.jpg)
កញ្ញា ស៊ីន យូប៊ីន និងលោក ខាត់ វៃហាំង ចូលរួមសម្ពោធមជ្ឈមណ្ឌលកែសម្ផស្ស។ វុទ្ធី
ភ្នំពេញ: កញ្ញា ស៊ីន យូប៊ីន ដៃគូ លោក ខាត់ វៃហាំង ក៏នៅតែស្ថិតក្នុងចម្ងល់មហាជនថា អ្នកទាំង ២ មិនត្រឹមតែមានទំនាក់ទំនងស្នេហាគ្នា ក្នុងសាច់រឿងប៉ុណ្ណោះទេ ថែមទាំងមានទំនាក់ទំនងចំណងស្នេហានៅក្រៅឆាកថែមទៀតផង។ តែអ្នកទាំង ២ ទាំង ស៊ីន យូប៊ីន និង ខាត់ វៃហាំង នៅតែមិនទទួលស្គាល់រឿងមន្ទិលសង្ស័យនេះ។
រំឭកពីព័ត៌មាននិទានពីទំនាក់ទំនងស្នេហាក្រៅឆាក រវាងតារាសម្តែងរូបស្រស់សម្ផស្សខ្ញង់ អតីតជាម្ចាស់ពាន Freshie Girl ចំណាត់ថ្នាក់លេខ ១ ប្រចាំនៅឆ្នាំ ២០១៤ កញ្ញា ស៊ិន យូប៊ីន និងកំលោះសង្ហា ខាត់ វៃហាំង លេចភាពរន្ទឺឡើងច្រើនឆ្នាំហើយ ខណៈអ្នកទាំង ២ តែងបង្ហាញពីដំណើរបណ្តើរគ្នាត្រសងចូលរួមកម្មវិធីសិល្បៈ ត្រសងក្នុងភាពស្និទ្ធស្នាលនឹងគ្នាប្រៀបដូចគូស្នេហ៍ផ្អែមល្ហែមគ្នាខ្លាំង។
មិនខុសពីរូបភាពបង្អួតភ្នែកមហាជនមុនៗនោះដែរ នៅឱកាសចូលរួមសម្ពោធមជ្ឈមណ្ឌលកែសម្ផស្សមួយនៅម្តុំផ្សារមាន់អាំងដែលទើបរំលងថ្មី តារាសម្តែងដែលមហាជនភាគច្រើន គិតថា ជាគូស្នេហ៍ នឹងគ្នាមួយគូនេះក៏បង្ហាញពីដំណើរបណ្តើរគ្នាចូលរួមកម្មវិធីនេះក្នុងរូបភាពតោងដៃគ្នា យ៉ាងស្អិតក្នុងដំណើរចូលរួមនេះ។ ក្នុងជំនួបនោះ ពួកគេទាំង ២ នៅតែរក្សាចម្លើយថា ពួកគេទាំង ២ នាក់នៅត្រឹមជាមិត្តភក្តិនឹងគ្នាធម្មតាដដែល។
តារាសម្តែងស្រីល្បីរលកក្រោយ និងជាតួឯកស្រីនៃខ្សែភាពយន្តរឿង «តម្លៃស្នេហ៍» ដែលបានឈ្នះពានជាតារាស្រីឆ្នើមប្រចាំព្រឹត្តិការណ៍មហោស្រពភាពយន្តជាតិលើកទី ៥ នាឆ្នាំ ២០១៧ កញ្ញា ស៊ីន យូប៊ីន បានប្រាប់ថា រឿងរ៉ាវស្នេហាកន្លងមកទាក់ទងជាមួយលោក ខាត់ វៃហាំង គ្រាន់តែជាពាក្យចចាមអារ៉ាមតែប៉ុណ្ណោះ គ្មានអ្វីក្រៅពីទំនាក់ទំនងមិត្តភាព និងការស្រឡាញ់រាប់អានគ្នាដូចបងប្អូននោះទេ។
ម្ចាស់ពានតារាសម្តែងឆ្នើមជំនាន់ថ្មីរូបនេះ ក៏បានទទួលស្គាល់ដែរថា៖ «កន្លងមកអ្នកគាំទ្រចង់ឲ្យពួកខ្ញុំទាំង ២ (កញ្ញា ស៊ីន យូប៊ីន និងលោក ខាត់ វៃហាំង) ក្លាយជាគូស្នេហ៍ពិត តែខ្ញុំមិនអាចធ្វើបាននោះទេបង ព្រោះខ្ញុំស្រឡាញ់ និងចាត់ទុកបង វៃហាំង ជាបងប្រុសម្នាក់ដែលគួរឲ្យគោរព គ្មានគិតអ្វីលើសពីនេះទេបង ប៉ុន្តែខ្ញុំពិតជាអរគុណដល់ពួកគាត់ (អ្នកគាំទ្រ) ដែលស្រឡាញ់ខ្ញុំទាំង ២ កន្លងមក »។
តារាសម្តែងវ័យ ២២ ឆ្នាំរូបនេះបានបញ្ជាក់ថា តាំងពីចាប់ដៃគូសម្តែងជាមួយនឹងលោក ខាត់ វៃហាំង មកដល់ពេលនេះ គឺថតបានចំនួន ៥ រឿង មានដូចជារឿង «និស្ស័យស្នេហ៍ខ្ញុំ», «ចិត្តស្អប់បង្កប់ស្នេហ៍», «រឿងអូន ជាការចងចាំបង», «ម្តាយក្មេករើសកូនប្រសា» និងរឿង «ខ្នោះបេះដូង» ដែលរឿងទាំង ៥ នេះសុទ្ធតែជារឿងភាគ។
វិលមកជួប តារាប្រុស ខាត់ វៃហាំង វិញ លោកអះអាងដូចគ្នានឹង ស៊ីន យូប៊ីន ដែរ ដោយលោកបានអះអាងថា៖ «មិនបានគិតអ្វីលើសពីមិត្តភាពនោះទេ គ្រាន់តែខ្ញុំ មានភាពស្និទ្ធស្នាលជាមួយ យូប៊ីន ជាងតារាស្រីផ្សេងទៀតតែប៉ុណ្ណោះ៕
