.jpg)
វត្តមានតារាសម្តែងជើងចាស់ អម្ពរ ទេវី លើកទី២មកស្រុកខ្មែរ។ ហ្វេសប៊ុក
ភ្នំពេញ: ក្រោយពីទទួលជោគជ័យនៅក្នុងការវិលមកថតកុនខ្មែរឡើងវិញ នៅស្រុកកំណើតដំបូង ក្រោយបាត់មុខមួយរយៈ តាមរយៈខ្សែភាពយន្តខ្នាតធំរឿង «ទឹកចិត្តម្តាយសម័យថ្មី» របស់អ្នកស្រី ពាន់ ភួងបុប្ផា ឆ្លុះបញ្ចាំងពីតថភាពសង្គមនាសម័យទំនើបដែលប្រើប្រាស់សម្ភារនិយមរបស់កូនៗជំនាន់ក្រោយទាំង ៣ ស្រទាប់នាឆ្នាំចាស់មកនោះអ្នកស្រី អម្ពរ ទេវី ក៏ក្តាប់បានឱកាសថតកុនចំនួន ២ ថ្មីទៀតនាដើមឆ្នាំ ២០១៨ នៅស្រុកកំណើត។
បើតាមប្រភពនៃបណ្តាញសង្គមសិល្បៈនោះ បានឲ្យដឹងថា អ្នកស្រី អម្ពរ ទេវី បានមកថតសម្តែង ខ្សែភាពយន្តចំនួន ២ រឿង នាដើមឆ្នាំ ២០១៨ នេះគឺរឿង «កាកី» របស់ផលិតកម្ម LD និងខ្សែភាពយន្តរឿង«ឆន្ទា» របស់ផលិតកម្ម RED Picture ដែលគ្រោងនឹងចាក់បញ្ចាំងនៅក្នុងស្ថានីយទូរទស្សន៍ CTN ខណៈអ្នកស្រីបានមកដល់ស្រុកខ្មែរតាំងពីថ្ងៃទី ១០ ខែមករា ឆ្នាំ ២០១៨ មក ម្ល៉េះ។
ការបង្ហាញវត្តមានរបស់អតីតជាតារាភាពយន្ដខ្មែរ ដែលទទួលបានការសាទរ ជាតួអង្គដែលមានទេពកោសល្យសម្ដែងគ្រប់កាលៈទេសៈទាំងកាចឆ្នាសឆ្នើម កម្សត់ស្រក់ទឹកភ្នែក និងក្រមិចក្រមើមសើចចុកពោះ កាលពីទសវត្សរ៍ទី ៨០ និង ៩០ លើកទី ២ នេះ អ្នកស្រី អម្ពរ ទេវី ក៏មានលេចឮដំណឹងថា នឹងបន្តអាជីពថតកុនយូរ និងបានសម្រេចចិត្តរស់នៅស្រុកខ្មែរទៀតផងដែរ ក្រោយពីអវត្ដមានលើពិភពសិល្បៈភាពយន្ដខ្មែរជាង ២០ ឆ្នាំ ទៅជ្រកកោននៅក្រោមទ្រនំថ្មីនៃទឹកដីទីក្រុងតាកូម៉ា រដ្ឋវ៉ាស៊ីនតោនសហរដ្ឋអាមេរិកនោះ។
ខណៈដំណឹងដែលបានលេចឮយ៉ាងច្បាស់នៅតាមបណ្តាញសង្គមថា អ្នកស្រី អម្ពរ ទេវី នឹងត្រូវមករស់នៅស្រុកខ្មែរវិញ តាមរយៈការវិលមកថតកុនលើកទី ២ នេះ មិនមែនជាការពិតនោះឡើយ។
បើតាមការអះអាងបញ្ជាក់ ពីអ្នកស្រី លក្ខណ៍ ដែលជាប្អូនស្រីបង្កើតរបស់អ្នកស្រី អម្ពរ ទេវី បានប្រាប់ភ្នំពេញប៉ុស្តិ៍ថា៖ «ចំពោះរឿងគាត់នឹងវិលមករស់នៅស្រុកខ្មែរវិញនោះ មិនពិតទេ គឺគាត់គ្រាន់តែមកថតកុនដូចកាលលើកមុនអ៊ីចឹងដែរប៉ុណ្ណោះ។ បន្ទាប់ពីគាត់ថតកុននេះចប់ ទៅគឺគាត់នឹងវិលទៅអាមេរិកវិញហើយ។ នាងខ្ញុំក៏សុំទោសផង ដែលបងស្រីខ្ញុំគាត់មិនទាន់មានពេលគ្រប់គ្រាន់ សម្រាប់ការផ្តល់បទសម្ភាសជាមួយគាត់ផ្ទាល់បាននៅពេលនេះ ដោយសារគាត់កំពុងតែជាប់ថតរហូតពេញមួយថ្ងៃៗ តែម្តង»។
ចំពោះពេលណាថតចប់ និងវិលត្រឡប់ឡើងយន្តហោះ ទៅកាន់ទឹកដីសហរដ្ឋអាមេរិកវិញនោះ ក៏ត្រូវអ្នកស្រី លក្ខណ៍ បន្តឲ្យដឹងថា៖ «ហើយរឿងគាត់នឹងវិលទៅវិញពេលណា នាងខ្ញុំផ្ទាល់ជាប្អូនស្រីគាត់ ក៏នៅពុំទាន់អាចជ្រាបច្បាស់ដែរ។ តែចំពោះដំណឹងថា គាត់ចង់មករស់នៅស្រុកខ្មែរវិញនោះ ខ្ញុំដឹងច្បាស់ណាស់ថា គាត់មិនមានគម្រោងគិតដូច្នេះឡើយ គឺគ្រាន់តែវិលមកថតកុនតែប៉ុណ្ណោះ»។
គួរបញ្ជាក់ថា តារាសម្តែងស្រីនាចុងទសវត្សរ៍ឆ្នាំ ៨០ និងទី ៩០ អ្នកស្រី អម្ពរ ទេវី ដែលមានវ័យ ៤៥ ឆ្នាំរូបនេះមានស្នាដៃសម្តែង ខ្សែភាពយន្តមិនតិចជាង ១០០ រឿងទេ ជាមួយនឹងតារាសម្តែងប្រុសជើងចាស់នានាដូចជាលោក ទេព រិន្ទដារ៉ូ លោក សម ដារ៉ា លោក ហមឈរ៉ា លោកជា ណូបូ លោក ខៃ ប្រសិទ្ធ ជាដើម ដោយខ្សែភាពយន្តជារឿងល្បីៗនោះរួមមានដូចជារឿង « សម្ដីចុងក្រោយ» រឿង «ឆ្អឹងអណ្ដែត» និងរឿង «ចុងស្រល់» ព្រមទាំងខ្សែភាពយន្តរឿង «ជើងមេឃដាច់ស្រយាល» ផងដែរ៕
