Search form

Login - Register | FOLLOW US ON

Logo of Phnom Penh Post newspaper Phnom Penh Post - សាសា ត្អូញ​ក្រ​រហូត​លក់​ផ្ទះ​ក្រោយ​ពីការ​ចំអក​ឲ្យ​ពេជ្ជតា

Content image - Phnom Penh Post
ផ្ទះ​របស់​កញ្ញា សាសា ដែល​បាន​ប្រកាសលក់។ ហ្វេសប៊ុក​

សាសា ត្អូញ​ក្រ​រហូត​លក់​ផ្ទះ​ក្រោយ​ពីការ​ចំអក​ឲ្យ​ពេជ្ជតា

ភ្នំពេញៈ ទន្ទឹម​នឹងការ​សម្ងំ​លាក់​ខ្លួន​ដើម្បី​លាង​ជម្រះ​នូវរឿង​អាស្រូវ​ដ៏​កក្រើក​នៅលើ​វិថី​សិល្បៈ​ ដោយ​បានទៅ​កសាង​មុខ​មាត់សា​ថ្មី​នៅក្នុង​តួនាទី​ធ្វើជា​ថៅកែ​ស្រីនៃ​អាហារ​ដ្ឋានមួយ​ដែល​បាន​បើកនៅ​ចំកណ្តាល​ទីក្រុង​នៃ​តំបន់​ទេស​ចរណ៍​សៀមរាប​ មាន​ឈ្មោះ​ថា​ «​ភូមិ​គ្រឹះចំប៉ីស»​ អតីត​ពិធីការិនី​នៃ​កម្មវិធី​រាត្រីកម្សាន្ត​នៅ​ទូរទស្សន៍​ស៊ីធីអិន កញ្ញា​ សាសា ក៏ស្រាប់​តែ​ប្រកាស​ជាសា​ធារណៈ​នៅក្នុង​បណ្តាញ​សង្គម​ហ្វេសប៊ុក​នាងថា​លក់ផ្ទះ​ ដែល​ស្ថិតនៅ​ក្នុងបុរី​ពិភព​ថ្មី​ ផ្លូវ​វេងស្រេង ដោយ​ភ្ជាប់​ជាមួយ​នឹង​សារត្អូញ​ប្រាប់ថា «ក្រណាស់​យាយ​អើយ!»។​

អតីត​ជាពិធី​ការិនី​ដែល​មាន​ដើម​ទ្រូង​សិចស៊ី​ នាង សាសា មាន​ឈ្មោះ ដើមនាង ឯក សុជាតា ក្រោយ​ពីបញ្ច​ប់នូវ​​រឿងក្តី​ហិង្សាជា​មួយ​នឹងលោក ឧកញ៉ា សុខ ប៊ុន ក៏ប្តូរ​ទិសដៅ​ជីវិត​ភ្លាមៗ​ពីគម្រោង​ចេញ​ទៅរស់​នៅឯ​ក្រៅប្រទេ​ស ​ដោយ​កាល​មុននោះ​នាងធ្លាប់​ប្រាប់​ភ្នំពេញ​ប៉ុស្តិ៍​ថា៖ «នាងខ្ញុំ​មានគម្រោង​ចេញ​ទៅ​រស់នៅ​ក្រៅប្រទេស​ក្នុងចេតនា​ចាក​ចេញ​ដើម្បី​រក្សា​សុវត្ថិ​ភាព​ផ្ទាល់​ខ្លួន»។

តែ​ក្រោយ​មកក៏​បែរជា​ប្តូរមក​បើក​អាហារ​ដ្ឋាន​នៅ​ក្រុងសៀម​រាប ​យ៉ាង​គ្រហើៗ​ទៅវិញ ក្រោយមាន​ព័ត៌មាន​ដែលបាន​លេច​​ឮថា ទទួល​បាន​ប្រាក់​សំណង​ពីការ​បញ្ចប់​បណ្តឹង​របស់​លោក ឧកញ៉ា សុខ ប៊ុន។ ប៉ុន្តែ​នាង​ក៏បដិសេធ​ មិនធ្វើ​ការ​បកស្រាយ​ពីការ​លើក​ឡើង​នោះ​ឡើយ​។

