Search form

Login - Register | FOLLOW US ON

Logo of Phnom Penh Post newspaper Phnom Penh Post - សាសា ​ហោះ​ពី​បាងកក​មក​បកស្រាយ​រឿង​មិត្ត​ភក្ដិ​បើក​ឡាន​បុកគេ​

Content image - Phnom Penh Post

សាសា ​ហោះ​ពី​បាងកក​មក​បកស្រាយ​រឿង​មិត្ត​ភក្ដិ​បើក​ឡាន​បុកគេ​

ភ្នំពេញ: ក្រោយពី​ផ្ទុះ​ដំណឹងជួប​គ្រោះ​​ថ្នាក់ចរាចរណ៍​បុក​រ៉ឺម៉ក​ម៉ូតូ​ក្រោម​ឥទ្ធិពល​គ្រឿង​ស្រវឹង​នៅ​ខេត្ត​បាត់ដំបង ដែលត្រូវ​បាន​ប្រព័ន្ធ​ផ្សព្ចផ្សាយ​ក្នុងស្រុក​ចុះផ្សាយ​យ៉ាង​ព្រោង​ព្រាត​នោះ​ អតីត​ពិធីការិនី​ទូរទស្សន៍​ស៊ីធីអិន កញ្ញា ឯក សុជាតា ហៅ​ សាសា កាលពី​រសៀល​ថ្ងៃ​ចន្ទ​ម្សិល​មិញ​បាន​សរសេរ​បកស្រាយ​ក្នុង​ទំព័រ​ហ្វេសប៊ុក​របស់នាង​ថា រថយន្ដ​បង្កហេតុ​នោះគឺ​ជា​របស់​មិត្ត​ភក្ដិ​នាង​នៅ​ខេត្ត​បាត់​ដំបង​ទេ។

អតីត​ពិធីការិនី​ សាសា ដែល​កំពុង​តតាំង​​បណ្ដឹង​ជាមួយ​សេដ្ឋី​អចលទ្រព្យ​អតីត​ឧកញ៉ា សុខ ប៊ុន ​ក្រោយ​ពី​ធ្លាយ​វីដេអូ​រង​ហិង្សា​វាយដំយ៉ាង​ព្រៃផ្សៃរហូត​ឈាន​ដល់​ការ​គំរាម​ដោយ​អាវុធ​កាលរាត្រី​រំលង​អាធាត្រ​ដើម​ខែ​កក្កដា​ ផ្អើល​អស់​ប្រព័ន្ធ​ផ្សព្វផ្សាយ​ជុំវិញ​ពិភពលោក​មក​នោះ នាង​បាន​អះអាង​ថា នាង​កំពុង​ស្ថិត​នៅ​ទីក្រុង​បាងកក ប្រទេស​ថៃ ក្នុង​អំឡុងពេល​កើត​ហេតុគ្រោះ​ថ្នាក់​ចរាចរណ៍​ ហើយ​នាង​នឹងហោះហើរ​មក​រាជធានី​ភ្នំពេញ​វិញ​នៅ​ថ្ងៃ​អង្គារ​ ដើម្បី​ធ្វើការ​បកស្រាយ​ឲ្យ​បាន​កាន់តែ​ច្បាស់​។

យ៉ាងណាមិញ ​កញ្ញា សាសា បាន​សរសេររបៀប​បែប​ហួស​ចិត្ត​ក្នុង​ទំព័រ​​ហ្វេសប៊ុក​របស់នាង​ថា៖ «ឱ​អស់​លោក​អ្នកកាសែត​អើយ ឈប់​ធ្វើ​ឲ្យ​ខ្ញុំ​ល្បី​ទៅ ឡាន​នោះ​ជា​ឡាន​មិត្ត​របស់ខ្ញុំ​នៅ​បាត់ដំបង​ទេ​!»។

ដោយសារ​ទូរស័ព្ទ​ សាសា មិន​អាច​ទំនាក់ទំនង​បាន ភ្នំពេញ ប៉ុស្ដិ៍ ក៏​បាន​ព្យាយាម​ទាក់ទង​ទៅ​លោក ឧកញ៉ា អ៊ុត ធី ជា​ឪពុក​របស់​នាង។

​សាសា បង្ហោះ​ម្សិលមិញ​ថា ​រថយន្ដបង្ក​ហេតុ​មិនមែន​ជា​របស់​នាង​ទេ​​។
​សាសា បង្ហោះ​ម្សិលមិញ​ថា ​រថយន្ដបង្ក​ហេតុ​មិនមែន​ជា​របស់​នាង​ទេ​​។ រូបថត ហ្វេសប៊ុក

