Search form

Login - Register | FOLLOW US ON

Logo of Phnom Penh Post newspaper Phnom Penh Post - សហគមន៍​ខ្មែរ​ ឯនាយ​សមុទ្រ​ធ្វើ​ពិធី​ជុំគ្នា​ប្រចាំ​ឆ្នាំ​ ស្ទួយ​នូវ​តម្លៃ​សារុង​ខ្មែរ

Content image - Phnom Penh Post
ប្រជាជន​ខ្មែរ​នៅឯ​នាយ​សមុទ្រ​ជុំគ្នា​នាពិធី​ប្រចាំ​ឆ្នាំ Sarong Party កន្លងមក។ Sarong Party

សហគមន៍​ខ្មែរ​ ឯនាយ​សមុទ្រ​ធ្វើ​ពិធី​ជុំគ្នា​ប្រចាំ​ឆ្នាំ​ ស្ទួយ​នូវ​តម្លៃ​សារុង​ខ្មែរ

ក្រុងឡុងប៊ិចៈ ដោយ​មាន​គោល​បំណង​ចង់​លើក​ស្ទួយ​ពីតម្លៃ​វប្បធម៌​ខ្មែរ មោទនភាព​ជាតិ និង​សាមគ្គីភាព​នោះ ក្រុម​សហគមន៍​ខ្មែរ​រស់នៅ​ឯនាយ​សមុទ្រ​ទាំង​ឡាយ តែង​ប្រារព្ធ​ធ្វើ​ពិធី​ជួប​ជុំគ្នា​ប្រចាំ​ឆ្នាំ​មួយ​មាន​ឈ្មោះ Annual Sarong Party មាន​មូលដ្ឋាន​នៅ​ទីក្រុង​ឡុងប៊ិច រដ្ឋ​កាលីហ្វ័រនីញ៉ា នៃ​សហរដ្ឋអាមេរិក ខណៈ​ក្នុង​ឆ្នាំ ២០១៧ នេះ ធ្វើ​លើក​ទី ១១។

លោក ឆាដ សាម៉េត (Chad Sammeth) ស្ថាបនិក​រៀបចំ​កម្មវិធី Annual Sarong Party បាន​ឲ្យដឹង​ពីដើម​ចម​នៃការ​រៀបចំ​ពិធី​នេះ​ថា៖ «យើង​បាន​រៀបចំ​តាំង​ពី​ឆ្នាំ ២០០៧ មក ខណៈ​កាល​ពីដំបូង​ឡើយ​យើង​បាន​ធ្វើ​គ្រាន់តែ​ការអប​អរសាទរ​សម្រាប់​ថ្ងៃ​ចូល​ឆ្នាំ​ខ្មែរ​ជា​លក្ខណៈ​គ្រួសារ​ជាមួយ​នឹង​សម្លៀក​បំពាក់​ជា​អត្តសញ្ញាណ​ជាតិខ្មែរ​គឺ​ស្លៀក​សារុង​នោះ​ឯង ដោយ​មាន​អ្នកចូលរួម​តែ​ចំនួន ២០ នាក់​ប៉ុណ្ណោះ។ តែ​ប៉ុន្មាន​ឆ្នាំ​ក្រោយ​មក ក៏មាន​បងប្អូន​ខ្មែរ​មកពី​បណ្តា​ប្រទេស​នានា​លើ​ពិភពលោក​បាន​ចូល​រួមមាន​ចំនួន​ដល់​ទៅ ៤០០ នាក់ ឯណោះ មាន​រដ្ឋ​តិចសាស ក្រុង​សាន ហ្រ្វានស៊ីស្កូ ក្រុង​ស៊ីអេថល បូស្តុន រដ្ឋ​អារីហ្សូណា ប្រទេស​បារាំង ស្វ៊ីស កម្ពុជា និង​ប្រទេស​ផ្សេង​ទៀត»។

Content image - Phnom Penh Post
King និង Queen ប្រចាំពិធី Sarong Party។ Sarong Party

ស្ថាបនិក​ខ្មែរ-អាមេរិក​រូបនេះ បន្ត​ថា៖ «ដោយសារ​មានការ​ចូលរួម​ពី​បងប្អូន​ខ្មែរ​រស់នៅ​ក្រៅ​ប្រទេស​បែប​នេះ យើង​ក៏មាន​រៀបចំ​កម្មវិធី​រៃអង្គាស​ប្រាក់​ដើម្បី​យក​ទៅ​ជួយ​ដល់​កម្មវិធី​ពីរ​ទៀត ដែល​មាន​អត្ថប្រយោជន៍​សម្រាប់​ជាតិខ្មែរ​ដែរ​គឺ​កម្មវិធី​មហោស្រព​ភាពយន្ត​ទីក្រុង​ខ្មែរ (Cambodia Town Film Festival) និង​គ្រឹះស្ថាន​បណ្តុះបណ្តាល​នៃ​សិល្បៈ​ខ្មែរ (Khmer Arts Academy) ដែល​បាន​ផ្តោត​សំខាន់​លើការ​បណ្តុះបណ្តាល​របាំ​បុរាណ​របស់​ខ្មែរ។

ម្យ៉ាង​ទៀត​ក៏ចង់​ឲ្យ​មនុស្ស​នៅ​លើ​សកលលោក​នេះ​បាន​ស្គាល់​ខ្មែរ​យើង តាមរយៈ​អត្តសញ្ញាណ​គឺ​សារុង​ខ្មែរ និង​ចង់ឲ្យ​បងប្អូន​ខ្មែរ​នៅ​ឯនាយ​សមុទ្រ​ទាំងអស់​មាន​មោទនភាព​លើ​វប្បធម៌​ជាតិ​សាសន៍​ខ្លួនឯង និង​បង្ហាញ​អំពី​សាមគ្គីភាព​គ្នា​រវាង​ខ្មែរ និង​ខ្មែរ​ទៀតផង»។

ពិធី​ជួបជុំគ្នា​ប្រចាំ​ឆ្នាំ ឬ Annual Sarong Party ឆ្នាំ ២០១៧ នឹង​ប្រារព្ធ​ធ្វើ​នៅ​ថ្ងៃទី ១២ ខែ​សីហា នា​ចុង​សប្តាហ៍​នេះ នៅឯ​ភោជនីយដ្ឋាន Shan-non's On Pine ក្នុង​ទីក្រុង​ឡុងប៊ិច រដ្ឋ​កាលីហ្វ័រនីញ៉ា សហរដ្ឋអាមេរិក។

សម្រាប់​អ្នក​ចាប់អារម្មណ៍​ចូលរួម អាច​ចូល​ទៅ​កាន់​គេហទំព័រ http://SarongParty2017.eventbrite.com/ ដើម្បី​ទិញ​សំបុត្រ ឬក៏​អាច​រក​ជាវ​បាន​នៅ​ភោជនីយដ្ឋាន Phnom Penh Noodle Shack ភោជនីយដ្ឋាន Sophy's Restaurant ភោជនីយដ្ឋាន Nuddlehaus និង​ផ្សារ Riverside Supermarket សម្រាប់​នៅ​អាមេរិក៕

0

Comments

Please, login or register to post a comment