.jpg)
ខ្សែរ៉កប្រវែងជិត ៣ គីឡូម៉ែត្រ ធ្វើឲ្យអ្នកជិះរំជើបរំជួលនឹងល្បឿនរបស់វា។ AFP
ក្រុងឌូបៃ: ខ្សែរ៉កវែងបំផុតក្នុងលោកនឹងបើកសម្ពោធនៅអារ៉ាប់រួមនាថ្ងៃសុក្រ ចុងសប្ដាហ៍នេះ ដោយផ្ដល់ការកម្សាន្ដដល់អ្នកនិយមលស់ព្រលឹងនៅល្បឿនរត់ ១៥០ គីឡូម៉ែត្រក្នុងមួយម៉ោងចុះពីកំពូលភ្នំខ្ពស់បំផុតនៅទឹកដីមជ្ឈិមបូព៌ាដ៏ស៊ីវិល័យ និងល្បីខាងប្រេងមួយនេះ។
ខ្សែរ៉តប្រវែង ២,៨ គីឡូម៉ែត្រ លាតសន្ធឹងស្មើនឹងទីលានបាល់ទាត់ចំនួន ២៨ ត្រូវបានផ្ដល់កំណត់ត្រាហ្គីនណេសពិភពលោក។ នេះបើយោងតាមមន្ដ្រីទេសចរណ៍ក្រុងឌូបៃ។
ប៉ុន្ដែកំណត់ត្រាពិភពលោកនេះ មិនស្កប់ស្កល់ដល់មជ្ឈមណ្ឌលសេដ្ឋកិច្ច និងទេសចរណ៍ក្រុងឌូបៃ ឬទីក្រុងអាប៊ុយដាប៊ីដ៏សម្បូរប្រេងនៅឡើយ។ វាជាចំណូលដល់ក្រុង អាស អាល់ ខៃម៉ា ដែលនៅអភិវឌ្ឍតិចតួច ស្ថិតនៅភាគខាងជើង តាមបណ្ដោយព្រំដែនប្រទេសអូម៉ង់។
ភ្ញៀវទេសចរភាគច្រើន ទៅកាន់អារ៉ាប់រួម បានចំណាយពេលយ៉ាងច្រើននៅក្រុងឌូបៃ ជាមជ្ឈមណ្ឌលផ្សារទំនើបដ៏ធំបំផុតមួយក្នុងលោក និងទីឋានជិះស្គីទឹកកកសិប្បនិម្មិត។
ក្រុងអាស អាល់ ខៃម៉ា សង្ឃឹមនឹង ខ្សែរ៉កដ៏វែងបំផុតក្នុងលោកនេះ ដែលមានកម្ពស់ ១៦៨០ ម៉ែត្រលើនីវ៉ូទឹកសមុទ្រនៃកំពូលភ្នំ Jebel Jais នឹងទាក់ទាញភ្ញៀវទេសចរយ៉ាងច្រើន។
ខ្សែរ៉កអាចទទួលភ្ញៀវប្រមាណ ១០ ម៉ឺននាក់ក្នុងមួយឆ្នាំ ហើយទោះបីជាការកម្សាន្តដ៏ព្រឺព្រួចនេះ មិនមានកំណត់អាយុ ក៏អ្នកជិះត្រូវមានកម្ពស់យ៉ាងទាប ១,២២ ម៉ែត្រ និងមិនមានទម្ងន់លើសពី ១៥០ គីឡូក្រាម។
កំណត់ត្រាពិភពលោក ចុងក្រោយបំផុតរបស់អារ៉ាប់រួមនឹងបន្ថែមទៅលើសមិទ្ធផលមានស្រាប់ ដូចជា អគារខ្ពស់បំផុត ក្នុងលោក និងកោះដូងសិប្បនិម្មិត៕