ឆ្លើយ​តប​ក្នុង​សំនៀង​ភ្ញាក់ផ្អើល​លោក​បាន​លាន់មាត់​ថា៖ «​ខ្ញុំ​មិនបាន​ជ្រាប​ដំណឹង​នេះ​ឡើយ​»។

នារសៀល​ថ្ងៃទី ៣ ខែ​សីហា ភ្នំពេញប៉ុស្តិ៍ បានធ្វើការទាក់ទងម​ន្ត្រី​ប៉ូលិស​ចរាចរណ៍​ពី​ដំណើរ​រឿង​នៃ​គ្រោះ​ថ្នាក់​ដែល​បាន​កើត​នៅ​ត្រង់​ចំណុច​ក្បែរ​មន្ទីរពេទ្យ​វិសាល​សុខស្ថិតនៅ​ក្នុង​ភូមិ​ព្រែក​មហាទេព សង្កាត់​ស្វាយប៉ោ ក្រុង​បាត់ដំបងរវាង​រថយន្ដ​ដ៏​ទំនើប​មួយ​គ្រឿងម៉ាក Porsche ដែល​មាន​គេ​អះអាង​ថា​ជា​រថ​យន្ដ​របស់​កញ្ញា​សាសា​ អតីត​ពិធិការិនី​ទូរទស្សន៍​ស៊ីធីអិន​ជា​មួយ​នឹង​ម៉ូតូ​សណ្ដោង​រ៉ឺម៉ក​ដឹក​ទឹក​កកកាល​ពី​​វេលា​ម៉ោង​១១ និង ៥០ នាទី​យប់នា​ថ្ងៃ​ទី ២ ខែ​សីហា​ឆ្នាំ ២០១៥ នោះផង​ដែរ​​។

លោក ឈាង រ៉ុង មន្ត្រី​ប៉ូលិស​ការិយាល័យ​ចរាចរណ៍​ក្រុង​បាត់​ដំបង​ បាន​ឲ្យ​ដឹង​ពី​កំណត់​ហេតុ​គ្រោះ​ថ្នាក់​ខាង​លើ​ថា៖ «​គ្រោះ​ថ្នាក់​រវាង​រថ​យន្ដ​ទំនើប​ម៉ាក​ Porsche នោះ​មានមែន​ តែ​ម្ចាស់​រថយន្ដ​ជាមនុស្ស​ប្រុស​ដែល​មាន​ឈ្មោះ​ ឡូតូ វ័យ ៣២ ឆ្នាំ​ជា​អ្នក​រស់​នៅ​ក្នុង​សង្កាត់​រតនៈ​ និង​ជន​រង​គ្រោះ​បើក​រ៉ឺម៉កម៉ូតូ​ដែល​ដឹក​ទឹកកក​នោះ​ឈ្មោះ ទុយ មោង វ័យ ៤២ ឆ្នាំ​ជា​អ្នកភូមិ​នៅ​ក្នុង​ភូមិ​រតនៈ​ សង្កាត់​រតនៈ​ ក្រុង​បាត់​ដំបង​។ ដំណោះ​ស្រាយ​រវាង​ភាគី​ទាំងពីរ​ត្រូវ​បាន​ខាង​ម្ចាស់​រថយន្ដ​សង​ថ្លៃ​ខូចខាត​ដល់​ជន​រង​គ្រោះ​ដែល​មាន​ម៉ូតូ​ម៉ាក​សាន់យ៉ាន់​ក្នុង​តម្លៃ ៣ លាន​រៀល»។

គួរ​រំឭក​ផង​ដែរ​ថា​ កាលពី​ខែ​ឧសភា កញ្ញា សាសា ​ក៏​ធ្លាប់​ត្រូវ​បាន​ព័ត៌មាន​ចុះ​ផ្សាយ​ថា​ នាង​បាន​បើក​រថយន្ដ​ Porsche ពណ៌​ស​បុក​ជនបរទេស​បាក់​ដៃនា​រាត្រី​ថ្ងៃ​ទី ១៥ ខែ​ឧសភា ​ឆ្នាំ ២០១៥ នៅ​ម្ដុំ​បឹង​ត្របែក​។ ​

កាល​នោះ​នាង​បាន​បង្ហោះ​វីដេអូ​បក​ស្រាយ​ថា ​នាង​បាន​ញ៉ាំ​គ្រឿងស្រវឹង​តិចតួច​មែន ប៉ុន្តែ​ការពិត​គឺ​នាង​ជា​ជន​រង​គ្រោះ ដោយរថយន្ដនាង​ត្រូវ​ម៉ូតូ​ជន​បរទេស​ស្រវឹងបុក​ពី​ចំហៀង​៕

0

Comments

Please, login or register to post a comment