ក្រុងប៉េកាំង: ដើម្បីអបអរឆ្នាំថ្មី ឆ្នាំសកល តំបន់ភាគខាងជើងប្រទេសចិន បានប្រែក្លាយជារាជាណាចក្រទឹកកកដ៏សែនត្រជាក់ជាថ្មីម្ដងទៀត។
ហារប៊ីន (Harbin) ទីក្រុងទឹកកករបស់ចិន បានរៀបចំព្រឹត្ដិការណ៍បុណ្យរដូវរងាប្រចាំឆ្នាំដោយបង្ហាញនូវទីក្រុងទឹកកកដ៏អស្ចារ្យ។
រាជាណាចក្រចម្រុះពណ៌បែបវេទមន្ដនេះស្ថិតនៅក្នុងឧទ្យានរចនាអំពូលភ្លើង ៣ ពណ៌ដែលរចនាពីទឹកកកសុទ្ធ។
រូបភាពពីលើអាកាសបានផ្ដិតយកទិដ្ឋភាពទីក្រុងពណ៌ឥន្ទធនូ ទំហំជិតមួយគីឡូម៉ែត្រការ៉េ ដែលរំលេចនូវរូបភាពនិមិត្តរូបពិតជុំវិញពិភពលោក រួមទាំង ក្រុង St. Petersburg របស់រុស្ស៊ី បន្ទាយកាណាហ្សាវ៉ា របស់ជប៉ុន និងវិថីសូត្រល្បីផងដែរ។ ចម្លាក់ទឹកកកអាចឲ្យភ្ញៀវទស្សនាដោយមានពន្លឺភ្លើងពណ៌ដ៏ស្រស់ស្អាត។
ព្រឹត្ដិការណ៍បុណ្យប្រចាំឆ្នាំលើកទី ៣៤ ដែលក្រុងហារប៊ីនបានរៀបចំនេះ ភ្ញៀវទេសចរនឹងបានទទួលនូវបទពិសោធកម្សាន្ដក្នុងសីតុណ្ហភាព ៣០ អង្សាសេ។ ប្រធានបទនៃពិធីបុណ្យទឹកកក និងព្រឹលអន្ដរជាតិគឺ «គជ់លើមកុដទឹកកកក្នុងក្រុងហារប៊ីន»។
គោលដៅទាក់ទាញមួយចំនួនត្រូវបានបង្ហាញដល់ភ្ញៀវទេសចរតាំងពីចុងខែធ្នូ ជាផ្នែកមួយនៃពិធីបើកសម្ពោធបឋម។ ពិធីបើកសម្ពោធជាផ្លូវការត្រូវបានចាប់ផ្ដើមធ្វើកាលពីថ្ងៃទី ៥ ខែមករា ឆ្នាំ ២០១៨។
ប្រវត្តិពិធីបុណ្យទឹកកកដ៏ល្បីនេះបានចាប់ផ្ដើមប្រារព្ធឡើងក្នុងខេត្ដហៃឡុងជៀង ប្រទេសចិន ក្នុងឆ្នាំ ១៩៨៥។
ច្បាស់ណាស់ ចម្លាក់ទឹកកកក៏ត្រូវបានរៀបចំឡើងដើម្បីអបអរដល់គំនិតផ្ដួចផ្ដើមនៃវិថីសូត្រ «ខ្សែក្រវាត់មួយ វិថីមួយរបស់ចិន» ដែលត្រូវបានធ្វើបទបង្ហាញក្នុងទីក្រុងទឹកកក រួមទាំងប្រាសាទហែដុង យ៉ុងហ្គុង ក្រុងប៊ូសាន ប្រទេសកូរ៉េខាងត្បូង អគារក្រឡូមរាងដូចខ្ទឹមបារាំង នៅរុស្ស៊ី និងបន្ទាយកាណាហ្សាវ៉ា នៅជប៉ុន។
ចំពោះរាជាណាចក្រទឹកកក ក្រុងហារប៊ីនមានទីកម្សាន្ដរំអិលទឹកកក និងឡានរំអិលលើទឹកកក ព្រមទាំងបន្ទះរំអិលយក្សប្រវែង ៣៦៥ ម៉ែត្រច្នៃពីទឹកកក ខណៈភ្ញៀវទេសចរដើរតាមចន្លោះចម្លាក់ទឹកកកដ៏ស្រស់ស្អាតនានា។ ពួកគេអាចដើរលើស្ពានទឹកកក ដែលតភ្ជាប់ទៅនឹងប្រាសាទទឹកកក ខណៈភ្ញៀវដទៃទៀតអាចឡើងជណ្ដើរវិហារគ្រិស្ដ និងប៉មខ្ពស់ផ្សេងៗទៀត។
ពិធីបុណ្យទឹកកកនឹងបន្ដដល់ដើមខែមីនា ពេលព្រឹលទឹកកកផ្ដើមរលាយ៕HR