ជាមួយ​គ្នានេះ​​ដែរ​ក៏មាន​ព័ត៌មាន​ល្បីល្ហៀងៗ​ផងដែរ​ថា កញ្ញា សាសា​នាង​ឈប់​ខ្វល់នឹង​ការងារ​សិល្បៈ ហើយ​ជីវិត​របស់​នាងនា​ពេលនេះ​គឺ​ស្មើនឹង​សេដ្ឋិនី​រស់នៅ​លើ​ទឹកដី​អង្គរ​គឺនាង​មាន​លុយ​ចាយ​ពេញ​ៗ​ដៃ!ទោះ​ជា​យ៉ាងណា​ឈ្មោះ​របស់​នាង​ហាក់ដូចជា​បាន​ងើបកក្រើក​ឡើងវិញ​ផងដែរ​នៅលើ​ដង​វិថី​សិល្បៈ​ដោយ​ទាំងនាង​មិនបាន​បញ្ចេញនូវ​កាយវិការ​សិល្បៈ​សូម្បីតែ​បន្តិច​នោះ​ គឺបន្ទាប់​ពីនាង បាន​បញ្ចេញនូវ​​ពាក្យ​ពេចន៍​បែប​ចំអកឡក​ឡឺយដ៏​ខ្លាំង​ៗដាក់​តារា​ចម្រៀង​ស្រី​ចាស់វស្សា​គឺ​អ្នកនាង ម៉េង កែវ​ពេជ្ជតា​ ដោយ​សារ​បាន​​ផ្តើមចេញ​ពីរឿង​ស្លៀក​ពាក់​សិចស៊ី​បញ្ចេញ​នូវកៀន​កោះ ចន្លោះ​កន្លៀត​នៃ​រាងកាយ​របស់​តារា​សម្តែង​ស្រី​រលក​ក្រោយ គឺ នាង ដេននី ក្វាន់។

បើតាម​ការកត់​សម្គាល់​ពាក្យពេចន៍​ និង​អត្ថន័យ​នៅ​ក្នុងសារ​ចំអក​ឲ្យ​អ្នកនាង ម៉េង កែវពេជ្ជតា​ នោះ ហាក់​ដូចជា​បង្ហាញឲ្យ​ដឹង​ផងដែរ​ថា ជីវិត​របស់​កញ្ញា​ សាសា នៅក្នុង​ពេលនេះ​ កំពុងតែ​រស់នៅ​ក្នុង​ភាពដ៏​ហ៊ឺហា គឺពុំ​ស្គាល់នូវ​ពាក្យថា​ខ្វះខាត​នោះ​ទេ។ ប៉ុន្តែ​ផ្ទុយពី​ការស្មាន បែរ​ជា​តារាស្រី​សម្បូរ​រឿងអាស្រូវ​ ដែលមាន​ឪពុក​ជាឧកញ៉ា​ល្បីឈ្មោះ​មួយ​រូបធ្វើ​ឲ្យ​មជ្ឈដ្ឋាន​អ្នកលេង​ហ្វេសប៊ុក​ជាច្រើ​នភ្ញាក់​ផ្អើល​ចំពោះ​ការ​ប្រកាស​លក់ផ្ទះ និងសារ​ត្អូញត្អែរ​រឿង​អស់​លុយ​របស់នាង​ទៅវិញ។

ក្នុងទំព័រ​ហ្វេស​ប៊ុក​របស់​កញ្ញា ឯក សុជាតា ដែល​បាន​សរសេរ​បង្ហោះ​កាលពី​ថ្ងៃទី ១៨​ ខែ មិថុនា កន្លង​មកនេះ​ដាក់ថា៖ «ផ្ទះ​ល្វែង​លក់ៈ​ ទ/បៈ​ 4m x 22m មាន 5 បន្ទប់​គេង (Master room 1 )​ មាន​បន្ទប់​ទឹក ៦ និង ៣ ជាន់ ( ២​ល្វែង​កន្លះ)» ខណៈ​គេក៏​ឃើញ​មានដាក់​ភ្ជាប់​ជាមួយ​ប្រព័ន្ធ​ទូរស័ព្ទ​របស់​នាង​សម្រាប់​ទំនាក់​ទំនង​ទិញយ៉ាង​ច្បាស់​ទៀត​ផងដែរ​។

ទោះបី​ជា​ភ្នំពេញ​ប៉ុស្តិ៍​​ បាន​ខិតខំ​ព្យាយាម​សុំការ​បញ្ជាក់​ពី កញ្ញា ឯក សុជាតា ហៅ​ សាសា តាមទូរស័ព្ទ​យ៉ាងណា​តែ​ទូរស័ព្ទ​របស់នាង​មិន​មាន​អ្នក​លើក​ទទួល នោះទេ​៕

0

Comments

Please, login or register to post a comment

ព័ត៌មានពាក់ព័ន្ធ