយអ្វីទេ ។ តែបើនិយាយពីការងារសិល្បៈខ្ញុំអាចនិយាយបាន»។
បន្ទរនឹងសម្តីច្រានចោលការបកស្រាយពីជីវិតស្នេហាជាមួយ ប៊ីមូ ដែលល្បីស្រឡាញ់ យូរី ខ្លាំងហើយដល់ថ្នាក់សាក់ឈ្មោះ យូរី នៅកញ្ចឹងកនោះ យូរី ក៏បានប្រាប់ថា៖ «រាល់ថ្ងៃ ខ្ញុំមិនមានពេលគិតរឿងស្នេហាទេ ហើយក៏មិនទាន់ចង់គិត មិនទាន់ចង់និយាយ អ្វីដែលនិយាយគឺពេលនេះ ខ្ញុំត្រៀមបទចម្រៀង ចេញមុនចូលឆ្នាំ ហើយនិងត្រៀមរៀបចំដំណើរទៅច្រៀងនៅកូរ៉េ»។
យូរី បានបញ្ជាក់ថា៖ «រឿងស្នេហាទុកមួយឡែក គិតរឿងបំបែកទីផ្សារសិល្បៈ ទើបវាប្រសើរជាង។ បានជាខ្ញុំមិនមានពេលគិត គឺឆាប់ៗ ខ្ញុំឡើងទៅច្រៀងនៅ កូរ៉េ វិលវិញប្រឹងសម្ងំផលិតបទចម្រៀងថ្មី ព្រោះរដូវចូលឆ្នាំក៏កាន់តែខិតជិតដែរ»៕