Search form

Login - Register | FOLLOW US ON

Logo of Phnom Penh Post newspaper Phnom Penh Post - សាសា ច្រឡោត​ខឹង​អ្នក​ជជីក​សួររឿង​បំណុល​រំលស់​ឡាន

Content image - Phnom Penh Post
សេចក្តី​ប្រកាស​អញ្ជើញកូន​បំណុល​សាសា។ ហ្វេសប៊ុក​

សាសា ច្រឡោត​ខឹង​អ្នក​ជជីក​សួររឿង​បំណុល​រំលស់​ឡាន

ភ្នំពេញៈ ថ្មីៗនេះ​មានរឿង​ដែលមិន​នឹកស្មាន​ដល់ និង​ភ្ញាក់ផ្អើល​យ៉ាងខ្លាំង​សម្រាប់​មហាជន​បាន​កើតឡើង​ចំពោះ​អតីត​ជា​ពិធីការិនី​ទូរទស្សន៍​ស៊ីធីអិន ដែលមាន​ឈ្មោះ​ដើម​កញ្ញា ឯក សុជាតា ហៅ​កញ្ញា សាសា ក៏ស្រាប់តែ​ត្រូវបាន​គ្រឹស្ថាន​មីក្រូហិរញ្ញវត្ថុ​ពិភពថ្មី​បានចេញ​សេចក្តី​ប្រកាស​អត្តសញ្ញាណ​របស់​នាងចំៗ​តែម្តង​ដើម្បី​ឲ្យទៅ​ដោះស្រាយ​រឿង​បំណុល​ជាលើក​ចុងក្រោយ​រយៈពេល​មួយ​សប្តាហ៍ ដែល​នាងបាន​ទៅខ្ចី​ប្រាក់​ទិញ​រថយន្ត​ទំនើប​ម៉ាក Porsche ទៅតាម​វិធី​បង់រំលស់​តាំងពី​ឆ្នាំ ២០១២ មក​ម្ល៉េះ។

សារប្រកាស​នោះមាន​រំ​លេចចេញ​ជាមួយ​នឹង​រូបថត​កញ្ញា សាសា យ៉ាងច្បាស់​ក្រឡែត​តែម្តង ដែល​ទទូច​ដើម្បី​ឲ្យនាង​ទៅ​ដោះស្រាយ​រឿង​ក្នុងនាម​ជាកូន​បំណុល ដែលមាន​ខ្លឹមសារ​ដើម​ទាំងស្រុង​ថា៖ «អតិថិជន​ឈ្មោះ ឯក សុជាតា ឈ្មោះ​សិស្សសិល្បៈ សាសា អាយុ ២៩ ឆ្នាំ កាន់​លិខិតឆ្លង​ដែន​ព្រះរាជាណាចក្រ​កម្ពុជា​លេខ S00-13007។ បានបង់​រំលស់​រថយន្ត Porsche ឆ្នាំ ២០១២ ពណ៌ ស ពាក់​ស្លាកលេខ​ភ្នំពេញ 2AD-7888 ពី​គ្រឹះស្ថាន​មីក្រូហិរញ្ញវត្ថុ​យើងខ្ញុំ»។

គ្រឹះស្ថាន សូម​ប្រកាស​អញ្ជើញ​កញ្ញា ឯក សុជាតា ចូលមក​ដោះស្រាយ​ជាមួយ​គ្រឹះស្ថាន​ជាបន្ទាន់ ពាក់ព័ន្ធ​នឹង​ករណី​ដែល​កញ្ញា​មិនបាន​បំពេញ​កាតព្វកិច្ច​ជាភាគី​កូនបំណុល​ជូនគ្រឹះស្ថាន។ គ្រឹះស្ថាន​ទុក​រយៈពេល ៧ ថ្ងៃគិត​ចាប់ពី​ថ្ងៃទី ១៩ រហូតដល់​ថ្ងៃ ទី ២៦ ខែធ្នូ ឆ្នាំ ២០១៦ ជា​កំហិត បើមិន​ដូច្នោះ​ទេ​គ្រឹះស្ថាន​នឹង​អនុវត្ត​តាមច្បាប់។ សេចក្តីប្រកាស​អញ្ជើញ​នេះ​ចាត់ទុកជា​ការជូនដំណឹង​ចុងក្រោយ»។

