Search form

Login - Register | FOLLOW US ON

Logo of Phnom Penh Post newspaper Phnom Penh Post - ល្បី​កូន​ច្បង ព្រាប សុវត្ថិ ក្លាយ​ជា​តារា​ចម្រៀង​ផ្លូវការ​នៅ​ហង្សមាស

Content image - Phnom Penh Post
លោក ព្រាប សុវត្ថិ និងកូន​ប្រុស​ មុន្នី​វណ្ណ​។ ហ្វេសប៊ុក

ល្បី​កូន​ច្បង ព្រាប សុវត្ថិ ក្លាយ​ជា​តារា​ចម្រៀង​ផ្លូវការ​នៅ​ហង្សមាស

ភ្នំពេញៈ ថ្មីៗ​នេះ ស្រាប់តែ​លេច​ចេញ​នូវ​ព័ត៌មាន​បែប​ល្ហៀងៗ​ថា កូន​ប្រុស​ច្បង​របស់​កំពូល​តារា​ចម្រៀង​ប្រុស​ចាស់​វស្សា ឈរ​ជើង​យ៉ាងយូរ​ជាងគេ នៅ​ក្នុង​ផលិតកម្ម​ហង្សមាស លោក ព្រាប សុវត្ថិ ដែល​មាន​ឈ្មោះ​ថា សុវត្ថិ មុន្នី​វណ្ណ បាន​ក្លាយ​ជា​តារា​ចម្រៀង​វ័យក្មេង​រូប​សង្ហា​ផ្លូវ​ការរួម​ទ្រនំ​ជាមួយ​នឹង​ឪពុក​ខ្លួន​ហើយ។

ខណៈ​ជារឿយៗ​គេ​ក៏ធ្លាប់​បាន​ឃើញ សុវត្ថិ មុន្នី​វណ្ណ បាន​បង្ហើរ​នូវ​សូរសៀង​បទ​ចម្រៀង​ជា​ភាសា​អង់គ្លេស​បង្ហោះ​តាម​បណ្តាញ​សង្គម ដ៏ពីរោះ​ដូចជា​មិនសូវ​ជា​ចាញ់​ឪពុក​របស់គេ​ប៉ុន្មាន​ឡើយ ខណៈ​រូបគេ​ក៏ត្រូវ​បាន​មហាជន​ស្គាល់​មុខមាត់​តាមរយៈ​ជាអ្នក​រាំអម​លោក ព្រាប សុវត្ថិ ជា​ឪពុក​ខ្លួន​តាម​ឆាក​តន្ត្រី​ទាំង​ក្នុង​ស្រុក និង​ក្រៅ​ស្រុក​ផងដែរ​នោះ។

Content image - Phnom Penh Post

បើយោង​ប្រភព​អ្នក​តាមដាន​អំពី​ស្ថានភាព​ឯកជន និង​រឿងរ៉ាវ​តារា​ចម្រៀង​ប្រុស​ល្បី​កប់​កំពូល​ទ្រនំ​ហង្សមាស លោក ព្រាប សុវត្ថិ ហើយ​ជាពិសេស​ដំណឹង​លេច​ឮថា​កូនប្រុស​ច្បង មាន​រូបរាង​សង្ហា ខ្ពស់​ស្រឡះ មិន​ចាញ់​តួកុន​ជាតិ​កូរ៉េ យុវជន សុវត្ថិ មុន្នីវណ្ណ ត្រូវបាន​គេលប​ខ្សឹបខ្សៀវ​ថា៖ «មុន្នី​វណ្ណ បាន​ក្លាយ​ជា​តារា​ចម្រៀង​ថ្មី​ជំនាន់​ក្រោយ​របស់​ផលិតកម្ម​ហង្សមាស ជាមួយ​នឹង​លោក ព្រាប សុវត្ថិ ដែរ​ហើយ​នាពេល​ថ្មីៗ​នេះ បន្ទាប់​ពីការ​ធ្វើ​តេស្ត​ទឹកដម​សំឡេង​សមត្ថភាព​ច្រៀង និង​ទេពកោសល្យ​របស់​គេ ដោយ​មានការ​ជួយ​ជ្រោមជ្រែង​ខ្លាំង​ពីឪពុក​គេ​ទៀតផង»។

