.jpg)
ទិដ្ឋភាពប្រារព្ធខួបកំណើតនៅសៀមរាបរបស់ កញ្ញា ទឹម រដ្ឋា។ ហ្វេសប៊ុក
ភ្នំពេញៈ មើលទៅតារាសម្តែងស្រី និងម៉ូដែល កញ្ញា ទឹម រដ្ឋា ពិតជាត្រូវចិត្តត្រូវថ្លើមជាមួយនឹងសមាជិកនៃក្រុមគ្រួសារអនាគតឪពុកម្តាយក្មេកនាងហើយ ខណៈពេលប្រារព្ធពិធីខួបកំណើតនាពេលថ្មីៗនេះ ក៏មានសមាជិកគ្រួសារគូស្នេហ៍ជាតិអាមេរិក រូបសង្ហា ចូវ៉ានី អេនតូនីញ៉ូ ចូលរួម ដែរនៅឯទឹកដីសម្បូរប្រាង្គប្រាសាទបុរាណ ខេត្តសៀមរាបឯណោះ។
នេះបើតាមសារថ្លែងអារម្មណ៍ត្រេកអរ និងថ្លែងអំណរគុណរបស់តារាសម្តែងស្រីសិចស៊ី ឬស៊ីវិល័យកញ្ញា ទឹម រដ្ឋា តាមបណ្តាញសង្គមថា៖ «ខួបកំណើតខ្ញុំឆ្នាំនេះ ពិតជាពិសេសណាស់ ព្រោះបានធ្វើនៅឯទីកន្លែងដែលខ្លួនស្រឡាញ់បំផុត គឺនៅក្រុងសៀមរាបនៃទឹកដីព្រះរាជាណាចក្រអច្ឆិយ ជាមួយនឹងមនុស្សជាទីស្រឡាញ់មួយចំនួននៅក្នុងគ្រួសារខ្ញុំ និងក្រុមគ្រួសាររបស់សង្សារខ្ញុំ ដែលបានមកពីអាមេរិកនោះ»។
យ៉ាងណាគេមិនដឹងសេចក្តីបន្ថែមពីជំនួបគ្នានៃក្រុមសាច់ញាតិរបស់គ្រួសារលោក ចូវ៉ានី អេនតូនីញ៉ូ ជាមួយនឹងក្រុមគ្រួសារតារាស្រី រាងស្ល៊ីម ដែលមានរាសីឡើងកូដខ្លាំងនៅចុងឆ្នាំ ២០១៧ នៅក្នុងការចាប់បានឱកាសថតកុនជាហូរហែ កញ្ញា ទឹម រដ្ឋា នោះឡើយ ដោយសារប្រព័ន្ធទូរស័ព្ទរបស់នាង ដែលធ្លាប់ទាក់ទងកាលពីមុននោះ មិនអាចទាក់ទងបាន។
ជាហូរហែកន្លងមកក្រៅពីគេឧស្សាហ៍ឃើញបណ្តើរសង្សារអាមេរិករូបសង្ហា ចូវ៉ានី អេនតូនីញ៉ូ ចូលរួមក្នុងកម្មវិធីផ្លូវការ ឬកម្មវិធីសង្គមនានាដោយបើកចំហ តារាសម្តែង និងម៉ូដែល កញ្ញា ទឹម រដ្ឋា ក៏តែងតែបង្ហោះរូប និងសារផ្អែមល្ហែមបង្ហាញពីភាពសិ្នទ្ធស្នាលជាគូស្នេហ៍ពេលដើរកម្សាន្តនៅទីនានាយ៉ាងរីករាយ រហូតធ្វើឲ្យមហាជនគាំទ្រជំរុញឲ្យនាងឆាប់រួសរាន់ដឹកដៃគ្នាចូលរោងការឆាប់ៗទៀតផង។
តាមរយៈរូបថតមួយសន្លឹក ដែលដឹកដៃគ្នាយ៉ាងសប្បាយ នាពេលដើរកម្សាន្តថ្មីៗ រវាងតារាសម្តែងស្រីរាងស្ល៊ីម មានរាសីឡើងកូដខ្លាំងចុងឆ្នាំ ២០១៧ នៅក្នុងការចាប់បាននូវឱកាសថតកុន កញ្ញា ទឹម រដ្ឋា និងសង្សារជាជនជាតិអាមេរិក ល្បីនៅក្នុងវិស័យអចលនទ្រព្យនោះ គ្រាន់តែបានបង្ហោះ និងសរសេរថា៖ «សាកធ្វើទៅ កាន់ដៃមនុស្សដែលអ្នកស្រឡាញ់ នៅក្នុងពេលមានអាកាសធាតុត្រជាក់បែបនេះ ស្រមៃមើលទៅថា អូននឹងមានអារម្មណ៍យ៉ាងម៉េចដែរ?»
ភ្លាមមក ក៏បង្កការភ្ញាក់ផ្អើល និងមានការចាប់អារម្មណ៍ខ្លាំងពីសំណាក់អ្នកគាំទ្រនាង ក៏បានជំរុញនាងឲ្យឆាប់រៀបការភ្លែតតែម្តងទៀតផងដែរ។
ប៉ុន្តែ កញ្ញា ទឹម រដ្ឋា បានប្រាប់ ភ្នំពេញ ប៉ុស្តិ៍ថា៖ «សម្រាប់រឿងរៀបការ នាងខ្ញុំមិនទាន់បរិយាយយ៉ាងណាទេ តែសុំទុកពេលវេលាដើម្បីស្វែងយល់ចិត្តគ្នាមួយរយៈទៀតសិន។ នាងខ្ញុំក៏សុំមិនទាន់កំណត់ពេលវេលាយ៉ាងណាថា នឹងត្រូវដល់ពេលត្រូវចាត់ចែងរឿងនោះដែរ ព្រោះថា ពេលវេលាទៅថ្ងៃខាងមុខនោះ យើងពិតជាមើលមិនឃើញដែរ»។
យ៉ាងណាក្តីបើតាមការតាមដានពីសម្ព័ន្ធភាពស្នេហារវាងតារាសម្តែងស្រីមានរាងស្ល៊ីម ដែលមហាជនឲ្យរហស្សនាមថា ជាតារាស្រីស្វាក់ស្នេហ៍ច្រើនតែជាកន្លង់បរទេសកញ្ញា ទឹម រដ្ឋា និងស្នេហ៍ថ្មី ជាតិអាមេរិក ដែលជានាយកប្រតិបត្តិនិងស្ថាបនិកនៃក្រុមហ៊ុនអចលនទ្រព្យមួយ គឺលោក ចូវ៉ានី អេនតូនីញ៉ូ ពិតជាមានភាពស៊ីចង្វាក់គ្នា និងបានបង្កើតនូវភាពផ្អែមល្ហែមយ៉ាងខ្លាំង មានរយៈពេលរាងយូរក្រែលជាងគេ បើប្រៀបទៅនឹងចំណងស្នេហ៍នាងជាមួយអតីតសង្សារជាជនជាតិប៉ាគីស្ថាន និងប្រេស៊ីលនោះ៕
