ភ្នំពេញៈ ក្រោយពីមានកូនស្រីសំណព្វចិត្តគួរឲ្យស្រឡាញ់ឈ្មោះថា ភិន សុខេធើរីណា ដែលហៅក្រៅថា Katherine បច្ចុប្បន្នមានវ័យជាង ១ ខួប ទៅហើយ និងរូបខ្លួនក៏បានវិលត្រឡប់ទៅប្រឡូកថតកុនជាហូរហែវិញផងនោះ មហាជនក៏ចាប់អារម្មណ៍ខ្លាំងនឹងសាររបស់តារាសម្តែងស្រី មេម៉ាយទាំងវ័យក្មេងខ្ចី សម្រស់នៅតែស្អាតផូរផង់ អ្នកនាង ភិន សុដាលីស បង្ហើរតាមអ៊ីនស្តាក្រាមបង្ហាញពីជម្រើសនៃក្តីស្នេហ៍ថ្មីរបស់ខ្លួននាពេលថ្មីៗនេះ។
ខណៈធ្វើដំណើរកម្សាន្តនៅឯក្រុងបាងកក ប្រទេសថៃនោះ តារាសម្តែងជាកូនស្រីច្បង ចាងហ្វាងផលិតកម្មមហាហង្ស អ្នកនាង ភិន សុដាលីស បង្ហោះសារជាភាសាអង់គ្លេស ដែលមានន័យប្រែសម្រួលថា៖ «ហេតុផលមួយ ដែលចង់នៅម្នាក់ឯងគឺអាចមានជម្រើសលួចស្រឡាញ់គេបានច្រើន» ដែលបង្កការភ្ញាក់ផ្អើលដល់មហាជនខ្លាំង និងបានចោទសួរដេញដោលគ្នាថា៖ «តើ ភិន សុដាលីស កំពុងតាមស្រឡាញ់អ្នកណាខ្លះទៅទើបនាងលើកឡើងបែបនេះ?»។
តារាសម្តែងស្រីមេម៉ាយកូនមួយនៅក្តៅស្រួយ ភិន សុដាលីស ដែលមហាជនបានចាប់អារម្មណ៍ខ្លាំងទៅនឹងសម្ព័ន្ធភាពឯកជនរបស់នាងក្រោយបែកបាក់គូស្នេហ៍ និងភាពស្និទ្ធស្នាលជាមួយបុរសប្លែកៗមុខ ខណៈនាងធ្លាប់បានបកស្រាយថា គ្រាន់តែជាតួប្រុសសម្តែងកុនជាមួយគ្នានោះ ក៏បកស្រាយសារខាងលើថា៖ «នោះគឺគ្រាន់ជាសារ ដែលខ្ញុំសរសេរលេងជាមួយមិត្តភក្តិតែប៉ុណ្ណោះ មិនមានអ្វីទេ»។
ភិន សុដាលីស ដែលត្រឡប់មកសម្តែងទាំងកុនដុំ និងកុនភាគវិញ ក្រោយពីនាងបានសម្រាលកូនស្រីមានវ័យ ៧ ខែ គឺមានរឿង «មន្តស្នេហ៍លេខា» និងរឿង «ផ្លូវទៅមរណៈ» ដោយថតទាំងផលិតកម្មប៉ានាងដែរបន្តឲ្យដឹងពីភាពទំនេរពុំទាន់រកឃើញម្ចាស់ចិត្តថ្មីថា៖ «ចំពោះរឿងមានគូកននោះ ខ្ញុំពុំទាន់គិតគូរទេ គឺចង់ទុកពេលមកផ្តោតការងារសិល្បៈ ក៏ដូចជាការងារអាជីវកម្មផ្ទាល់ខ្លួនសិន និងពេលសម្រាប់មើលថែទាំកូនស្រី។ រឿងគូកនថ្មីស្អីនឹង ប្រសិនបើនាងខ្ញុំមាននោះ ច្បាស់ជាផូស្ត រូបឲ្យខាងបងៗឃើញមិនខានទេ»។
តាមធម្មតាឆ្នាំថ្មីមកដល់ តារាសម្តែងប្រុសស្រីភាគច្រើនរមែងមានការចុះកុងត្រាថ្មីជាមួយផលិតកម្មណាមួយមិនខាន ដើម្បីថតកុនថ្មី តែសម្រាប់ ភិន សុដាលីស វិញបែរជាបង្ហើបថា ៖ «ការថតកុនវិញនាពេលនេះ នាងខ្ញុំមិនទាន់ទទួលផលិតកម្មណាមួយនៅឡើយទេ ដោយសារចង់បានពេលសម្រាកខ្លះសិន តែអាចក្រោយចូលឆ្នាំចិនខាងមុខទៅ នាងខ្ញុំនឹងទទួលថតវិញ»៕