ភ្នំពេញ ប៉ុស្តិ៍ ក៏មិន​បានទទួល​ការបកស្រាយ​លម្អិត​បន្ថែម​យ៉ាងណា​នោះដែរ ខណៈ​ប្រព័ន្ធ​ទូរស័ព្ទ​កញ្ញា សាសា ទាក់ទង​ចូលហើយ​នាង​គ្រាន់តែ​លើក​និយាយ​យ៉ាងខ្លី​ក្នុង​សភាព​មានកំហឹង​បន្តិចដែរ នឹងការ​ជជីក​សួររឿង​នាងថា៖ «បើដឹង​ចម្លើយ​ច្បាស់​ហើយ ចាំបាច់​ទូរស័ព្ទ​សួរ​ខ្ញុំអ្វី​ទៀត។ ជម្រាបលា!» បន្ទាប់មក​នាង​ក៏បិទ​ទូរស័ព្ទ​ទៅ។

ក្រោយមក​ទៀតនា​រសៀល​ថ្ងៃ​ម្សិលមិញ​នេះដែរ តាមទំព័រ​សង្គម​ហ្វេសប៊ុក​របស់​អតីត​ពិធី​ការិនី​សាសា ក៏ស្រាប់តែ​បាន​បង្ហោះសារ​មួយ​ឃ្លា​យ៉ាងខ្លី ហាក់ដូចជា​ការបើក​ចិត្ត​ទូលាយ និង​បើកភ្លើង​ខៀវ​ផ្តល់សិទ្ធិ​ដល់​បណ្តាញ​សារព័ត៌មាន​នានា​ដែល​បានដឹង​រឿង​របស់​កញ្ញា​ដោយមាន​ការចុះផ្សាយ​ផងដែរ។

គណនី​នោះ​សរសេរថា៖ «បើជ្រុល​តែផ្សាយ​ហើយ មិនបាច់​ទូរស័ព្ទ​សួរទេ លោកបង​សារព័ត៌មាន មាន​សិទ្ធិ មិនបាច់​គោរព​សិទ្ធិ​បុគ្គល​ទេ ផ្សាយ​ចុះបងៗ តាម​សម្រួល!»។

ដោយឡែក​តាម​ការឆ្លើយតប​របស់លោក អ៊ុត ធី ដែលមាន​ងារជា​ឧកញ៉ា និង​ជាឪពុក​របស់​កញ្ញា សាសា បាន​ឆ្លើយតប​ប្រាប់​បណ្ដាញ​ព័ត៌មាន​ក្នុងស្រុក​មួយ​ថា លោកមិន​បានដឹង​រឿង​របស់​សាសា ជាប់បំណុល​ជាមួយ​គ្រឹះស្ថាន​មួយ​ហ្នឹង​នោះទេ ហើយ​លោក​ក៏គ្មាន​រឿង​ទទួលខុសត្រូវ​ពាក់ព័ន្ធ​នឹង​បំណុល​នោះដែរ។

ខណៈលោក​បាន​បញ្ជាក់ថា សាសា​មិនស្ថិត​នៅក្រោម​បន្ទុក​របស់លោក ដែល​មានន័យថា​អ្វីដែល​នាង​បានចង គឺនាង​ត្រូវតែ​ចេះ​ដោះស្រាយ។

លោក​បន្តថា៖ «រឿង​ហ្នឹងខ្ញុំ​អត់ធ្វើ​ផង​ម៉េចត្រូវ​ឲ្យខ្ញុំ​ដឹងឮ អាហ្នឹង​ឲ្យគេ [សាសា] ដោះស្រាយ​ទៅ!»។

យ៉ាងណាមិញ​ លោក​និយាយ​ថា នឹង​ជួយ​សួរនាំ ហើយ​ជំរុញ​ឲ្យសាសា ចេញមុខ​ទទួល​ខុសត្រូវ​រឿងនេះ បន្ទាប់ពី​លោក​បាន​មើលឃើញ​ការ​បង្ហោះសារ​របស់​គ្រឹស្ថាន​មីក្រូហិរញ្ញវត្ថុ​ពិភពថ្មី ក៏មាន​ការប៉ះពាល់​ដល់​កូនស្រី និង​រូបលោក​ដែលជា​ឪពុក​របស់​នាងដែរ៕

0

Comments

Please, login or register to post a comment