ភ្នំពេញ : កំពុងតែរំលេចស្នាមញញឹមពព្រាយ និងសំណើចក្អាកក្អាយជាមួយម្ចាស់ស្នេហ៍ថ្មីលើទឹកដីមហាអំណាចសហរដ្ឋអាមេរិកភ្លាមៗ បន្ទាប់ពីបញ្ចប់ដំណើរកម្សាន្តពាសពេញអស់ទឹកដីនៃទ្វីបអឺរ៉ុបនោះ តារាចម្រៀងបទអូរីជីណល អ្នកនាង អេដា បែរជាបង្ហាញមូលហេតុដែលអ្នកនាងចង់ផ្ញើជីវិតរស់នៅស្រុកខ្មែរទៅវិញ។
ទើបតែត្រឡប់ពីដែនដីអឺរ៉ុប ក្នុងដំណើរកម្សាន្តជាមួយម្ចាស់ស្នេហ៍ថ្មី តារាចម្រៀងមេម៉ាយមួយភ្លើង អ្នកនាង អេដា ថ្មីៗនេះក៏បានរំលេចរូបភាពហោះហើរទៅទឹកដី មហាអំណាចអាមេរិកជួបចាស់ទុំខាងប្រុស ជាការស្ដែងនូវចំណងស្នេហាមួយនេះកាន់តែរឹងមាំ។
ចាប់តាំងពីប្រកាសចំណងស្នេហ៍ជាផ្លូវការចំថ្ងៃកំណើតអ្នកនាង អេដា នៅថ្ងៃទី ១១ ខែវិច្ឆិកា ឆ្នាំ ២០១៧ មកសម្ព័ន្ធស្នេហ៍ថ្មីរវាង អេដា ជាមួយបុរសកូនកាត់បីសាសន៍ ខ្មែរ ចិន និងអាមេរិក លោក អេលែន តាន់ ជាស្ថាបនិករបស់អង្គការឈ្មោះស្ទែម (STEAM) ត្រូវបានគេមើលឃើញថា ពោរពេញដោយភាពផ្អែមល្ហែមរំលេចចេញពីរូបថតគ្រប់ជ្រុងនៃពិភពលោក។
បន្ទាប់ពីរួមដំណើរជាមួយលោក អេលែន យ៉ាងផ្អែមល្ហែមទៅទឹកដីអឺរ៉ុបកាលពីចុងឆ្នាំ អ្នកនាង អេដា នៅស្រុកខ្មែរមិនបានប៉ុន្មាន ក៏បំពេញគម្រោងហោះហើរទៅជួបសាច់ញាតិខាងប្រុសនៅ រដ្ឋកាលីហ្វ័រនីញ៉ា សហរដ្ឋអាមេរិកទៀត។
ជាមួយការដកឃ្លាពីសិល្បៈ និងចាយពេលវេលាសាងភាពផ្អែមល្ហែមជាមួយម្ចាស់ស្នេហ៍ថា មជ្ឈដ្ឋានជាច្រើនបានដាក់ការសន្និដ្ឋានថា អ្នកនាង អេដា មិនយូរទេអាចបន្សាត់ខ្លួនទៅរស់នៅទឹកដីឯនាយសមុទ្រតាមម្ចាស់ស្នេហ៍នាងហើយ។
យ៉ាងណា តារាស្រីកំពុងរីករាយនឹងរួមវិថីស្នេហ៍ជាមួយបុរសកូនកាត់បីសាសន៍រូបសង្សារលោក អេលែន តាន់ នោះ អ្នកនាងស្រាប់តែបង្ហោះសារតាមបណ្ដាញអ៊ីនស្តាក្រាម ប្រាប់ពីមូលហេតុមួយដែលអ្នកនាងមិនអាចចាកចោលស្រុកខ្មែរ។
ភ្ជាប់នឹងរូបថតការព្យាករណ៍អាកាសធាតុនៅវ៉ាស៊ីនតោន សហរដ្ឋអាមេរិក ដែលបង្ហាញតួលេខ -៧ អង្សាសេ នោះ តារាចម្រៀងបទអូរីជីណល អ្នកនាង គ្រួច សចរិយា ហៅ អេដា បានសរសេរថា៖ «នេះហើយគឺជាមូលហេតុដែលខ្ញុំអាចត្រឹមតែរស់នៅប្ទេសកម្ពុជា។ ស្រុកខ្មែរអស់មួយជីវិត!!! យ៉ូ! រាត្រីសួស្ដីពីបន្ទប់សណ្ឋាគារដ៏រងាកក»៕