.jpg)
ភ្នំពេញៈ ក្រោយពីកូនប្រុសទី ២ កើតមកបានឃើញពន្លឺព្រះអាទិត្យបានរយៈពេលចំនួនពីរសប្តាហ៍មកនោះ អតីតតារាចម្រៀងប្រុសជ្រកនៅក្រោមទ្រនំផលិតកម្មហង្សមាស ដែលល្បីឈ្មោះមួយប្រាវ លោក សាពូន មីដាដា ក៏បានបង្ហោះសារគួរឲ្យភ្ញាក់ផ្អើលទៅដល់មហាជនពេញតាមបណ្តាញសង្គមតែម្តង។
ជាមួយនឹងរូបថតរបស់កូនស្រីច្បង និងកូនប្រុសទី២ លោក សាពួន មីដាដា ក៏បង្ហោះសារថា៖ «កូនស្រីច្បង សាពួន ដារ៉ាពិមាន គឺជាគ្រាប់ពូជសិល្បៈ។ កូនប្រុសពៅ សាពួន ដារ៉ាបុរស គឺជាគ្រាប់ពូជទាហាន ឪពុកឲ្យពរកូនទាំងពីរប្រកបដោយភាពរឹងមាំ សុចរិត និងជីវិតជោគជ័យ»។
មជ្ឈដ្ឋានមហាជននៅចាំបានថា គូស្វាមីភរិយាងារជាតារាសិល្បៈពីរដួងលោក សាពូន មីដាដា និងតារាស្រីអ្នកនាង សឿ សុធារ៉ា ដែលមានចំណងជីវិតអាពាហ៍ពិពាហ៍ជិតគ្រប់មួយទសវត្សរ៍ និងបង្កើតបានដំណក់ឈាមកូនស្រីច្បងមានវ័យ ៧ ឆ្នាំ នោះ ពួកគេធ្លាប់បានបង្ហោះរូបថតអេកូសាស្ត្រកំណើតកូនប្រុសដែលរំពឹងថា នឹងត្រូវសម្រាលនៅចំថ្ងៃទី ៧ ខែមករា ឆ្នាំ ២០១៨ តែក្ដីរំពឹងនេះមិនបានសមតាមបំណងនោះឡើយ។
រូបថត ហ្វេសប៊ុក
កូនប្រុសទី២របស់លោក សាពូន មីដាដា និងអ្នកនាង សឿ សុធារ៉ា ត្រូវបានសម្រាលកាលពីថ្ងៃទី ១ ខែ មករា ឆ្នាំ២០១៨ ហើយឪពុកទារកដែលជាតារាចម្រៀងម្ចាស់បទ «និយមន័យស្នេហ៍» ដ៏ល្បីរន្ទឺកាលពីជិត ១០ ឆ្នាំមុន លោក សាពូន មីដាដា បានបង្ហោះសារអបអរកំណើតកូនទីពីរនេះផងដែរថា៖ «ថ្ងៃសីល ១៥ កើត ខែបុស្ស ពេញបូរមី ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ១ ខែមករា ឆ្នាំ ២០១៨ នៅវេលាម៉ោង ៣ និង ៥៨ នាទី ព្រឹក (ទៀបភ្លឺ)។ កូនប្រុសពុក សាពូន ដារ៉ាបុរស បានកើតមកហើយលើទឹកដីសុវណ្ណភូមិ ដ៏ស្រស់ស្អាតនេះ។ ឪពុកឲ្យពរកូនក្លាយជាមនុស្សសែនរឹងមាំ ដែលប្រកាន់ខ្ជាប់នូវសុចរិតភាពជានិច្ច និងមានជ័យជោគក្នុងឆាកជីវិត»។
កាលពីភរិយាខ្លួនកំពុងពពោះកូនប្រុសទី ២ ដែលទើបតែមានវ័យ ៥ ខែ លោក សាពូន មីដាដា ក៏ធ្លាប់បង្ហើបឲ្យដឹងថា មានមន្ទីរពេទ្យឯកជនដ៏ធំមួយ បានកក់ទុកទាំងម្តាយ និងគភ៌ក្នុងផ្ទៃរួចហើយដើម្បីត្រៀមយកថតស្ប៉តពាណិជ្ជកម្មផ្សព្វផ្សាយដូចជាកូនស្រីច្បងផងដែរ៕
រូបថត ហ្វេសប៊ុក
