.jpg)
សុខ ពិសី ជាតំណាងផលិតផល Unilever។ ហ្វេសប៊ុក
ភ្នំពេញៈ ក្រៅពីកាក់កបនឹងអាជីព ជាតារាសម្តែងស្ប៉តពាណិជ្ជកម្មធំឲ្យសាបៀរ Ganzberg កាលពីឆ្នាំចាស់មកឃើញថា ឆ្នាំថ្មីនេះ តារាចម្រៀងស្រីនៅល្បីលើទ្រនំផលិតកម្មសាន់ដេ កញ្ញា សុខ ពិសី ក្លាយជាអ្នកតំណាងផលិតផលរក្សាសម្ផស្សថ្មីគឺក្រែមលាបមុខម៉ាក Fair & Lovely នៃក្រុមហ៊ុន Unilever ដែលបានប្រកាសតាំងពីថ្ងៃទី ១៩ ខែមករា ឆ្នាំ ២០១៨ នៅ សណ្ឋាគារណាហ្គាវើលដ៍។
គេសង្កេតឃើញថា រយៈពេលប៉ុន្មានឆ្នាំចុងក្រោយនេះ តារាចម្រៀងស្រីជ្រកទ្រនំសាន់ដេ ដែលមានសំឡេងស្រួយដូចជាសារិកា កញ្ញាសុខ ពិសី ហាក់ដូចជាកាក់កប ខ្លាំងនឹងទីផ្សារថតស្ប៉តពាណិជ្ជកម្មច្រើនជាងទីផ្សារ នៅផ្នែកសិល្បៈដោយពុំសូវមានចេញបទចម្រៀងថ្មីៗ ទាក់ទាញចំណាប់អារម្មណ៍ពីមហាជនគាំទ្រទេ ហើយក៏ឧស្សាហ៍ពើបប្រទះនឹងរលកព័ត៌មានអាស្រូវទៀតផងដែរ គឺបែកធ្លាយរឿងមានស្នេហ៍លួចលាក់ជាមួយនឹងថៅកែផលិតកម្មខ្លួនឯងនោះ។
យ៉ាងណាការទទួលបានតំណែងថ្មីជាតារាតំណាងឲ្យ ផលិតផលរក្សាសម្ផស្សថ្មី គឺក្រែមលាបមុខម៉ាក Fair & Lovely របស់ក្រុមហ៊ុន Unilever នេះ មិនត្រូវបានកញ្ញា សុខ ពិសី បកស្រាយឲ្យដឹងពីរយៈពេលប៉ុន្មាន និងតម្លៃខ្លួនប៉ុន្មានឡើយ ដោយប្រព័ន្ធទូរស័ព្ទដែលធ្លាប់ធ្វើទំនាក់ទំនងនាងពីមុន មិនអាចទាក់ទងបាន។
បើតាមការលើកឡើងរបស់កញ្ញា សុខ ពិសី នៅក្នុងថ្ងៃប្រកាសថា នាងក្លាយជាអ្នកតំណាងផលិតផលថ្មី តារាសម្បុរសាច់សខ្ចីខាងលើបានឲ្យដឹងថា នាងពិតជាមិនស្មានថា បានក្លាយជាអ្នកតំណាងផលិតផលល្អ និងមានគុណភាពនេះឡើយ។
ប៉ុន្តែ កញ្ញា សុខ ពិសី គ្រាន់តែមានសារជំរុញ និងផ្សព្វផ្សាយដល់ប្រិយមិត្តអ្នកគាំទ្រនាងថា៖ «ខ្ញុំចង់ឲ្យបងប្អូននារីយើងឈប់ខ្វល់ទៀតទៅ Fair & Lovely នេះមានគុណភាពល្អ ហើយតម្លៃវិញ មានត្រឹមតែ ១០០០ រៀល តែប៉ុណ្ណោះ ក៏អាចស្អាតបានដែរ។ ផលិតផលម៉ាក Fair & Lovely មិនត្រឹមតែមានគុណភាពល្អទេ រីឯតម្លៃវិញក៏សមរម្យបំផុត»។
ក្រៅពីរូបកាយសម្ផស្សតារាចម្រៀងស្រីសាច់សខ្ចីដូចបណ្តូលចេកកញ្ញា សុខ ពិសី ក៏ស្រាប់តែល្បីលេចឮដំណឹងថា មានក្រុមកន្លង់ទាំងចាស់ក្មេង ទាំងនៅក្រៅរង្វង់សិល្បៈ និងទាំងខាងក្នុងសង្គមសិល្បៈមិនត្រឹមតែតាមសុំស្នេហ៍ទេ ថែមទាំងបានទៅសួរនាំដល់ចាស់ទុំរបស់នាងទៀតផងដែរនាពេលកន្លងមក។
តែក្នុងចំណោមក្រុមកន្លង់ជាច្រើនបានតាមចោមរោមទៅសុំស្នេហ៍ ធ្វើជាម្ចាស់បេះដូងទាំងឡាយនោះ បែរជានៅពុំទាន់គាប់ចិន្តានៃបុប្ផាមួយទង ដែលមានស្រុកកំណើតនៅក្រុងតាខ្មៅដែលជាតារាចម្រៀងស្រីកំពុងតែត្រៀមបើកចំហចិត្តសន្សំពិន្ទុដែរទៅវិញ។
តាមស្តាប់មើលទៅ តារាចម្រៀងស្រី ដែលមមាញឹកខ្លាំងនឹងការងារសិល្បៈ ដោយបានសម្រុកថតបទចម្រៀងត្រៀមចេញរដូវកាលចូលឆ្នាំថ្មីប្រពៃណីខ្មែរ ខណៈរាសីឡើងខ្លាំងទាំងចម្រៀង និងថតស្ប៉តពាណិជ្ជកម្មយ៉ាងណាក្តី កញ្ញា សុខ ពិសី ហាក់ដូចជានាងមិនបានធីបចោលបញ្ហាស្នេហានោះឡើយគឺថា នាងក៏បានទុកពេលខ្លះ ដើម្បីសម្លឹងមើលអំពីគុណសម្បត្តិ នៃបុរសជាអនាគតគូស្នេហ៍ដ៏សមសួនរបស់ខ្លួននាងផងដែរ។
ធ្លាប់បានប្រាប់ភ្នំពេញ ប៉ុស្តិ៍ ទាំងបើកចំហឲ្យដឹងថា៖ «តាមពិតទៅ សម្រាប់នាងខ្ញុំ រឿងថាមានអ្នកស្រឡាញ់ច្រើន មិនមែនទើបតែឥឡូវនេះ ឡើយគឺមានប៉ុន្មានឆ្នាំមកហើយ។ តែមកទល់ពេលនេះ នាងខ្ញុំដូចពុំទាន់បានពេញចិត្តអ្នកណាមួយនៅឡើយទេ»៕
