ភ្នំពេញៈ គ្រាន់តែបានឱកាសឆ្លងឆ្នាំ ២០១៧ មកឆ្នាំថ្មីឆ្នាំ ២០១៨ មិនបានប៉ុន្មានថ្ងៃផង ក៏ស្រាប់តែផុសចេញសារបែបចំអន់លេងបន្លំមែន ឬញាក់ឆ្វេងវាយស្តាំរបស់អ្នកនិពន្ធទំនុកច្រៀង និងទំនុកភ្លេងនៅលើទ្រនំហង្សមាស និងជាតារាចម្រៀងប្រុសម្តងម្កាលគឺលោក សួន ពិសិដ្ឋ គួរឲ្យទាក់អារម្មណ៍ខ្លាំងតែម្តង។
ចេញពីគណនីហ្វេសប៊ុកខ្លួនបង្ហោះនូវសារវែងអន្លាយមួយបែរកាណុងចំៗតែម្តងទៅរកក្រុមកូនខ្មែរ ដែលជាក្រុមធ្លាប់បានបង្កើតសង្គ្រាមពាក្យសម្តីជាសាររិះគន់ទៅក្រុមតារាចម្រៀង និងអ្នកនិពន្ធមួយចំនួននាពេលបច្ចុប្បន្នថា ចូលចិត្តនិពន្ធ ឬច្រៀងបទបែបបែកស្លុយកន្លងមក លោក សួន ពិសិដ្ឋ សរសេរថា៖ «ចាំមើលស្នាដៃបទភ្លេងចម្រៀងថ្មីរបស់កូនខ្មែរយើង សម្រាប់ចូលឆ្នាំខ្មែរ ២០១៨ ប្រពៃណីខ្មែរយើង។ នេះសង្ស័យតែស្លុយ ៩០ ភាគរយ ហើយមើលទៅ!ហើយបើនៅតែមានបងប្អូនខ្មែរយើងគាំទ្រឡើងពេញទំហឹង រាប់លាននាក់ទូទាំងប្រទេសអ៊ីចឹង!សង្ស័យតែមានបទស្លុយថ្មី «រាំអិញចក!» បទ «ចាក់ទឹកត្នោត» បទ«រាំដាច់ជង្គង់» ឯ បទខ្ញុំវិញសង្ស័យតែពីបទ «រាំកេវ» ទៅជា«រាំកោង» វិញទេ?»។
អ្នកនិពន្ធទំនុកច្រៀង និងទំនុកភ្លេងនៅលើទ្រនំហង្សមាស និងជាម្ចាស់បទចម្រៀងមានចំណងជើងថា «រាំកេវ» លោក សួន ពិសិដ្ឋ ក៏បានដាក់មួយផ្លែទៀតផ្នែកទំនុកភ្លេងទៅដល់ក្រុមកូនខ្មែរផងដែរថា៖ «បទភ្លេងបរទេស ដែលយើងចូលចិត្តស្តាប់ និងហៅថា ស្លុយនោះ បើសិនជាស្តាប់តែភ្លេងក៏ពីរោះ សប្បាយរីករាយម្យ៉ាងដែរ! សម្រាប់ខ្ញុំផ្ទាល់គឺវាមិនខុស ក៏មិនត្រូវដែរ!សំខាន់យើងចេះបង្កើតការតែងនិពន្ធរកនៅក្នុងចំណុចកណ្តាល។ មិនហួសពេក មិនលើសពេក មិនជ្រុលនិយមពេក!ហើយត្រូវចេះល្បាយភ្លេងខ្មែរ ឧបករណ៍ខ្មែរ និងអត្ថន័យអប់រំ!»។
ក្រោយពីបានពន្លះមួយប្រាវមកនោះ លោក សួន ពិសិដ្ឋ ក៏បានបង្វែរមករកភាពទន់ភ្លន់បែបបបោសអង្អែលអ្នកដែលខ្លួនទើបតែវាយប្រហារអម្បាញ់មិញភ្លាមថា៖ «បើវប្បធម៌ប្រទេសជិតខាង បទភ្លេងចម្រៀងគេស្លុយ រាំអាសអាភាស កន្ត្រាក់ដៃជើងដូចជាបាត់បង់វិញ្ញាណ ដូចជាចូលរូបអារុក្ខអារក្សអ្នកតាគឺជារឿងរបស់គេ! តែសូមបងប្អូនសិល្បករ ផលិតករ និងកូនខ្មែរគួរចូលរួមពិចារណាថា តើគួរចម្លង និងបន្តការចម្លងគេរបៀបនេះដែរឬអត់? ដែលវប្បធម៌ និងប្រពៃណីខ្មែរដ៏សែនល្អផូរផង់ ត្រចះត្រចង់ គួរជាទីកោតសរសើរ និងមោទនៈ សម្រាប់ជាតិខ្មែរយើង និងពិភពលោកទាំងមូល!»។
នៅទីបញ្ចប់អ្នកនិពន្ធវ័យក្មេងជំនាន់ក្រោយរបស់ផលិតកម្មហង្សមាស ដែលគេធ្លាប់បានស្តាប់ស្នាដៃនិពន្ធបទចម្រៀង និងទំនុកភ្លេងរបស់លោក ក៏ច្រើនដែរតាមរយៈបទចម្រៀង តារា ប្រុសស្រីល្បី ក៏ដូចជាចុងក្រោយនេះ ក៏មានបទលោកបានបង្ហើរសំនៀងផ្ទាល់ខ្លួនដែរនោះ ក៏បានបញ្ចប់សេចក្តីខ្លួនដោយការធ្វើសំណូមពរថា៖ «ចូលរួមផ្តល់មតិយោបល់ទាំងអស់គ្នាបងប្អូន!សូមអភ័យទោស!ខ្ញុំមិនមែនជាអ្នកប្រាជ្ញវិទូ ឬអ្នកទស្សនវិទូអីទេ ហើយខ្ញុំមុខជាសរសេរអក្សរខុសច្រើនហើយមើលទៅ ដោយសារសរសេរភ្លាមៗ ហើយផូស្តភ្លាម សូមបងប្អូនមេត្តាអធ្យាស្រ័យ និងសូមជួយកែតម្រូវខ្ញុំផង!»៕