Search form

Login - Register | FOLLOW US ON

Logo of Phnom Penh Post newspaper Phnom Penh Post - អម្ពរ ទេវី ថ្លែង​សារពី​អាមេរិក​ ពី​ឱកាស​សម្តែង​រឿង​ទឹក​ចិត្ត​ម្តាយ​សម័យ​ថ្មី

Content image - Phnom Penh Post
តារា​សម្ដែង​ ឌុច លីដា ក្នុងឈុត​មួយ​នៃ​ខ្សែ​ភាពយន្ដ​។ ហេង ជីវ័ន

អម្ពរ ទេវី ថ្លែង​សារពី​អាមេរិក​ ពី​ឱកាស​សម្តែង​រឿង​ទឹក​ចិត្ត​ម្តាយ​សម័យ​ថ្មី

ភ្នំពេញ: ខណៈ​ទស្សនីយភាព​ភាពយន្ត​ខ្នាតធំ «ទឹកចិត្ត​ម្ដាយ​សម័យ​ថ្មី» ក៏ដក់​ជាប់​ក្នុង​ចិត្ត​យុវវ័យ​គាំទ្រ​ក្រោម​ភាព​រំជួលចិត្ត​ដិត​នឹង​តំណក់​ទឹកភ្នែក អន្ទងពី​ទេពកោសល្យ​តួអង្គ​សម្តែង​រួម​ដោយ​តារា​ជើង​ចាស់​បួន​ជំនាន់ បង្កប់​ដោយ​សារ​អប់រំ​សង្គម សម្តែង​ជាម្តាយ​អ្នកនាង​អម្ពរ ទេវី ក៏បាន​ថ្លែង​សារ​សម្ដែង​អារម្មណ៍​រំជួលចិត្ត​ពីទឹកដី​អាមេរិក។

រយៈពេល​ជាង​កន្លះខែ​ហើយ​ដែល​ភាពយន្ត​ខ្នាតធំ​វណ្ណកម្ម​ពីផលិតកម្ម​ថោន រឿង «ទឹកចិត្ត​ម្តាយ​សម័យ​ថ្មី» សម្ពោធ​ចាក់​បញ្ចាំង​ជា​ផ្លូវការ និងបាន​ចាក់​បញ្ចាំង​នៅ​គ្រប់រោង​ភាពយន្ត​ទំនើបៗ​នៅ​ក្នង​រាជធានី​ភ្នំពេញ។

ខណៈ​ដែល​ភាពយន្ត​ដែល​លេច​ចេញពី​ស្នាដៃ​និពន្ធ​និងដឹក​សម្តែង​ពី​អ្នកស្រី ពាន់ ភួងបុប្ផា មួយ​នេះ គេ​សង្កេត​ឃើញ​មានការ​គាំទ្រ​ខ្លាំង​មែនទែន​ពីសំណាក់​ទស្សនិកជន ព្រម​ទាំង​មានការ​កោត​សរសើរ​ខ្លាំង​ទៅលើ​អត្ថន័យ​អប់រំ​ទៅលើ​យុវវ័យ​កម្ពុជា​សម័យថ្មី ពី​ដំបូន្មាន និង​ទឹកភ្នែក​របស់​អ្នក​មានគុណ ចំពោះ​កូនៗ​សម័យ​ថ្មី ។

Content image - Phnom Penh Post
អ្នកនាង អម្ពរ ទេវី និង​ ឌុច លីដា តួអង្គ​រឿង​ទឹកចិត្ដ​ម្ដាយ​សម័យ​ថ្មី​។ ហេង ជីវ័ន

