Search form

Login - Register | FOLLOW US ON

Logo of Phnom Penh Post newspaper Phnom Penh Post - វគ្គ​បង្រៀន​ក្មេង​ចាប់​ពី ៦ ខែ​ហែល​ទឹក​ជំរុញ​សតិបញ្ញា

Content image - Phnom Penh Post
សិស្ស​តូច​ៗ​របស់​លោក​គ្រូ ផាយុ មាន​ចាប់តាំង​ពី​ទារក​វ័យ ៦ ខែ​ ក្នុង​វគ្គ​បង្រៀន​នៅ​មជ្ឈមណ្ឌល​កីឡា​លីឡា។ ហុង រស្មី​

វគ្គ​បង្រៀន​ក្មេង​ចាប់​ពី ៦ ខែ​ហែល​ទឹក​ជំរុញ​សតិបញ្ញា

ភ្នំពេញ: វា​ហាក់​ដូច​ទំនោរ​ថ្មី​ពេក​ដែល​ធ្វើ​ឲ្យ​ឪពុកម្ដាយ​កម្ពុជា​ភាគ​ច្រើន​មាន​ការ​ភ្ញាក់ផ្អើល និង​រអា​ក្នុងការ​នាំ​យក​ទារក​ទៅ​រៀន​ហែល​ទឹក​តាំង​ពី​វ័យ​ទើប ៦ ខែ ដោយ​យល់​ថា ពួកគេ​នៅ​តូចៗ​ពេក គួរ​ឲ្យ​ព្រួយ​បារម្ភ​ចំពោះ​សុខ​សុវត្ថិភាព និង​មិន​ទាន់​ដល់​ពេល​វេលា​ឡើយ។

ប៉ុន្ដែ​ការផ្ដើម​ហែល​ទឹក​របស់​ទារក​ក្រោម​ការ​បង្ហាត់​បង្ហាញ​ពី​អ្នក​ជំនាញ អាច​ជំរុញ​ការ​អភិវឌ្ឍ​ផ្នែក​សតិបញ្ញា និង​រាងកាយ​លឿន​ជាង​កុមារ​មិន​បាន​រៀន​ហែល​ទឹក ហើយ​សំខាន់​ទារក​មាន​ជំនាញ​ហែល​ទឹក​តាំង​ពី​នៅ​ក្នុង​ផ្ទៃ​ម្ដាយ។

អ្នកស្រី Sudsiri Prasitphon ជា​ស្ថាបនិក Swimming Dolphin Club Cambodia ម្នាក់ និង​ជា​អ្នក​ជំនាញ​ផ្នែក​អភិវឌ្ឍន៍​ខួរក្បាល និង​សក្ដានុពល​របស់​មនុស្ស បាន​ថ្លែង​នៅ​ក្នុង​ថ្ងៃ​បើក​សម្ពោធ Baby Swimming នៅ​មជ្ឈមណ្ឌល​កីឡា​លីឡា កាល​ពី​ពេល​ថ្មីៗ​នេះ​ថា ការ​ហែល​ទឹក​នៅ​ក្នុង​វ័យ​ទារក មាន​រយៈពេល​ជាច្រើន​ទសវត្សរ៍​មក​ហើយ និង​ទទួល​បាន​ការ​ពេញ​និយម​យ៉ាង​ច្រើន​នៅ​បណ្ដា​ប្រទេស​លោក​ខាងលិច រួមទាំង​អាមេរិក អូស្ដ្រាលី​និង​ប្រទេស​អភិវឌ្ឍន៍​ជុំវិញ​ពិភពលោក​ក្នុង​ការ​ជួយ​ជំរុញ​ការ​អភិវឌ្ឍ​កុមារ ពីព្រោះ​តាម​ពិត​ទៅ ជំនាញ​ហែល​ទឹក​របស់​កុមារ​មាន​តាំង​តែ​ពី​នៅ​ក្នុង​គភ៌​របស់​ម្ដាយ​មក​ម្ល៉េះ។

Content image - Phnom Penh Post
លោក​គ្រូ ផាយុ បង្រៀន​សិស្ស​ឲ្យ​មាន​ជំនឿ​ចិត្ត​ក្នុងការ​បណ្ដែត​ខ្លួន​។ ហុង រស្មី​

អ្នកស្រី​បន្ដថា៖ «ការរៀន​ហែល​ទឹក​របស់​ទារក​ថែម​ទាំង​ទទួល​បាន​អត្ថប្រយោជន៍​ដល់​កុមារ​ជាច្រើន​ថែម​ទៀត​ដូចជា ការ​អភិវឌ្ឍ​ផ្នែក​សង្គម ការ​សម្រួល​សាច់ដុំ ជាពិសេស អវយវៈ​ភ្នែក និង​ដៃ បន្ថយ​អាការ​ខ្លាច​ទឹក ជំរុញ​ការ​លូត​លាស់​សាច់ដុំ​បាច់​ធំ ឲ្យ​មាន​តុល្យភាព​រាងកាយ​ផ្នែក​ខាង​ឆ្វេង និង​ខាងស្ដាំ ជំរុញ​ខួរក្បាល​សងខាង ព្រមទាំង​អភិវឌ្ឍ​ផ្នែក​ទំនាក់​ទំនង​ប្រព័ន្ធ​ប្រសាទ​លឿន​ជាង​កុមារ​ធម្មតា»។