យ៉ាងណា​ដំណឹង សុវត្ថិ មុន្នី​វណ្ណ ពិតជា​បាន​ចូល ឬ​មិនទាន់​បាន​ចូល​ហង្សមាស ដូចការ​លើក​ឡើង​ខាង​លើ​នោះ​ខាង​ភ្នំពេញប៉ុស្តិ៍ មិនបាន​ការបញ្ជាក់​ច្បាស់​ពីសំណាក់​លោក ព្រាប សុវត្ថិ ជា​តារា​ចម្រៀង​កំពូល និង​គណៈកម្មការ​ផ្តល់​ពិន្ទុ​នៃ​កម្មវិធី​កម្សាន្ត​ទូរទស្សន៍​ហង្សមាស ដូចជា Cambodian Idol កម្មវិធី Cambodian Got Talent និង​កម្មវិធី The Voice Kids Cambodia និង​ជា​ឪពុក​នោះ​ឡើយ ក្រោយ​ពីទំនាក់​ទំនងជា​ច្រើនដង តែគ្មាន​អ្នក​លើក​ទូរស័ព្ទ​ខណៈ​លោក​តែងតែ​ប្រើ​លេស​ដដែលៗ​ច្រើន​ដង​ឆ្លើយ​យ៉ាងខ្លី​ខណៈ​លើក​ទូរស័ព្ទ​ថា៖ «សុំទោស ខ្ញុំ​កំពុង​តែ​ជាប់​រវល់។ ចាំ​បន្តិចទៀត​សិន ខ្ញុំ​នឹង​ទូរស័ព្ទ​ទាក់ទង​ទៅវិញ»។

សួរ​សុំការ​បញ្ជាក់​ពីរឿង​កូនប្រុស​លោក បាន​ក្លាយ​ជា​តារាចម្រៀង​វ័យក្មេង​របស់​ហង្សមាស មែន ឬអត់​នោះ លោក ព្រាប សុវត្ថិ គ្រាន់តែ​ឆ្លើយ​យ៉ាងខ្លី​ដោយ​មាន​សូរ​សំណើច​តិចៗ​ថា៖ «ខ្ញុំ​ដូចជា​មិនមាន​អ្វីត្រូវ​បកស្រាយ​នោះ​ទេ»។

បើតាម​រយៈ​លោក លី ស៊ីនហួន ជា​អ្នកនិពន្ធ​ទំនុក​ច្រៀង​ឲ្យ​តារា​ល្បីៗ​នៃ​ទ្រនំ​ហង្សមាស ក្នុង​នោះ​ក៏មាន​លោក ព្រាប សុវត្តិ ដែរ មាន​ដូចជា «អូន​អ៊ូក​ប្រពន្ធ​ខ្ញុំ» និង​បទ «អាបឿន​យើង​ហ្នឹង» ក៏​មិនទាន់​ដឹង​ច្បាស់​ចំពោះ​រឿងនេះ ខណៈ​លោក​បង្ហើប​ថា៖ «ប្រហែល​ជា​មែនទេ​ដឹង! សម្រាប់​ខ្ញុំមិន​បាន​ជ្រាប​រឿង​នេះ​ច្បាស់​ទេ។ អ៊ីចឹង​មាន​តែ​សូមឲ្យ​បងប្អូន​តាមដាន​មើល​បន្តិច​ទៀត​សិន មើល​ថា​នឹង​ទៅជា​យ៉ាងណា?»៕

0

Comments

Please, login or register to post a comment

ព័ត៌មានពាក់ព័ន្ធ