«ទឹកចិត្ត​ម្តាយ​សម័យថ្មី » ជា​ភាពយន្ត​បង្ហាញ​ពី​ទឹកចិត្ត​ម្តាយ និងកូន ពិសេស​ពីទុក្ខ​លំបាក​ក្នុងការ​អប់រំ​កូនៗ ដែល​លង់​នឹង​ការ​ភ្លើតភ្លើន សម្ភារ​និយម​អូសទាញ ផ្ទុយ​ស្រឡះ​នឹង​ទំនោរ​ផលិតករ​មួយ​ចំនួន​ធំ​ដែល​ផលិត​តែរឿង​ខ្មោច និង​កំប្លែង ជាមួយ​ការ​អះអាង​ថា «តម្រូវ​ទីផ្សារ​យុវវ័យ។

ភាពយន្ត​បែប​អប់រំ​តែ​ទាក់ទាញ​យុវវ័យ នឹង​ឈុត​បញ្ចប់​ទឹកភ្នែក​ទាំង​តួសម្តែង និង​អ្នកទស្សនា​នោះ ត្រូវ​បាន​អ្នកស្រី អម្ពរ ទេវី ដែលជា​តារា​សម្ដែង​ជើង​ចាស់​ពោរពេញ​ដោយ​សមត្ថភាព និង ជា​តួអង្គ​ម្ដាយ​មួយរូប​នៅក្នុង​រឿង «ទឹកចិត្ត​ម្ដាយ​សម័យថ្មី» ក៏បាន​ថ្លែង​សារ​អំណរគុណ​ទឹកដី​អាមេរិក​ថា៖ «ខ្ញុំ​ខកខាន​ការសម្តែង​ភាពយន្ត​ជាង ១៥ ឆ្នាំ។ ប៉ុន្តែ​ ក៏មិន​នឹកស្មាន​ដែរថា ការវិល​មក​សម្តែង​ជាថ្មី របស់ខ្ញុំ​ភាពយន្ត​នេះ​នឹង​ទទួល​បាន​ការគាំទ្រ​ខ្លាំង​ចឹងទេ។ អរគុណ អ្នក​មីង ពាន់ ភួង​បុប្ផា និង​ផលិតកម្ម​ថោន ផ្តល់​ឱកាស​នេះ​ជាថ្មី»។

យ៉ាងណា​មិញ​ក្រោយ​ចាក់​បញ្ចាំង​ជា​ផ្លូវការ​រយៈពេល​ជាង ១៥ ថ្ងៃ និង​ទទួល​បាន​ការគាំទ្រ​យ៉ាង​ភ្លូក​ទឹក ភ្លូកដី ពិសេស​ពី​សំណាក់​យុវវ័យ​តែម្ដង​នោះ នៅ​ព្រឹក​ថ្ងៃទី ២០ ខែ​មីនា​ផលិតកម្ម​ថោ​ន ក៏បាន​ដាក់​បញ្ចាំង​ភាពយន្ត​រឿង​ទឹកចិត្ត​ម្តាយ​សម័យថ្មី ឲ្យ​សិស្ស​សាលា កីឡាករ​បាល់ទាត់​រួមនឹង​អ្នកព័ត៌មាន ចូល​ទស្សនា​ដោយ​មិន​គិតថ្លៃ ខណៈ​ដែល​តំណាង​ផលិតកម្ម​ថោន ក៏បាន​បង្ហាញថា៖ «ដោយ​សារតែ​ភាពយន្ត​នេះ​មានការ​គាំទ្រ​ច្រើន​លើស​លប់ និង​ការអប់រំ​ល្អ ទើប​ផលិតកម្ម​ក្រោយ​បញ្ចាំង​លក់​សំបុត្រ​រយៈពេល ១៥ ថ្ងៃ ហើយ​ក៏នឹង​សម្រេច​ដាក់​បញ្ចាំង​លក្ខណៈ​មនុស្សធម៌​នៅ​រោង​ភាពយន្ត Prime Cineplex ផ្សារ​សុវណ្ណា ដើម្បី​ឲ្យ​យុវវ័យ​ទស្សនា​បាន​កាន់តែ​ច្រើន និង​ស្វែង​យល់​ឲ្យកាន់​តែច្បាស់ ចំពោះ​ការអប់រំ​ក្នុង​រឿង​នេះ»៕

0

Comments

Please, login or register to post a comment