លោក សារឿន ដូរ៉ា គីមម៉េង ជា​សហ​ស្ថាបនិក​ម្នាក់​នៃ​ក្លិប​ហែល​ទឹក​ដូលហ្វីន ក្នុង​ចំណោម ៣ នាក់ បាន​បន្ថែម​ថា៖ «ទារក​ដែល​បាន​ចុះ​អាងទឹក​តាម​ក្បួនខ្នាត​ត្រឹមត្រូវ​នឹង​មាន​សមាធិ​ល្អ​ដែល​អាច​ផ្ចង់​អារម្មណ៍ រៀនសូត្រ​បាន​យូរ គេង​លក់​ស្កប់​ស្កល់ ជំរុញ​ការ​លូត​លាស់​អ័រម៉ូន​លឿន​ឲ្យ​សម​តាម​វ័យ បង្កើន​ប្រព័ន្ធ IQ, EQ ភាព​រហ័ស​រហួន ជួយ​ចលនា​សាច់ដុំ និង​បង្កើន​ភាព​ស្និទ្ធស្នាល​រវាង​ឪពុកម្ដាយ និង​កូនតូច​ផងដែរ»។

ជាក់ស្ដែង លោក Natthasak Thawudom ឬ​លោក​គ្រូ ផាយុ ជា​អតីត​កីឡាករ​ហែល​ទឹក​ក្រុម​ជម្រើស​ជាតិ​ថៃ ដែល​ទទួល​បាន​នូវ​អាជ្ញាប័ណ្ណ​បង្រៀន​វគ្គ Swim Australia Teacher of Babies and Toddlers ពី​ប្រទេស​អូស្ដ្រាលី មាន​បទពិសោធ​បង្រៀន​ទារក និង​កុមារ​តូចៗ​ហែល​ទឹក ១២ ឆ្នាំ ធ្លាប់​ជា​កុមារ​កើត​ជំងឺ​ផ្លូវ​ចិត្ដ ADHD។

លោកគ្រូ ផាយុ បាន​និយាយ​ថា៖ «ដោយសារ​ខ្ញុំ​កើត​ជំងឺ ADHD ដែល​មាន​ការ​ផ្ចង់​អារម្មណ៍​តិច ឪពុក​ខ្ញុំ​បាន​នាំ​ខ្ញុំ​ទៅ​រៀន​ហែល​ទឹក​តាំង​ពី​តូច។ លទ្ធផល​បាន​បង្ហាញ​ថា ការ​ហែល​ទឹក​ជួយ​ឲ្យ​ខ្ញុំ​ក្លាយជា​ក្មេង​មានការ​អភិវឌ្ឍ​ល្អ និង​ប្រក្រតី​វីញ​រហូតដល់​ក្លាយជា​កីឡាករ​ហែល​ទឹក​យុវជន​ជម្រើស​ជាតិ​ថៃ និង​បញ្ចប់​ការ​សិក្សា​ថែម​ទៀត»។

Content image - Phnom Penh Post
ក្មេង​អាយុ​ចាប់​ពី ៥​ឆ្នាំ​រៀន​ហែល​ទឹក​ជុំ​គ្នា។ ហុង រស្មី

ចំពោះ​ការសិក្សា​ដែល​ត្រូវបាន​បែង​ចែក​ជា​ថ្នាក់​ទារក និង​កុមារ រួមទាំង​កុមារ​អូទីសឹម និង ADHD ផងដែរ។ ទារក​អាយុ​ចាប់​ពី​អាយុ ៦ ខែ​ដល់ ៤ ឆ្នាំ មាន​រយៈពេល ៣០ នាទី​ក្នុង ១ ដង និង ១២ ដង​ក្នុង ១ វគ្គ តម្លៃ ៣៦០ ដុល្លារ។ អាយុ ៥ ទៅ ១២ ឆ្នាំ មាន​រយៈពេល ៤៥ នាទី​ក្នុង ១ ដង និង ១២ ដង​ក្នុង​មួយ​វគ្គ តម្លៃ ៣៦០ ដុល្លារ។

លោក សារឿន ដូរ៉ា គីមម៉េង បាន​បញ្ជាក់​ថា៖ «ការសិក្សា​មួយ​វគ្គត​ម្លៃ ២៤០ ដុល្លារ កុមារ​នឹង​ចេះ​ហែល​ទឹក​ក្បាច់​សេរី ហែល​សេរី​ផ្ងារ និង​មេអំបៅ។ បើ​កុមារ​រៀន​លឿន គ្រូ​ក៏​នឹង​បន្ថែម​មេរៀន​ផ្សេង​ទៀត​ផងដែរ»។

ចំពោះ​កុមារ​អូទីសឹម និង ADHD មាន​តម្លៃ​ដូចនឹង​ការ​ហាត់​រៀន​របស់​កុមារ​ធម្មតា។ លោក ដូរ៉ា បាន​បន្ដថា ក្នុង​ពេល​ឆាប់ៗ លោកគ្រូ ផាយុ នឹង​បើក​បង្រៀន​កុមារ​ក្រីក្រ កុមារ​ខ្វះ​ឱកាស​សិក្សា​នៅ​ទី​ដាច់​ស្រយាល និង​កុមារ​ពិការ​ផងដែរ៕

Content image - Phnom Penh Post
លោក​គ្រូ​បង្រៀន​ទារក​អាយុ ៦​ខែ​ហែល​ទឹក។ ហុង រស្មី

0

Comments

Please, login or register to post a comment

ព័ត៌មានពាក់ព័ន្ធ